ଅଧାରାସ୍ତାରେ ସରିଗଲା ଆମ୍ବୁଲାନ୍ସରୁ ତେଲ ,ଚାଲିଗଲା ମାଆ ଛୁଆଙ୍କ ଜୀବନ: ଘଟଣା ସତ ବୋଲି ସ୍ୱିକାର କଲେ ସିଡିଏମ୍‍ଓ

ବାରିପଦା: ଅଧା ରାସ୍ତାରେ ଆମ୍ବୁଲାନ୍ସରୁ ସରିଗଲା ତେଲ। ରାସ୍ତାରେ ଦିର୍ଘ ସମୟ ପାଇଁ ଅଟକି ରହିଲା ଆମ୍ବୁଲାନ୍ସ ଆଉ ଏହାରି ଭିତରେ ଅଧା ରାସ୍ତାରେ ଆମ୍ବୁଲାନ୍ସ ଭିତରେ ହିଁ ଦୁନିଆ ଦେଖିବା ଆଗରୁ ଆଖିବୁଜିଲା ଗର୍ଭସ୍ଥ ଶିଶୁ ଓ ମାଆ। ଏଭଳି ଏକ ଅଭାବନୀୟ ଘଟଣା ଘଟିଛି ବାରିପଦାରେ। ସୂଚନାଅନୁଯାୟୀ ଗତକାଲି ରାତିରେ ବାରିପଦା ବାଙ୍ଗିରିପୋଷି ହାଣିଦା ଗାଁର ତୁଳସୀ ମୁଣ୍ଡାଙ୍କ ଗର୍ଭ ଯନ୍ତ୍ରଣା ହେବାରୁ ତାଙ୍କୁ ବାଙ୍ଗିରିପୋଷି ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ତାଙ୍କ ଦେଖିବା ପରେ ଅବସ୍ଥା ଗୁରୁତର ହେବାରୁ ତାଙ୍କୁ ବାରିପଦା ମେଡିକାଲକୁ ପଠାଇଥିଲେ। ବାଙ୍ଗିରିପୋଷି ମେଡିକାଲର ଆମ୍ବୁଲାନ୍ସରେ ତୁଳସୀ ମୁଣ୍ଡାଙ୍କୁ ବାରିପଦା ମେଡିକାଲକୁ ନିଆଯାଉଥିଲା। ଅଧା ରାସ୍ତାରେ କୁଳିଅଣା ନିକଟରେ ଆମ୍ବୁଲାନ୍ସରୁ ତେଲ ସରିଯାଇଥିଲା। ବିଳମ୍ବିତ ରାତିରେ ତେଲ ସରିଯିବାରୁ କିଛି ବିକଳ୍ପ ମିଳି ନଥିଲା। ରାସ୍ତାରେ ପ୍ରାୟ ୧ଘଣ୍ଟାରୁ ଉର୍ଦ୍ଦ ସମୟ ଧରି ଆମ୍ବୁଲାନ୍ସ ଅଟକି ରହିଥିଲା।ଆମ୍ବୁଲାନ୍ସରେ ଥିବା ଆଶା କର୍ମୀଙ୍କ ଠାରୁ ଖବର ପାଇ ୧୦୮ ଆସି ଘଟଣାସ୍ଥଳରେ ପହଞ୍ଚିଥିଲା ଏବଂ ପ୍ରସୂତିଙ୍କୁ ବାରିପଦା ମେଡିକାଲକୁ ନିଆଯାଇଥିଲା କିନ୍ତୁ ମେଡିକାଲରେ ପହଞ୍ଚିବା ପରେ ଡାକ୍ତର ପ୍ରସୂତିଙ୍କୁ ମୃତ ଘୋଷଣା କରିଥିଲେ। ଘଟଣା ସମ୍ପର୍କରେ ମୟୁରଭଞ୍ଜ ସିିଡିଏମ୍‍ଓଙ୍କୁ ପଚାରିବାରୁ ସେ ଏହି ଘଟଣାକୁ ସ୍ୱିକାର କରିଛନ୍ତି ଏବଂ ତେଲ ପାଇପ ଫାଟି ଯିବାରୁ ତେଲ ଲିକ ହୋଇଥିଲା ଯାହା ଫଳରେ ଏଭଳି ଏକ ଅଭାବନୀୟ ଘଟଣା ହୋଇଥିବା ସେ ସ୍ୱିକାର କରିଛନ୍ତି।

Comments
Loading...