ସଲାସୁତରାରେ ଚାଲିଥିଲା ଶାକୁଆ ଘାଟରୁ ବାଲି ଚାଲାଣ: ସ୍ୱତନ୍ତ୍ର ସ୍କ୍ୱାଡ଼୍‍ର ଚଢ଼ଉ, ୨ଟି ଜେସିବି ଜବତ

ବଡ଼ସାହି: ମୟୂରଭଞ୍ଜ ଜିଲା ବଡ଼ସାହି ତହସିଲ ଅଧୀନ ବୁଢ଼ାବଳଙ୍ଗ ନଦୀର ଶାକୁଆ ଘାଟରୁ ବେଆଇନ ବାଲି ଉତ୍ତୋଳନ ପୂର୍ବକ ଚୋରା ଚାଲାଣ ହେଉଥିବା ଜଣାପଡ଼ିଛି। ମୟୂରଭଞ୍ଜ ଜିଲାପାଳଙ୍କ ଦ୍ୱାରା ଗଠିତ ସ୍ୱତନ୍ତ୍ର ସ୍କ୍ୱାଡ଼୍‍ର ଛଢ଼ାଉ ପରେ ଏହା ଜଣାପଡ଼ିଛି। ଗତ ମାର୍ଚ୍ଚ ୩୧ତାରିଖରୁ ଏହି ବାଲିଖାଦାନର ଲିଜ ସମୟ ସୀମା ଅତିକ୍ରମ ହୋଇସାରିଛି। ତେବେ ସରକାରଙ୍କ ଗାଇଡ଼ଲାଇନ ଅନୁଯାୟୀ ଲିଜଧାରୀ କୁଆଡ଼େ ତାଙ୍କର ୫ବର୍ଷ ସମୟସୀମାରେ ବାଲି ଉତ୍ତୋଳନ କରିପାରି ନ ଥିଲେ। ଏଣୁ ଚୁକ୍ତିନାମା ସମୟସୀମା ବୃଦ୍ଧି ପାଇଁ ତହସିଲ କାର୍ୟ୍ୟାଳୟରେ ଆବେଦନ କରିଛନ୍ତି। ଯାହାକି ମଞ୍ଜୁରୀ ମିଳିନି। ପରନ୍ତୁ ଏହି ସମୟ ସୀମା ମଧ୍ୟରେ ଉକ୍ତ ବାଲିଖାଦାନରୁ ବେଆଇନ ବାଲି ଉତ୍ତୋଳନ ପୂର୍ବ ୩ଟି ସ୍ଥାନରେ ମହଜୁଦ ରଖାଯିବା ସାଙ୍ଗକୁ ବାରିପଦା ସହରକୁ ପ୍ରତ୍ୟେହ ଚୋରାଚାଲାଣ ହେଉଥିଲା।

ସ୍ଥାନୀୟ ତହସିଲ କାର୍ୟ୍ୟାଳୟର ଜନୈକ କର୍ମଚାରୀ ଚାଲାଣକାରୀଙ୍କୁ ସରକାରୀ ନିୟମର ଗଳାବାଟ ଦ୍ୱାରା ସୁରକ୍ଷା ପ୍ରଦାନ କରୁଥିବା ନେଇ ତହସିଲଦାରଙ୍କ ନିକଟରେ ଅଭିଯୋଗ ସ୍ୱତ୍ତେ କାର୍ୟ୍ୟାନୁଷ୍ଠାନ ଶୂନ ହେବାରୁ ଅଭିଯୋଗକାରୀ ସମସ୍ତ ଘଟଣାର ପ୍ରମାଣ ସହିତ ଜିଲା ପ୍ରଶାସନର ନଜରକୁ ଆଣିଥିଲେ। ତଦନୁଯାୟୀ ମଙ୍ଗଳବାର ସକାଳେ ସ୍କ୍ୱାଡ଼୍‍ ପକ୍ଷରୁ ଚଢ଼ାଉ ହୋଇଥିଲା। ମହଜୁଦ ବାଲି ଡ଼ିପ ନିକଟରେ ୨ଟି ଜେସିବି ମେସିନକୁ ସେମାନେ ଜବତ କରିବା ସହିତ ଲକ୍ଷାଧିକ ଟଙ୍କା ଜୋରିମାନା ପାଇଁ ଧାର୍ୟ୍ୟ କରିଥିବା ଜଣାପଡ଼ୁଛି। ତେବେ ଜେସିବି ଗୁଡ଼ିକୁ ରିପୋର୍ଟ ଲେଖାଯିବା ପର୍ୟ୍ୟନ୍ତ ପୁଲିସକୁ ଦିଆଯାଇନି। ସେହିପରି ୩ଟି ସ୍ଥାନରେ ମହଜୁଦ ଥିବା ବାଲି ଡ଼ିପୋକୁ ମଧ୍ୟ ଜବତ କରାଯାଇନି କିମ୍ବା ବାଲିଖାଦାନରେ ୧୪୪ଧାରା ଜାରି ହୋଇନି। ନିୟମ ଅନୁଯାୟୀ ସରକାରୀ ଭାବେ ବାଲି ଉତ୍ତୋଳନ ହୋଇଥିବା ବାଲି ମପାଯାଇ ଚାଲାଣକାରଙ୍କ ବିରୋଧରେ ଜୋରିମାନା କରାଯିବା କଥା। ସେ ସବୁ ବଡ଼ସାହି ତହସିଲ ପରିବର୍ତ୍ତେ ଅନ୍ୟ ତହସିଲ କର୍ମଚାରୀଙ୍କ ଦ୍ୱାରା କରାଗଲେ ପ୍ରକୃତ ଚୋରି ଜଣାପଡ଼ିବା ସହିତ କ୍ଷତି ହୋଇଥିବା ବିପୁଳ ରାଜସ୍ୱ ସରକାରୀ ତହବିଲକୁ ଫେରିପାରନ୍ତା। ଜିଲାପାଳ ଏଥିପ୍ରତି ଦୃଷ୍ଟି ଦେବା ଜରୁରୀ।

Comments
Loading...