୨୫ରେ ରାଜନାଥ ସିଂଙ୍କ ବରୀ ଗସ୍ତ

ବରୀ (ରତ୍ନଗିରି) : ବିଜେପିର ଏକ ନିର୍ବାଚନୀ ସଭାରେ ଯୋଗଦେବା ପାଇଁ କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂ ୨୫ରେ ବରୀ ଆସୁଛନ୍ତି। ବରୀ ବିଧାନସଭା କ୍ଷେତ୍ରର ବିଧାୟକ ପ୍ରାର୍ଥୀ ବିଶ୍ୱରଞ୍ଜନ ମଲ୍ଲିକ ଓ ଯାଜପୁର ଲୋକସଭା କ୍ଷେତ୍ରର ସାଂସଦ ପ୍ରାର୍ଥୀ ଅମିୟକାନ୍ତ ମଲିକଙ୍କ ପାଇଁ ପ୍ରଚାର କରିବାକୁ ମନ୍ତ୍ରୀ ଶ୍ରୀ ସିଂ ହେଲିକପ୍ଟର ଯୋଗେ ବରୀ ବ୍ଲକ ଅନ୍ତର୍ଗତ ମାଳଦାଠାରେ ଗୁରୁବାର ପୂର୍ବାହ୍ଣରେ ପହଞ୍ଚିବାର କାର୍ଯ୍ୟକ୍ରମ ରହିଛି। ଏଥିପାଇଁ ବରୀ ବିଜେପି ଶିବିର ଚଳଚଞ୍ଚଳ ହୋଇଉଠିଛି। ଏହି ଗସ୍ତକୁ ସଫଳ କରିବାକୁ ସ୍ଥାନୀୟ ବିଜେପି ପକ୍ଷରୁ ଜୋରଦାର ପ୍ରସ୍ତୁତି ଚାଲିଛି। ବିଜେପି ନେତା ବିଶ୍ୱରଞ୍ଜନ ମଲ୍ଲିକ ଜୋନସ୍ତରୀୟ ପ୍ରସ୍ତୁତି ବୈଠକ ଡାକି କେନ୍ଦ୍ରମନ୍ତ୍ରୀଙ୍କ ଏହି ଗସ୍ତକୁ ସଫଳ କରିବାକୁ ଆହ୍ୱାନ ଦେଇଛନ୍ତି। ସୂଚନା ଯୋଗ୍ୟ ଗତ ୨୨ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବରୀ ବ୍ଲକ ଅନ୍ତର୍ଗତ ସନ୍ଥନ ମଠଠାରେ ଆୟୋଜିତ ନିର୍ବାଚନୀ ସଭାରେ ଯୋଗଦେବା ସହ ବସ୍ ଯୋଗେ ଏକ ରୋଡ୍ ଶୋ’ରେ ଯୋଗଦେଇଥିଲେ। ନବୀନଙ୍କ ଗସ୍ତ ପରେ କେନ୍ଦ୍ର ମନ୍ତ୍ରୀଙ୍କ ଏହି ଗସ୍ତ ସାଧାରଣରେ ପ୍ରଭାବ ପକାଇବ ବୋଲି ବିଜେପି କର୍ମୀମାନେ ଆଶା ପ୍ରକଟ କରିଛନ୍ତି।

Comments
Loading...