ଅମ୍ଳଜାନ ସିଲିଣ୍ଡର କାନ୍ଧରେ ପକାଇ ରୋଗୀଙ୍କୁ ଅଲଟ୍ରାସାଉଣ୍ଡ ସେଣ୍ଟରକୁ ନେଲେ ସମ୍ପର୍କୀୟ
ଆଗ୍ରା: ଦେଶର ବିଚିତ୍ର ସ୍ବାସ୍ଥ୍ୟ ବ୍ୟବସ୍ଥାର ନଗ୍ନ ନମୁନା ପୁଣି ଥରେ ଲୋକଲୋଚନକୁ ଆସିଛି। ହସ୍ପିଟାଲରେ ଚିକିତ୍ସାଧୀନ ରୋଗୀ ଏବଂ ପରିବାର କିପରି ସ୍ଥିତି ଦେଇ ଗତି କରୁଛନ୍ତି ତାହାର ଏକ ଲଜ୍ଜାଜନକ ଚିତ୍ର ଯୋଗୀ ଆଦିତ୍ୟନାଥ ସରକାରଙ୍କ ରାଜ୍ୟରେ ଦେଖିବାକୁ ମିଳିଛି। ଏଠାରେ ରୋଗୀଙ୍କ ସମ୍ପର୍କୀୟ କାନ୍ଧରେ ଅମ୍ଳଜାନ ସିଲିଣ୍ଡର ପକାଇ ରୋଗୀଙ୍କୁ ଅଲଟ୍ରାସାଉଣ୍ଡ କରିବାକୁ ନେଉଛନ୍ତି। ଏପରି ଏକ ଦୃଶ୍ୟ ଦେଖିବାକୁ ମିଳିଛି ଉତ୍ତରପ୍ରଦେଶର ଆଗ୍ରାସ୍ଥିତ ସରୋଜିନୀ ନାଇଡୁ ମେଡିକାଲ କଲେଜ ଆଣ୍ଡ ହସ୍ପିଟାଲରେ।
ବରହନ ଅଞ୍ଚଳର ନଗଲା ବେଲ ନିବାସୀ ଲଳିତା ମେଡିକାଲର ଯକ୍ଷ୍ମା ୱାର୍ଡରେ ଚିକିତ୍ସିତ ହେଉଛନ୍ତି। ଶୁକ୍ରବାର ଡାକ୍ତରମାନେ ତାଙ୍କୁ ଅଲଟ୍ରାସାଉଣ୍ଡ କରିବାକୁ ପଠାଇଥିଲେ। ଯକ୍ଷ୍ମା ୱାର୍ଡରୁ ଅଲଟ୍ରାସାଉଣ୍ଡ ସେଣ୍ଟରର ଦୂରତା ପାଖାପାଖି ୫୦୦ ମିଟର ହେବ। ତେବେ ରୋଗୀଙ୍କଠାରେ ଅମ୍ଳଜାନ ସିଲିଣ୍ଡର ଲାଗିଥିବାରୁ ଅଲଟ୍ରାସାଉଣ୍ଡ ସେଣ୍ଟର ପର୍ଯ୍ୟନ୍ତ ଯିବା ଲାଗି କୌଣସି ଷ୍ଟ୍ରେଚର ବ୍ୟବସ୍ଥା କରାଯାଇ ନ ଥିଲା। ତେଣୁ ରୋଗୀଙ୍କ ସମ୍ପର୍କୀୟ କାନ୍ଧରେ ଅମ୍ଳଜାନ ସିଲିଣ୍ଡର ରଖି ରୋଗୀଙ୍କୁ ହାତରେ ଧରି ଧରି ନେଇଥିଲେ। ଅଧାବାଟରେ ହଠାତ ଅମ୍ଳଜାନ କମି ଯାଇଥିଲା। ତେଣୁ ସାଥୀରେ ଥିବା ଜଣେ ଆୟା ଇଟାରେ ଅମ୍ଳଜାନ ସିଲିଣ୍ଡର ଚାବିକୁ ପିଟି ଖୋଲିଥିଲେ। ଏଭଳି ଦୃଶ୍ୟକୁ ଜଣେ ବ୍ୟକ୍ତି କ୍ୟାମେରାରେ କଏଦ କରିଥିଲେ।
ଏ ସମ୍ପର୍କରେ ମେଡିକାଲ କଲେଜ ଅଧ୍ୟକ୍ଷ ଡା. ଜି.କେ. ଅନେଜାଙ୍କୁ ପଚାରିବାରୁ ସେ କହିଲେ, ସମସ୍ତ ୱାର୍ଡ ଏବଂ ଓପିଡିରେ ଷ୍ଟ୍ରେଚର ରହିଛି। ରୋଗୀଙ୍କୁ କାହିଁକି ଷ୍ଟ୍ରେଚର ମିଳିଲାନି ତାହାର ଯାଞ୍ଚ କରିବି।
Comments are closed.