ପୋଖରୀରେ ଭାସୁଛି ଯୁବତୀଙ୍କ ଶବ, ସନ୍ଦେହ ଘେରରେ ମୃତ୍ୟୁ 

ବେଗୁନିଆ : ବେଗୁନିଆ ବ୍ଲକ ବାଘମାରୀ ଥାନା ଅନ୍ତର୍ଗତ ଅଟ୍ରି ଶରଧାପୁର ରାସ୍ତାରେ ଥିବା ଏକ ପୋଖରୀରେ  ଆଜି ସକାଳେ ଜଣେ ଯୁବତୀଙ୍କପଚି ଯାଇଥିବା ଶବ ଭାସୁଥିବାର ଦେଖିବାକୁ ମିଳିଥିଲା । ଲୋକମାନେ ଉକ୍ତ ପୋଖରୀକୁ ଗାଧୋଇବାକୁ ଯିବା ସମୟରେ ଏହା ଦେଖି ପୋଲିସକୁ ଖବର ଦେଇଥିଲେ ।ଅଟ୍ରି ଟାଙ୍ଗିସାହିରେ ରହୁଥିବା ରମେଶ ବାରିକଙ୍କ ଝିଅ ସେବତୀ ବାରିକ(ପିଙ୍କି)(୧୯)ବେଗୁନିଆର କୌଣସି ଏକ ସ୍ଥାନରେ ଖଲି ଠୁଙ୍ଗା ତିଆରି ହେଉଥିବାବେଳେ ସେଠାରେ ସେ ନିୟମିତ ଯାଇ କାମ କରିଥାଏ । ଗତ ୭ ତାରିଖ ଦିନ ସେ ବେଗୁନିଆ ଯାଇ ଆଉ ଘରକୁ ଫେରି ନଥିଲା । ଫଳରେ ରମେଶ ଝିଅକୁ ଖୋଜା ଖୋଜି କରି ନପାଇବା ପରେ ତାର ନିଖୋଜ ସମ୍ପର୍କରେ ବାଘମାରୀ ଥାନାରେ ଲିଖିତ ଅଭିଯୋଗ କରିଥିଲେ । ପୁଲିସ କିନ୍ତୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବା ପୂର୍ବରୁ ଆଜି ସକାଳୁ ସେବତୀର ମୃତ ଦେହ ପୋଖରୀରେ ଭାସୁଥିବାର ଦେଖିବାକୁ ମିଳିଥିଲା ।ଶବଟି ପୋଖରୀରେ ମୁହଁ ତଳକୁ କରି ଭାସୁଥିବାବେଳେ ତାର ଦେହଜାକ ଫୋଟକା ହୋଇଯାଇଥିବାର ଦେଖିବାକୁ ମିଳିଥିଲା । ଜିଭଟି ପାଟି ବାହାରକୁ ବାହାରି ପଡିଥିବାବେଳେ ଫୁଲି ମୋଟା ହୋଇଯାଇଛି ।ଆଖି ଦୁଇଟି ବାହାରକୁ ବାହାରି ପଡିଛି । ମୁଣ୍ଡରୁ ବାଳ କିଛି ଉପୁଡିଯାଇଛି ।
ଏହି ସବୁ ଘଟଣାକୁ ନେଇ ଯୁବତୀଙ୍କୁ କେହି ହତ୍ୟା କରି ଆଣି ଗତ ରାତିରେ ପୋଖରୀରେ ପକାଇ ଦେଇ ଚାଲିଯାଇଥିବାର ସାଧାରଣରେ ଆଲୋଚନା ହେଉଛି। ସେହିପରି ତାଙ୍କୁ କେହି ଏସିଡ ପକାଇ ମାରିଦେବା ପରେ ଏଠାରେ ଆଣି ପକାଇ ଆତ୍ମହତ୍ୟାର ରୂପ ଦେବା ପାଇଁ ଏପରି ଚାଲ କରିଥିବାର ମଧ୍ୟ ଆଲୋଚନା ହେଉଛି । ଯୁବତୀ ଜଣଙ୍କୁ ସେହି ଗ୍ରାମର ଜଣେ ଯୁବକ ଗତ ୩ ମାସ ତଳେ ଦୁର୍ବ୍ୟବହାର କରି ଏବେ ଜେଲରେ ଥିବାର ଜଣାପଡିଛି । ଜଣେ ଯୁବତୀ ନିଖୋଜ ଦୁଇଦିନ କୋଉଠି ଥିଲା ଏବଂ ଦୁଇଦିନ ପରେ ଆସି ତାର ଘର ନିକଟ ପୋଖରୀରେ ଡୁବି ଆତ୍ମହତ୍ୟା କରିବା ଆଦୋୖ ଯୁକ୍ତିସଂଗତ ନୁହେଁ । ତେଣୁ ପୋଲିସ ହତ୍ୟା ଘଟଣାରେ ମାମଲା ରୁଜୁ କରି ଘଟଣାର ନିରପେକ୍ଷ ତଦନ୍ତ କଲେ ତାଙ୍କୁ କିଏ ହତ୍ୟା କରି ଆଣି ଏଠାରେ ପକାଇଛି ତାହା ନିଶ୍ଚୟ ଜଣାପଡିବା ସହିତ ଅଭିଯୁକ୍ତ ନିଶ୍ଚୟ ଧରାପଡିବ ବୋଲି ସ୍ଥାନୀୟ ଜନସାଧାରଣ ଆଶା ପ୍ରକଟ କରିଛନ୍ତି ।ବେଗୁନିଆ ଅଗ୍ନିଶମ ବିଭାଗ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ପଚି ଯାଇଥିବା ଶବଟିକୁ ଉଦ୍ଧାର କରି ସ୍ଥାନୀୟ ପୋଲିସକୁ ହସ୍ତାନ୍ତର କରିଥିଲେ ।ପୋଲିସ ବ୍ୟବଚ୍ଛେଦ ନିମନ୍ତେ ଖୋର୍ଦ୍ଧା ଜିଲା ମୁଖ୍ୟ ଡାକ୍ତରଖାନାକୁ ପଠାଇଥିଲେ ।
Comments
Loading...