ବାଲେଶ୍ୱର ସଦର ଏବଂ ତିର୍ତ୍ତୋଲରେ ଗତକାଲି ଅନୁଷ୍ଠିତ ଉପନିର୍ବାଚନରେ ମତଦାନ ହାର ୨୦୧୯ ସାଧାରଣ ନିର୍ବାଚନର ମତଦାନ ହାର ଠାରୁ ସାମାନ୍ୟ କମ ରହିଥିଲେ ମଧ୍ୟ ରେକର୍ଡ ସଂଖ୍ୟକ ମତଦାନ ହୋଇଥିବା ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁଶୀଲ କୁମାର ଲୋହାନି କହିଛନ୍ତି। ଆଜି ଗଣମାଧ୍ୟମକୁ ସୂଚନା ଦେଇ ସେ କହିଛନ୍ତି ଯେ ଗତକାଲି ଅନୁଷ୍ଠିତ ଉପ-ନିର୍ବାଚନରେ ବାଲେଶ୍ୱରରେ ୭୦.୬୯ ପ୍ରତିଶତ ଏବଂ ତିର୍ତ୍ତୋଲରେ ୬୯.୬୬ ପ୍ରତିଶତ ମତଦାନ ହୋଇଛି। ୨୦୧୯ ସାଧାରଣ ନିର୍ବାଚନରେ ଭୋଟରଙ୍କ ସଂଖ୍ୟା ବାଲେଶ୍ୱରରେ ୭୧.୨୯ ପ୍ରତିଶତ ଏବଂ ତିର୍ତ୍ତୋଲରେ ୭୪.୦୯ ପ୍ରତିଶତ ଥିଲା। ଲୋହାନୀ କହିଛନ୍ତି ଯେ ଏହି ଉପନିର୍ବାଚନ ପ୍ରକ୍ରିୟାରେ ସମସ୍ତେ କୋଭିଡ ନିର୍ଦ୍ଦେଶାବଳୀ ଅନୁସରଣ କରିବା ଫଳରେ ଅଧିକ ସଂଖ୍ୟାରେ ଭୋଟର ମତଦାନ ପାଇଁ ଆସିଥିଲେ।
ଏହି ନିର୍ବାଚନରେ ତିର୍ତ୍ତୋଲରେ ୩ ହଜାର ୧୯୩ ଜଣ ଓ ବାଲେଶ୍ୱରରେ ୧ ହଜାର ୬୩୧ ଜଣ ଭୋଟର ସ୍ୱତନ୍ତ୍ର ମତଦାନ ଦଳ ମାଧ୍ୟମରେ ନିଜ ଘରେ ଭୋଟ୍ ଦେଇଛନ୍ତି। ସେମାନଙ୍କ ମଧ୍ୟରୁ ତିର୍ତ୍ତୋଲରେ ୧୦୪ ଓ ବାଲେଶ୍ୱରରେ ୬ ଜଣ ଭୋଟର କୋଭିଡ ସଂକ୍ରମିତ ଥିଲେ। ଏହା ବ୍ୟତୀତ ତିର୍ତ୍ତୋଲରେ ଏକାନ୍ତଵାସରେ ଥିବା ୨୧ ଜଣ କୋଭିଡ୍ ସଂକ୍ରମିତ, ଦୁଇ ଜଣ କୋଭିଡ୍ ସନ୍ଦିଗ୍ଧ ଏବଂ କୋଭିଡ ହସ୍ପିଟାଲରେ ଭର୍ତ୍ତି ହୋଇଥିବା ଜଣେ ସଂକ୍ରମିତ ମତଦାନ କରିଥିଲେ। ସେହିଭଳି ବାଲେଶ୍ୱରରେ ୨୩ ଜଣ କୋଭିଡ ପଜିଟିଭ ରୋଗୀ ଏବଂ ପାଞ୍ଚଜଣ କୋଭିଡ ସନ୍ଦିଗ୍ଧଙ୍କୁ ଭୋଟ୍ ଦେବାକୁ ଅନୁମତି ଦିଆଯାଇଥିଲା।
ଶାନ୍ତିପୂର୍ଣ୍ଣ ମତଦାନର ପାଇଁ ମୁଖ୍ୟ ନିର୍ବାଚନ ଅଧିକାରୀ ସମସ୍ତ ଅଧିକାରୀ, କର୍ମଚାରୀ, ସୁରକ୍ଷା ଅଧିକାରୀ ଏବଂ ଭୋଟରଙ୍କୁ ଧନ୍ୟବାଦ ଜଣାଇଛନ୍ତି। ଶ୍ରୀ ଲୋହାନି କହିଛନ୍ତି ଯେ ମତଦାନ ଶେଷ ହେବା ପରେ ଇଭିଏମଗୁଡିକୁ ସୁରକ୍ଷିତ କୋଠରୀରେ ରଖାଯାଇଛି ଏବଂ ରାଜ୍ୟ ସଶସ୍ତ୍ର ପୁଲିସ ଜଗି ରହିଛନ୍ତି। ସେ କହିଛନ୍ତି ଯେ ଇଭିଏମ ଥିବା କୋଠରୀଗୁଡ଼ିକ ସିସିଟିଭି ନଜରରେ ରଖାଯାଇଛି।
Comments are closed.