ବଡ଼ସାହି : ନବଜ୍ୟୋତି ଯୁବକସଂଘ ଆନୁକୂଲ୍ୟରେ ଦେଉଳିଆ ଠାରେ ଅନୁଷ୍ଠିତ ୨୦ତମ ଲକ୍ଷ୍ମୀପୂଜା ଓ କୁମାର ଉତ୍ସବ ସମାରୋହ ଗୁରୁବାର ରାତିରେ ଉଦ୍ଯାପିତ ହୋଇଯାଇଛି। କୁମାର ଉତ୍ସବ ସମାରୋହରେ ମୁଖ୍ୟଅତିଥି ଭାବେ ବଡ଼ସାହି ବିଧାୟକ ଗଣେଶ୍ୱର ପାତ୍ର, ସମ୍ମାନିତ ଅତିଥି ଭାବେ ପ୍ରାକ୍ତନ ଶିକ୍ଷକ ହାଡିବନ୍ଧୁ ମହାପାତ୍ର ଓ ସନ୍ତୋଷ କୁମାର ବେହେରା ପ୍ରମୁଖ ଉପସ୍ଥିତ ରହି ଆଧୁନିକତାର ଛାପରେ କୁମାର ଉତ୍ସବର ମହତ୍ତ୍ୱ ଧିରେ ଧିରେ ଲୋପ ପାଇବାକୁ ବସୁଥିବା ବେଳେ ୨୦ବର୍ଷ ଧରି କ୍ଳବ ପକ୍ଷରୁ ଚାଲିଥିବା କାର୍ଯ୍ୟକ୍ରମ ପାଇଁ ସାଧୁବାଦ ଜଣାଇଥିଲେ। ଏହି ଅବସରରେ ଦେଉଳିଆ ଗ୍ରାମର ଡାକ୍ତରୀ ଛାତ୍ର ଅମ୍ବୁଯାକ୍ଷ ବେହେରା ଓ ଡାକ୍ତର ଭାବେ ଅର୍ଚ୍ଚନା ସିଂଙ୍କୁ ଅତିଥିମାନେ ମାନପତ୍ର, ପୁଷ୍ପଗୁଚ୍ଛ ଓ ଟ୍ରଫି ଦେଇ ସମ୍ବର୍ଦ୍ଧିତ କରିଥିଲେ। ଉଭୟ ଦୁଇ ଡାକ୍ତର ଛାତ୍ରଛାତ୍ରୀ ଗରିବ ଲୋକଙ୍କ ପାଇଁ ସେବା ଯୋଗାଇ ଦେବେ ବୋଲି ନିଜ ପ୍ରତିକ୍ରିୟାରେ ପ୍ରକାଶ କରିଥିଲେ। ସେହିପରି ଦେଉଳିଆ ହାଇସ୍କୁଲରୁ ମେଟ୍ରିକ ପରୀକ୍ଷାରେ ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇଥିବା ୧୦ଜଣ ମେଧାବୀ ଛାତ୍ରଛାତ୍ରୀଙ୍କୁ ମଧ୍ୟ ସମ୍ମାନିତ କରାଯାଇଥିଲା। କାର୍ଯ୍ୟକ୍ରମରେ ସଂଘର ସଭାପତି ନିହାର ରଞ୍ଜନ ମହାପାତ୍ର ସଭାପତିତ୍ୱ କରିଥିବା ବେଳେ ସମ୍ପାଦକ ଅନଙ୍ଗ ଭୂଷଣ ସଦୁଆଳ ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ। କ୍ଲବର ସଦସ୍ୟ ବ୍ରହ୍ମାନନ୍ଦ ସଦୁଆଳ ଓ ହରିଶଙ୍କର ମହାପାତ୍ରଙ୍କ ସମେତ ସମସ୍ତ ସଦସ୍ୟ ଏଥିରେ ସହଯୋଗ କରିଥିଲେ। ଏହି ଅବସରରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା।
