ବଲାଙ୍ଗିର:‘ରାଇଡୁ’ ପକ୍ଷରୁ ଆୟୋଜିତ ଶିଶୁ କିଶୋର ଆନ୍ତର୍ଜାତୀୟ ଅନଲାଇନ ଚିତ୍ରାଙ୍କନ ପ୍ରତିଯୋଗିତାରେ ସର୍ବଶ୍ରେଷ୍ଠ ୫ଜଣଙ୍କ ମଧ୍ୟରେ ବଲାଙ୍ଗିରର ସବ୍ୟସାଚୀ ନାୟକ ସ୍ଥାନ ପାଇଛନ୍ତି। ଏହି ପ୍ରତିଯୋଗିତାର ବିଷୟବସ୍ତୁ ସେ ‘ସଂସ୍କୃତି ଓ ଐତିହ୍ୟ’ ଅନୁଯାୟୀ ସମ୍ବଲପୁରୀ ବସ୍ତ୍ର, ନୃତ୍ୟ ଓ ମା’ ସମଲେଇଶ୍ୱରୀଙ୍କ ଚିତ୍ର ଆଙ୍କିଥିଲେ। ଭାରତ ସମେତ ୮ଟି ଦେଶର ୫୩ଜଣ ପ୍ରତିଯୋଗୀଙ୍କ ମଧ୍ୟରୁ ଶ୍ରେଷ୍ଠ ୫ଜଣଙ୍କ ମଧ୍ୟରେ ଯୋଗ୍ୟ ବିବେଚିତ ହେବା ବିଷୟ ସୂଚନା ମିଳିବାପରେ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟିଛି। ବଲାଙ୍ଗିର ଓଁକାର ନାୟକ ଓ କ୍ଷଣପ୍ରଭା ପାଣିଗ୍ରାହୀଙ୍କ ପୁତ୍ର ସବ୍ୟସାଚୀ ପିଲାଟି ଦିନରୁ କଳାପ୍ରତି ରୁଚି ରଖିଛନ୍ତି। ଖଡିଆଳ କେନ୍ଦ୍ରୀୟ ବିଦ୍ୟାଳୟରେ ସପ୍ତମ ଶ୍ରେଣୀରେ ପଢୁଥିବା ସବ୍ୟସାଚୀ ବିଦ୍ୟାଳୟର ଅନ୍ୟ ସହଶୈକ୍ଷିକ କାର୍ଯ୍ୟକ୍ରମ ସ୍କାଉଟ,ବକ୍ତୃତା,ପ୍ରବନ୍ଧ ଓ ନୃତ୍ୟ ଆଦିରେ ଯୋଗଦାନ କରି ଜିଲା ଓ ରାଜ୍ୟସ୍ତରରେ ପୁରସ୍କୃତ ହୋଇଛନ୍ତି। ଏହା ସହ ବିଭିନ୍ନ ଅନୁଷ୍ଠାନରୁ ପ୍ରଶଂସିତ ମଧ୍ୟ ହୋଇଛନ୍ତି। ତାଙ୍କର ଏହି କୃତିତ୍ୱ ପାଇଁ ସବ୍ୟସାଚୀ ତାଙ୍କର ପରିବାରବର୍ଗ, ଗୁରୁଜୀ ଓ ସ୍କୁଲର ସମସ୍ତ ଶିକ୍ଷକ ଓ ଶିକ୍ଷୟିତ୍ରୀଙ୍କୁ ଶ୍ରେୟ ଦେଇଛନ୍ତି।
Comments are closed.