ରେମଡେସିଭିର ରପ୍ତାନି ବନ୍ଦ

ନୂଆଦିଲ୍ଲୀ : ଦେଶରେ କରୋନା ସଂକ୍ରମଣ ବଢିଚାଲିଥିବା ଦୃଷ୍ଟିରୁ କେନ୍ଦ୍ର ସରକାର ରେମଡେସିଭିର ଇଞ୍ଜେକସନ୍‌ ଓ ଇଞ୍ଜେକସନ୍‌ ପ୍ରସ୍ତୁତିର କଞ୍ଚାମାଲ ରେମଡେସିଭିର ଆକ୍ଟିଭ ଫାର୍ମାସୁଟିକାଲ ଇନଗ୍ରେଡିଏନ୍ସ (ଏପିଆଇ)ର ରପ୍ତାନିକୁ ନିଷିଦ୍ଧ କରିଛନ୍ତି। କରୋନା ସଂକ୍ରମଣ ବୃଦ୍ଧିକୁ ନେଇ ଦେଶର ବିଭିନ୍ନ ସହରରେ ରେମଡେସିିଭିରର ଅଭାବ ଦେଖାଯାଇଛି। ଇବୋଲା ଭୂତାଣୁ ସଂକ୍ରମଣର ଚିକିତ୍ସା ପାଇଁ ବ୍ୟବହାର ହେଉଥିବା ଏହି ଔଷଧ କରୋନା ଚିକିତ୍ସା ଲାଗି ମଧ୍ୟ ଉପାଦେୟ ବିବେଚିତ ହୋଇଛି। ଦେଶରେ କରୋନା ମହାମାରୀ ସ୍ଥିତି ସୁଧୁରିବା ପର୍ଯ୍ୟନ୍ତ ଏହି ନିର୍ଦେଶ ବଳବତ୍ତର ରହିବ।
କେନ୍ଦ୍ର ସରକାରଙ୍କ ପକ୍ଷରୁ ଜାରି ନିର୍ଦେଶରେ କୁହାଯାଇଛି ଯେ ରେମଡେସିଭିର ଔଷଧ ଉତ୍ପାଦନକାରୀ କମ୍ପାନୀମାନେ ୱେବସାଇଟରେ ନିଜର ମହଜୁଦକାରୀ ଓ ବିତରକଙ୍କ ବିବରଣୀ, ମହଜୁଦ ଥିବା ଷ୍ଟକ ପରିମାଣ ଦର୍ଶାଇବେ। ସେହିପରି ବଜାରରେ ଥିବା ଷ୍ଟକ ଯାଞ୍ଚ କରିବାକୁ ଡ୍ରଗ୍ସ ଇନ୍ସପେକ୍ଟରମାନଙ୍କୁ ନିର୍ଦେଶ ଦିଆଯାଇଛି। କଳାବଜାରୀ ରୋକିବାକୁ ଏହି ନିର୍ଦେଶ ଦିଆଯାଇଛି। ସେହିପରି ରାଜ୍ୟ ସ୍ବାସ୍ଥ୍ୟ ସଚିବମାନେ ଏ ସମ୍ପର୍କରେ ଡ୍ରଗ୍ସ ଇନ୍ସପେକ୍ଟରମାନଙ୍କୁ ଆବଶ୍ୟକ ନିର୍ଦେଶ ଦେବା ସହ ସ୍ଥିତିର ସମୀକ୍ଷା କରିବେ।

Comments
Loading...