ନୀଳଗିରି: ବାଲେଶ୍ୱର ଜିଲା ଅଧୀନ ନୀଳଗିରିସ୍ଥିତ କୁଲଡିହା ଅଭୟାରଣ୍ୟରେ ଏକ ମାଈଭାଲୁର ମୃତଦେହ ଠାବ କରାଯାଇଛି। ପଥର ଚଟାଣରେ ପଡ଼ି ଭାଲୁଟିର ମୃତ୍ୟୁ ଘଟିଛି ବୋଲି ବିଭାଗ ପକ୍ଷରୁ କୁହାଯାଇଛି। ବନକର୍ମଚାରୀମାନେ ବୁଧବାର ପାଟ୍ରୋଲିଂ କରୁଥିବା ସମୟରେ ଅଭୟାରଣ୍ୟ ଅଧୀନ ଆମ୍ବଝର ଅଞ୍ଚଳରେ ଭାଲୁଟି ମରି ପଡ଼ିଥିବା ଦେଖିବାକୁ ପାଇଥିଲେ। ଖବର ପାଇ ଘଟଣାସ୍ଥଳରେ କୁଲଡିହା ରେଞ୍ଜର ବିଜୟ ମହାପାତ୍ର ପହଞ୍ଚି ତଦନ୍ତ ଆରମ୍ଭ କରିଛନ୍ତି। ସେହିପରି ପ୍ରାଣୀ ଚିକିତ୍ସକଙ୍କ ଦ୍ୱାରା ଶବ ବ୍ୟବଚ୍ଛେଦ ମଧ୍ୟ କରାଯାଇଛି। ଭାଲୁଟି ଅସାବଧାନତା ଯୋଗୁ ଗୋଡ଼ ଖସି ଯାଇ ମୃତ୍ୟୁ ଘଟିଥିବା କୁହାଯାଉଥିବା ବେଳେ ତା’ ଦେହରେ ରକ୍ତ ସବୁ ଜମାଟ ବାନ୍ଧି ଯାଇଛି। ଉଚ୍ଚସ୍ଥାନରୁ ଖସି ପଡ଼ିବା ଯୋଗୁ ପଥର ଚଟାଣରେ ଛେଚି ହୋଇ ଏଭଳି ମୃତ୍ୟୁ ଘଟିଥାଇପାରେ ବୋଲି ଚର୍ଚ୍ଚା ହେଉଛି। ତେବେ ବ୍ୟବଚ୍ଛେଦ ରିପୋର୍ଟ ଆସିବା ପରେ ଭାଲୁ ମୃତ୍ୟୁର ପ୍ରକୃତ ରହସ୍ୟ ଉନ୍ମୋଚନ ହେବ ବୋଲି କୁହାଯାଉଛି।
Comments are closed.