ଜିଲ୍ଲା ସ୍ତରୀୟ ୬୯ତମ ଗୋ-ସମ୍ବର୍ଦ୍ଧନା ସପ୍ତାହ ପାଳନ ଓ ଭର୍ଚୁଆଲ ପ୍ରଶିକ୍ଷଣ ଶିବିର

ବାଙ୍କୀ: ଜିଲ୍ଲା ସ୍ତରୀୟ ଗୋ-ସମ୍ବର୍ଦ୍ଧନା ସପ୍ତାହ ପାଳନ ଅବସରରେ ବାଙ୍କୀ ପ୍ରାଣୀସମ୍ପଦ ବିକାଶ ବିଭାଗ ସୌଜନ୍ୟତାରେ ଗୁରୁବାର ଉପଖଣ୍ଡ କାର୍ଯ୍ୟାଳୟ ଠାରେ ଏକ ଗୋ-ପୂଜନ,ଗୋପାଳକ ସମ୍ବର୍ଦ୍ଧନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି କାର୍ଯ୍ୟକ୍ରମରେ ପ୍ରଥମେ ପାରମ୍ପରିକ ଭାବରେ ଗୋ-ମାତାକୁ ପୂଜା କରିବା ସହିତ ଖମାରଙ୍ଗ ଗ୍ରାମର ୨ଜଣ ଅଗ୍ରଣୀ ଗୋପାଳକ ରତ୍ନମଣି ତ୍ରିପାଠୀ ଓ ସତ୍ୟନାରାୟଣ ମହାପାତ୍ରଙ୍କୁ ସମ୍ବର୍ଦ୍ଧିତ କରାଯାଇଛି। କାର୍ଯ୍ୟକ୍ରମରେ ଡମପଡା ବ୍ଲକ ଗୋଷ୍ଠୀ ପ୍ରାଣୀ ଚିକିତ୍ସା ଅଧିକାରୀ ସ୍ୱରୂପ ରଞ୍ଜନ ମହାପାତ୍ର, ବାଙ୍କୀ ଗୋଷ୍ଠୀ ପ୍ରାଣୀ ଚିକିତ୍ସା ଅଧିକାରୀ ଡାକ୍ତର କୃଷ୍ଣ କେଶବ ସଡଙ୍ଗୀ, ଅବସରପ୍ରାପ୍ତ ଉପନିର୍ଦ୍ଦେଶକ ଶରତ ଚନ୍ଦ୍ର ସ୍ୱାଇଁ ସମ୍ମାନିତ ଅତିଥି ଭାବରେ ଉପସ୍ଥିତ ଥିଲେ। କୋଭିଡ୍‍ ନିୟମ ଅନୁପାଳନ କରାଯାଇ ସଂକ୍ଷିପ୍ତ ଭାବରେ କାର୍ଯ୍ୟକ୍ରମଟି ସଞ୍ଚାଳିତ ହୋଇଥିଲା। ଭୁବନେଶ୍ୱର ସ୍ଥିତ ସହିଦ ନଗର ପ୍ରଣୀଚିକିତ୍ସାଳୟ ପରିସରରୁ ରାଜ୍ୟ ସ୍ତରୀୟ ଗୋ-ସମ୍ବର୍ଦ୍ଧନା ସପ୍ତାହ ପାଳନ ଅବସରରେ ଏକ ଭର୍ଚୁଆଲ ପ୍ରଶିକ୍ଷଣ ଶିବିର ଗୋପାଳକ ମାନଙ୍କ ପାଇଁ ଅନୁଷ୍ଠିତ ହୋଇଥିଲା। ବାଙ୍କୀ ଠାରେ ଆୟୋଜିତ ଶିବିରରେ ଉପସ୍ଥିତ ବାଙ୍କୀ ଉପଖଣ୍ଡର ୩୦ଜଣ ଅଗ୍ରଣୀ ଗୋପାଳକ ଭର୍ଚୁଆଲ ପ୍ରଶିକ୍ଷଣ ଗ୍ରହଣ କରି ଦିବସର ଅନୁଚିନ୍ତା ଓ ଗୋପାଳନର ବ୍ୟବସ୍ଥା ସମ୍ପର୍କରେ ଅବଗତ ହୋଇଛନ୍ତି। ଅତିରିକ୍ତ ପ୍ରାଣୀ ଚିକିତ୍ସା ଅଧିକାରୀ ଡାକ୍ତର ଅନ୍ତର୍ଯ୍ୟାମୀ ବାରିକ,ଡାକ୍ତର ଅର୍ପିତା ପାଢୀ କାର୍ଯ୍ୟକ୍ରମ ସଞ୍ଚାଳନରେ ସହଯୋଗ କରିଥିଲେ। ପ୍ରାଣୀ ଚିକିତ୍ସା ବିଭାଗର କର୍ମଚାରୀ ମାନେ ଉପସ୍ଥିତ ରହିଥିଲେ।

Comments
Loading...