ଉଚ୍ଛେଦ ଅଭିଯାନକୁବିରୋଧ, ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ବସ୍ତିବାସିନ୍ଦାଙ୍କ ଅଭିଯୋଗ

ଭୁବନେଶ୍ବର: କୌଣସିପ୍ରକାର ଆଇନାନୁମୋଦିତ ପନ୍ଥା ଅବଲମ୍ବନ ନକରି ବିଡିଏ ପକ୍ଷରୁ ବସ୍ତି ଉଚ୍ଛେଦ ଅଭିଯାନ ବିରୋଧରେ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ରେଗେଡ଼ି ବସ୍ତି ଅଞ୍ଚଳରେ ରହୁଥିବା ଭୂମିହୀନ ଶ୍ରମଜୀବୀ ପରିବାର ଅଭିଯୋଗ କରିଛନ୍ତି। ଗତ ୪ତାରିଖରେ ଏହି ଗରିବ ପରିବାରଙ୍କ ଘର ବଳପୂର୍ବକ ଭାଙ୍ଗିବାକୁ ବିଡିଏ, ବିଏମ୍‌ସିର ମିଳିତ ଉଚ୍ଛେଦକାରୀ ଦଳ ପହଞ୍ଚିଥିଲା। ବହୁ କାକୁତି ମିନତି ପରେ ସେମାନଙ୍କୁ ୭ ଦିନ ଭିତରେ ଘର ଛାଡ଼ି ଚାଲିଯିବାକୁ କୁହାଯାଇଥିଲା। ଏଭଳି ବେଆଇନ ଉଚ୍ଛେଦ ଅଭିଯାନ ବନ୍ଦ ରଖିବାକୁ ମୁଖ୍ୟମନ୍ତ୍ରୀଙ୍କୁ ଲିଖିତ ଭାବେ ଜଣାଇଛନ୍ତି ବସ୍ତିବାସିନ୍ଦା। ପଞ୍ଚାୟତ ଅଧୀନରେ ବାସ କରୁଥିବା ଏହି ଶ୍ରମଜୀବୀ ଭୂମିହୀନ ପରିବାରଙ୍କୁ ବର୍ତ୍ତମାନ ରହୁଥିବା ଜମିର ପଟା ଯୋଗାଇ ଦେବାକୁ ସେମାନେ ଦାବି କରିଛନ୍ତି। ଯଦି କୌଣସି ସର୍ବସାଧାରଣ ସ୍ୱାର୍ଥ ଦୃଷ୍ଟିରୁ ଉଚ୍ଛେଦ ନିତାନ୍ତ ଜରୁରୀ ଥାଏ ତେବେ ଉଚ୍ଛେଦର ଯଥେଷ୍ଟ ପୂର୍ବରୁ ବିକଳ୍ପ ଥଇଥାନ ନିମନ୍ତେ ସେମାନେ କହିଛନ୍ତି। କଳାରାହାଙ୍ଗ ପଞ୍ଚାୟତ ରେଗେଡ଼ି ବସ୍ତିବାସିନ୍ଦାଙ୍କ ପକ୍ଷରୁ ଚିନ୍ମୟୀ ମହାରଣା, ଚନ୍ଦନ ମହାପାତ୍ର, କବିବର ମହାଳିକ, ବାସୁଦେବ ମହାରଣା, କମଳିନୀ ସାହୁ, ସୁମନ୍ତ ନାଏକ, ରୋହିତ ନାୟକଙ୍କ ନେତୃତ୍ୱରେ ବସ୍ତିବାସିନ୍ଦା ଅଭିଯୋଗ ପ୍ରକୋଷ୍ଠକୁ ଯାଇ ଅଧିକାରୀଙ୍କୁ ସାକ୍ଷାତ କରିଥିଲେ। ଶ୍ରମିକ ନେତା ଦୀନବନ୍ଧୁ ମହାରଣା ସେମାନଙ୍କୁ ସହଯୋଗ କରିଥିଲେ।

Comments
Loading...