ବଡ଼ସାହି: ମୟୂରଭଞ୍ଜ ଜିଲା ବଡ଼ସାହି ଥାନା ଅନ୍ତର୍ଗତ କୋଚିଲାଖୁଂଟା ବିଦ୍ୟୁତ ସବଷ୍ଟେସନକୁ ସଂଯୋଗ କରୁଥିବା ୩୩କେଭି ତାର ଆଘାତରେ ଶୁକ୍ରବାର ଜଣେ ମହିଳା ଗୁରୁତର ହୋଇଛନ୍ତି । ଆହତ ମହିଳା ଜଣକ ପାଇକପଡା ଗ୍ରାମର ବେବୀ ନାଏକ । ତାଙ୍କୁ ଗୁରୁତର ଅବସ୍ଥାରେ ବଡସାହି ଡାକ୍ତରଖାନାରେ ଭର୍ତ୍ତି କରାଯାଇଛି । ଏହାକୁ ନେଇ ସ୍ଥାନୀୟ ଅଂଚଳରେ ଉତ୍ତେଜନା ପ୍ରକାଶ ପାଇବା ସହିତ ବଡସାହି-ବେତନଟୀ ରାସ୍ତା କୋଚିଲାଖୁଂଟାରେ ସ୍ଥାନୀୟ ଲୋକେ ଟାୟାର ଜାଳି ରାସ୍ତା ଅବରୋଧ କରିଛନ୍ତି ।
ସୂଚନାଯୋଗ୍ୟ ଯେ, ମହିଳା ଜଣକ ବିଲକୁ କାମ କରିବା ପାଇଁ ମୁଣ୍ଡରେ ପାଣି ଭର୍ତ୍ତି ଜାର ନେଇ ଯାଉଥିବା ସମୟରେ ୩୩କେଭି ତାର ମୁଣ୍ଡରେ ଲାଗିଥିଲା । ଫଳରେ ସେ ଘଟଣା ସ୍ଥଳରେ ପଡିଯାଇ ଗୁରୁତର ଆହତ ହୋଇଥିଲେ । ସ୍ଥାନୀୟ ଲୋକ ତାଙ୍କୁ ଉଦ୍ଧାର କରି ଏକ ଅଟୋ ଯୋଗେ ବଡସାହି ଡାକ୍ତରଖାନାରେ ଭର୍ତ୍ତି କରିଥିଲେ। ତାଙ୍କ ସ୍ବାସ୍ଥ୍ୟାବସ୍ଥା ଗୁରୁତର ଥିବା ଜଣାପଡିଛି। ତେବେ ବିଦ୍ୟୁତ ବିଭାଗର ଅବହେଳା ପାଇଁ ଦୀର୍ଘ ଦିନ ଧରି ୩୩କେଭି ବିଦ୍ୟୁତ ତାର ଓହଳି ରହିଛି । ମାଟି ଉପରୁ ମାତ୍ର ୫ଫୁଟ ଉପରେ ରହିଥିବାରୁ ଏପରି ଅଘଟଣ ଘଟିଥିବା ଅଭିଯୋଗ ହୋଇଛି। ଏହାକୁ ନେଇ ଉତ୍ତ୍ୟକ୍ତ ଲୋକେ ବଡ଼ସାହି-ବେତନଟୀ ରାସ୍ତା କୋଚିଲାଖୁଂଟା ସବଷ୍ଟେସନ ପାର୍ଶ୍ବ ରାସ୍ତାକୁ ଅବରୋଧ କରିଛନ୍ତି । ବହୁ ଯାନବାହାନ ଯାତାୟାତ କରିନପାରି ଅଟକି ରହିଛନ୍ତି । ଖବରପାଇ ବଡସାହି ଥାନାଧିକାରୀ ଜୟନାରାୟଣ ଖଣ୍ଡେଇ ଓ ବେତନଟୀ ଏସଡିପିଓ ଘଟଣା ସ୍ଥଳରେ ପହଂଚି ଉତ୍ତ୍ୟକ୍ତ ଲୋକଙ୍କୁ ବୁଝାସୁଝା କରୁଛନ୍ତି । ବିଭାଗୀୟ ଅଧିକାରୀ ଘଟଣା ସ୍ଥଳରେ ପହଂଚି ନଥିବାରୁ ଅସନ୍ତୋଷ ବୃଦ୍ଧି ପାଇଛି ।
