ବ୍ରହ୍ମପୁର: ଏଣିକି ବ୍ୟାଟେରିରେ ଚାଲିବ ସାଇକଲ। ଏହାକୁ ଜଣେ ଆଇଟିଆଇ ଛାତ୍ରଙ୍କ ଦ୍ବାରା ନିର୍ମିତ କରିଛନ୍ତି। ଏହି ବ୍ୟାଟେରି ଚାଳିତ ସାଇକଲ ଏବେ ସ୍ଥାନୀୟ ଜନସାଧାରଣଙ୍କ ପସନ୍ଦର ବସ୍ତୁ ପାଲଟିଛି। ଚିକିଟିପେଣ୍ଠନିବାସୀ ଆଇଟିଆଇ ଛାତ୍ର ଶ୍ରୀଧର ବେହେରା(ଶିରି)ନିଜସ୍ବ ପ୍ରଚେଷ୍ଟାରେ ନିର୍ମିତ ବ୍ୟାଟେରି ଚାଳିତ ସାଇକଲ ବଜାରରେ ମିଳୁଥିବା ସାଇକେଲର ଅବିକଳ ନକଲ। ଏକ ପୁରୁଣାକାଳିଆ ସାଇକଲକୁ ନିଜସ୍ବ ଢଙ୍ଗରେ ସଜାଇଛନ୍ତି।
ଆଇଟିଆଇ ଅଟୋମୋବାଇଲ ବିଭାଗର ଛାତ୍ର ଶ୍ରୀଧର ଜଣେ ଅଭିଜ୍ଞ ମେକାନିକ ରାମଚନ୍ଦ୍ର ବେହେରା ଏବଂ ଶିକ୍ଷୟିତ୍ରୀ ପି.ଜଗଦମ୍ବାଙ୍କ ପୁତ୍ର। ପିଲାଟି ଦିନରୁ ହିଁ ଶିରି କିଛି ନୂଆ ଯନ୍ତ୍ରପାତି ନିର୍ମାଣ କରିବାକୁ ମନ ବଳାଇ ଆସିଛନ୍ତି। ଆଇଟିଆଇର ଛାତ୍ର ଥିବା ବେଳୁ ହିଁ ସେ ବ୍ୟାଟେରିଚାଳିତ ସାଇକଲ ନିର୍ମାଣ କରିବାକୁ କରିଥିବା ଯୋଜନାକୁ ସାକାର ରୂପ ଦେଇଛନ୍ତି। ପୁରୁଣା ସାଇକଲରେ ୨୪ ଭୋଲଟ ଡିସି ମୋଟର ଖଞ୍ଜି ଏହି ସ୍ବତନ୍ତ୍ର ଧରଣର ସାଇକଲ ନିର୍ମାଣ କରିଛନ୍ତି। ଚାରିଘଣ୍ଟା ଚାର୍ଜ କଲେ ୩୦ କିଲୋମିଟର ପର୍ୟ୍ୟନ୍ତ ସାଇକଲଟି ଚାଲିପାରିବ। ଏହାସହ ଘଣ୍ଟା ପ୍ରତି ୨୦ ରୁ ୨୫ କିମି ବେଗରେ ସାଇକେଲଟି ଗତି କରିବା ଏବଂ ବ୍ରେକ ଦେଲେ ମୋଟର ସ୍ବୟଂ ବନ୍ଦ ରହିବ ବୋଲି କହିଛନ୍ତି ଶ୍ରୀଧର। ସାଇକଲରେ ଏକ୍ସଲିଟର, ସୁପର ବ୍ରେକ, ସ୍ପିଡୋମିଟର , ହର୍ଣ୍ଣ, ଲାଇଟ ଆଦି ସଂଯୋଗ ହୋଇଛି। ଯାହାକି ବଜାରରେ ଉପଲବ୍ଧ ବ୍ୟାଟେରିଚାଳିତ ସାଇକଲଠାରୁ କୌଣସି ଗୁଣରେ କମ ନୁହେଁ। ଶ୍ରୀଧରଙ୍କୁ ଏହି କାମରେ ସହାୟତା କରିଛନ୍ତି ବନ୍ଧୁ ଭରତଭୂଷଣ ଓ ଲିଙ୍ଗରାଜ ସୁବୁଦ୍ଧି।
Comments are closed.