ଗ୍ରାମବାସୀଙ୍କ ବିରୋଧ, ଶ୍ମଶାନରୁ ଫେରିଗଲା ଶବ

କରୋନା ଜନିତ ମୃତ୍ୟୁ ସନ୍ଦେହ

ବାଲେଶ୍ବର: ଗ୍ରାମବାସୀଙ୍କ ବିରୋଧ ଯୋଗୁ ଜଣେ ବ୍ୟକ୍ତିଙ୍କ ଶବ ସତ୍କାର କରାଯାଇ ପାରିନାହିଁ ଓ ତାଙ୍କର ଶବକୁ ଶ୍ମଶାନରୁ ଫେରାଇ ଦିଆଯାଇଛି।
ମହାମାରୀ କରୋନା ସମଗ୍ର ବିଶ୍ୱରେ କାୟା ବିସ୍ତାର କରିବା ସହିତ ତାର ଭୟାବହତା ଲୋକଙ୍କ ଭିତରେ ଛାଇ ହୋଇ ରହିଛି। କରୋନା ସନ୍ଦେହରେ ଗ୍ରାମରେ ଶବ ପୋତିବାକୁନେଇ ଉତ୍ତେଜନା ଦେଖିବାକୁ ମିଳିଛି। ଏଭଳି ଏକ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ସିମୁଳିଆ ଥାନା ଖୀରକୋଣା ପଞ୍ଚାୟତର ମଝିଖଣ୍ଡି ଗ୍ରାମରେ। ଗ୍ରାମର ସୁରେଶ ମହାନ୍ତି (୩୧) ଅହମ୍ମଦାବାଦରେ ଏକ ଘରୋଇ ସୁତା କମ୍ପାନୀରେ କରୁଥିଲେ। ନିଜ ଗ୍ରାମକୁ ଫେରୁଥିବା ବେଳେ ବାଟରେ ତାଙ୍କର କୌଣସି କାରଣରୁ ମୃତ୍ୟୁ ଘଟିଥିଲା। ଫଳରେ ଏକ ଆମ୍ବୁଲେନ୍ସ ଯୋଗେ ତାଙ୍କର ମୃତ ଶରୀରକୁ ଗ୍ରାମକୁ ଅଣାଯାଇଥିଲା। ନିଜ ଗ୍ରାମରେ ଶବକୁ ନ ପୋତି ପଡୋଶୀ ଗ୍ରାମ ନହରଣପୁର ଭାଗିଆବନ୍ଧ ଠାରେ ପ୍ରଶାସନ ମାଧ୍ୟମରେ ଡୋଜର ସାହାଯ୍ୟରେ ପୋତିବାକୁ ଉଦ୍ୟମ କରାଯାଇଥିଲା। ଫଳରେ ଏହାକୁ ଗ୍ରାମବାସୀମାନେ ବିରୋଧ କରିଥିଲେ। ଗ୍ରାମବାସୀମାନେ ବିରୋଧ କରିବା ପରେ ସେଠାରେ ଉତ୍ତେଜନା ଦେଖା ଦେଇଥିଲା। ଏହାପରେ ଭୟରେ ଆମ୍ବୁଲାନ୍ସଟି ଶବକୁ ଧରି ବାଲେଶ୍ୱର ଫେରିଯାଇଥିବା ଜଣାପଡିଛି।