ଢାକା : ବାଂଲାଦେଶରେ ଅନୁଷ୍ଠିତ ସଂସଦୀୟ ନିର୍ବାଚନରେ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ଆୱାମି ଲିଗ୍ ଦଳ ବିପୁଳ ବିଜୟ ହାସଲ କରିଛି। ୩୦୦ ଆସନ ବିଶିଷ୍ଟ ସଂସଦରେ ଏହି ଦଳ ଓ ତା’ର ସହଯୋଗୀ ଦଳଙ୍କୁ ୨୬୬ ଆସନ ମିଳିଛି। ଆୱାମି ଲିଗ୍ର ପ୍ରାର୍ଥୀମାନେ ୨୪୫ ଆସନରେ ଜିତିଥିବା ବେଳେ ଏହାର ସହଯୋଗୀ ଜାତୀୟ ପାର୍ଟିକୁ ୨୧ଟି ଆସନ ମିଳିଛି। ବାଂଲାଦେଶ ନେସନାଲିଷ୍ଟ୍ ପାର୍ଟି (ବିଏନ୍ପି) ନେତୃତ୍ୱରେ ଗଠିତ ୭ ଦଳିଆ ବିରୋଧୀ ଜାତୀୟ ଐକ୍ୟ ମେଣ୍ଟ ମାତ୍ର ୩୩ଟି ଆସନରେ ବିଜୟୀ ହୋଇଛିି। ସେଥିରୁ ବିଏନ୍ପି ପ୍ରାର୍ଥୀମାନେ ମାତ୍ର ୭ଟି ଆସନରେ ଜିତିଛନ୍ତି । ଗୋଟିଏ ଆସନରେ ଜଣେ ପ୍ରାର୍ଥୀଙ୍କ ମୃତ୍ୟୁ ଯୋଗୁଁ ନିର୍ବାଚନ ସ୍ଥଗିତ ରହିଛି ।
ଗୋପାଳଗଞ୍ଜ ସଂସଦୀୟ ଆସନରୁ ପ୍ରତିଦ୍ୱନ୍ଦ୍ୱୀତା କରିଥିବା ପ୍ରଧାନମନ୍ତ୍ରୀ ଶେଖ୍ ହସିନା ୨ଲକ୍ଷ ୨୯ ହଜାରରୁ ଅଧିକ ଭୋଟ୍ ପାଇଥିବା ବେଳେ ତାଙ୍କର ମୁଖ୍ୟ ପ୍ରତିଦ୍ୱନ୍ଦ୍ୱୀ ବିଏନ୍ପିର ପ୍ରାର୍ଥୀଙ୍କୁ ମାତ୍ର ୧୨୩ଟି ଭୋଟ୍ ମିଳିଥିବା ନିର୍ବାଚନ କମିଶନ ସୂତ୍ରରୁ ଜଣାପଡ଼ିଛି। ତେବେ ନିର୍ବାଚନ ଫଳାଫଳକୁ ଜାତୀୟ ଐକ୍ୟ ମେଣ୍ଟ ପ୍ରତ୍ୟାଖ୍ୟାନ କରିଛ। ଏକ ନିରପେକ୍ଷ କାମଚଳା ସରକାର ଅଧୀନରେ ସାନି ନିର୍ବାଚନ କରିବାକୁ ମେଣ୍ଟ ପକ୍ଷରୁ ଦାବି କରାଯାଇଛି। ରବିବାର ଅନୁଷ୍ଠିତ ନିର୍ବାଚନ ସମୟରେ ଦେଶର ବିଭିନ୍ନ ସ୍ଥାନରେ ହିଂସାକାଣ୍ଡ ଘଟି ଜଣେ ସୁରକ୍ଷାକର୍ମୀଙ୍କ ସମେତ ୧୭ ଜଣଙ୍କର ମୃତ୍ୟୁ ଘଟିଥିଲା।
