ଆରମ୍ଭ ହେଲା ବରଗଡ ଧନୁଯାତ୍ରା ; ଚାଲିବ କଂସ ମହାରାଜଙ୍କ ଦରବାର

0

ବରଗଡ: ବିଶ୍ୱପ୍ରସିଦ୍ଧ ବରଗଡ ଧନୁଯାତ୍ରା ଶୁକ୍ରବାର ସନ୍ଧ୍ୟାରୁ ଆରମ୍ଭ ହୋଇଛି। ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ ଆନୁଷ୍ଠାନିକ ଭାବେ ଚଳିତ ବର୍ଷର ଧନୁଯାତ୍ରାକୁ ଉଦଘାଟନ କରିଛନ୍ତି । ଲୋକସଭା ସାଂସଦ ପ୍ରଭାସ ସିଂହ ଓ ବିଧାୟକ ଦେବେଶ ଆଚାର୍ଯ୍ୟ ଏବଂ ଜିଲ୍ଲାପାଳ ପ୍ରମୁଖ ମଧ୍ୟ ଉଦଘାଟନ ଉତ୍ସବରେ ଉପସ୍ଥିତ ଥିଲେ। ଆଜି ଅପରାହ୍ନରୁ ଅଧିଷ୍ଠାତ୍ରୀ ଦେବୀ ମାଆ ସମଲେଇଙ୍କ ମନ୍ଦିରରେ ପାରମ୍ପରିକ ପୂଜାର୍ଚ୍ଚନା ପରେ ସମସ୍ତ କଳାକାର ସାଂସ୍କୃତିକ ଶୋଭାଯାତ୍ରାରେ ରାଜଦରବାରରେ ପହଞ୍ଚିବା ପରେ ଧନୁଯାତ୍ରା ଉଦଘାଟିତ ହୋଇଥିଲା । ଏଥିରେ ଦେଶ ବିଦେଶର ବହୁ ପ୍ରତିଷ୍ଠିତ କଳାକାରଙ୍କ ଦ୍ୱାରା ନୃତ୍ୟଗୀତ ପ୍ରଦର୍ଶନ କରାଯାଇଥିଲା।

ଆଜିଠାରୁ ପ୍ରାୟ ୧୧ ଦିନ ପର୍ଯ୍ୟନ୍ତ ଏହି ଐତିହାସିକ ଯାତ୍ରା ଅନୁଷ୍ଠିତ ହେବ। ବରଗଡରେ କଂସର ରାଜୁତି ଚାଲିବ । ବିଶ୍ବର  ସର୍ବବୃହତ ମୁକ୍ତାକାଶ ରଙ୍ଗମଞ୍ଚରେ ଏହି  ଯାତ୍ରା ଅନୁଷ୍ଠିତ ହେଉଛି।  ବିଶ୍ୱପ୍ରସିଦ୍ଧ ଧନୁଯାତ୍ରା ପାଇଁ ବରଗଡ ସହର ଅପୂର୍ବ ରୂପରେ ସଜ ହୋଇଛି ।  ଉଦଘାଟନୀ ସଂଧ୍ୟାରେ ରାଜକୀୟ ଆଡମ୍ବରରେ ଦେବକୀ-ବସୁଦେବଙ୍କ ବିବାହ, ଦୈବବାଣୀ, ଉଗ୍ରସେନଙ୍କୁ ଗାଦିଚ୍ୟୁତ କରି ଯୁବରାଜ କଂସଙ୍କ ସିଂହାସନ ଆରୋହଣ ଏବଂ ଦେବକୀ-ବସୁଦେବଙ୍କୁ କାରାଗାର ପ୍ରେରଣ ଦୃଶ୍ୟ ଅଭିନୀତ ହେଉଛି । ସୂଚନାଯୋଗ୍ୟ ଚଳିତ ବର୍ଷ ଧନୁଯାତ୍ରା ମହୋତ୍ସବ ୭୦ ବର୍ଷ ପୂରଣ କରିବାକୁ ଯାଉଛି ।

Leave A Reply