ଆଠଗଡ଼/ବଡ଼ମ୍ବା : ଆଠଗଡ଼ ବନଖଣ୍ଡ ଅଧୀନ ବଡ଼ମ୍ବା ବନାଞ୍ଚଳରେ ୩ଟି ହାତୀ କଙ୍କାଳ ଉଦ୍ଧାର ଏବଂ ନରସିଂହପୁର ପୂର୍ବ ବନାଞ୍ଚଳରେ ଶିକାରୀଙ୍କ ଗୁଳିମାଡ଼ରେ ଦନ୍ତାହାତୀ ମୃତ୍ୟୁ ଘଟଣାରେ କେନ୍ଦ୍ର ସରକାରଙ୍କ ପକ୍ଷରୁ ଉଚ୍ଚସ୍ତରୀୟ ତଦନ୍ତ ଆରମ୍ଭ ହୋଇଛି। କେନ୍ଦ୍ର ଜଙ୍ଗଲ ଓ ପରିବେଶ ମନ୍ତ୍ରଣାଳୟର ନିର୍ଦେଶକ୍ରମେ ମଧ୍ୟପ୍ରଦେଶର ଜବଲପୁରରୁ ବନ୍ୟଜନ୍ତୁ ଅପରାଧ ନିୟନ୍ତ୍ରଣ ବ୍ୟୁରୋର ଦୁଇ ଜଣିଆ ପ୍ରତିନିଧି ଆଠଗଡ଼ରେ ପହଞ୍ଚିଛନ୍ତି। ଦଳର ନିରୀକ୍ଷକ କୌଶିକ ମଣ୍ଡଳଙ୍କ ନେତୃତ୍ୱରେ ତଦନ୍ତ ଜାରି ରହିଛି। ସେମାନେ ବନଖଣ୍ଡ କାର୍ଯ୍ୟାଳୟରେ ହାତୀ ମୃତ୍ୟୁ ଓ କଙ୍କାଳ ମିଳିବା ଘଟଣାର କାଗଜପତ୍ର ଯାଞ୍ଚ କରିବା ପରେ ବଡ଼ମ୍ବା ବନାଞ୍ଚଳର ଯେଉଁସ୍ଥାନରୁ ୩ଟି ହାତୀ କଙ୍କାଳ ଉଦ୍ଧାର ହୋଇଥିଲା ସେସବୁ ସ୍ଥାନକୁ ଯାଇ ପ୍ରାଥମିକ ତଦନ୍ତ କରିଛନ୍ତି। ଏହି ପ୍ରତିନିଧିଙ୍କ ସହିତ ଆଠଗଡ଼ ବନଖଣ୍ଡ ସହକାରୀ ଅଧିକାରୀ (ଏସିଏଫ୍) ଘନଶ୍ୟାମ ମୁଦୁଲି ଉପସ୍ଥିତ ଥିଲେ। ତଦନ୍ତ ସମ୍ପୂର୍ଣ୍ଣ ହୋଇନାହିଁ ଏବଂ ଆହୁରି ବିଭିନ୍ନ ଦିଗରୁ ପୁଙ୍ଖାନୁପୁଙ୍ଖ ତଦନ୍ତ କରାଯିବ ବୋଲି ସେମାନେ କହିଛନ୍ତି। ତେବେ ଦୁଇ ଅଧିକାରୀ ତଦନ୍ତର ଅଗ୍ରଗତି ସମ୍ପର୍କରେ କୌଣସି ମତାମତ ଦେବା ପାଇଁ ଅନିଚ୍ଛା ପ୍ରକାଶ କରିଥିଲେ। ତଦନ୍ତ ରିପୋର୍ଟ ସେମାନେ ସେମାନଙ୍କର ସଂସ୍ଥା ମାଧ୍ୟମରେ ସରକାରଙ୍କୁ ପ୍ରଦାନ କରିବେ ବୋଲି ଜଣାପଡ଼ିଛି।
Comments are closed.