ଆଠଗଡ଼: ଆଠଗଡ଼ ଉପଖଣ୍ଡ ଡାକ୍ତରଖାନାରେ ଏକ ନୂତନ ଔଷଧ ଭଣ୍ଡାର ଗୃହ ନିର୍ମାଣ ଲାଗି ମଙ୍ଗଳବାର ପବିତ୍ର ହେରାପଞ୍ଚମୀ ତିଥିରେ ଭିତ୍ତି ପ୍ରସ୍ତର ସ୍ଥାପନ କରାଯାଇଛି। ଡାକ୍ତରଖାନା ଅଧିକ୍ଷକ ଡାକ୍ତର ବିଜୟ କୁମାର ମିଶ୍ରଙ୍କ ପୌରୋହିତ୍ୟରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଏନଏସି ନଗରପାଳ ସସ୍ମିତା ରାଉତ ମୁଖ୍ୟଅତିଥି ରୂପେ ଯୋଗଦେଇ ନୂତନ ଭଣ୍ଡାର ଗୃହ ପାଇଁ ଭିତ୍ତି ପ୍ରସ୍ତର ସ୍ଥାପନ କରିବା ସହିତ ଉଦ୍ବୋଧନ ଦେଇ ସ୍ୱାସ୍ଥ୍ୟସେବାକୁ ଅଧିକ ଲୋକାଭିମୁଖୀ କରିବା ପାଇଁ ସ୍ଥାନୀୟ ବିଧାୟକ ତଥା ମନ୍ତ୍ରୀ ସର୍ବାଧିକ ଗୁରୁତ୍ୱ ଦେଇଆସିଛନ୍ତି ବୋଲି ମତବ୍ୟକ୍ତ କରିଥିଲେ। ଆଠଗଡ଼ ଡାକ୍ତରଖାନାକୁ ଏକ ଜିଲ୍ଲାସ୍ତରୀୟ ଡାକ୍ତରଖାନା ପରି ଗଢିତୋଳିବା ପାଇଁ ଏବଂ ଉନ୍ନତ ସ୍ୱାସ୍ଥ୍ୟସେବା ଯୋଗାଇ ଦେବା ପାଇଁ ସମସ୍ତ ପଦକ୍ଷେପ ଗ୍ରହଣ କରାଯାଉଥିବା ନଗରପାଳ ଶ୍ରୀମତୀ ରାଉତ ପ୍ରକାଶ କରିଥିଲେ।
ଏଥିରେ ସମ୍ମାନିତ ଅତିଥି ଭାବେ ଉପନଗରପାଳ ବି ଶୁଭ୍ରଶଙ୍କର ଜ୍ୟୋତି, ୧୪ନଂ ୱାର୍ଡ ପରିଷଦ ଉମେଶ ଚନ୍ଦ୍ର ସେଠୀ, ରୋଗୀ କଲ୍ୟାଣ ସମିତି ସଭ୍ୟ ରାକେଶ ଦାଶ, ସନାତନ ରାୟ, ଯୁବ ସମାଜସେବୀ ପ୍ରକାଶ ରାଉତ ପ୍ରମୁଖ ଯୋଗଦେଇଥିଲେ। ଏହି ଔଷଧ ଭଣ୍ଡାର ପାଇଁ ୨୨ଲକ୍ଷ ଟଙ୍କା ବ୍ୟୟବରାଦ କରାଯାଇଥିବା ପୂର୍ତ୍ତବିଭାଗ ସହକାରୀ ଯନ୍ତ୍ରୀ ପ୍ରଭାତ କୁମାର ବେହେରାଙ୍କ ସୁତ୍ରରୁ ପ୍ରକାଶ।
Comments are closed.