ଆଠଗଡରେ ଆରମ୍ଭ ହେଲା କରୋନା ଆଣ୍ଟିଜେନ ଟେଷ୍ଟ

ଆଠଗଡ: ଆଠଗଡ ଉପଖଣ୍ଡ ଡାକ୍ତରଖାନାରେ ଶନିବାର ଠାରୁ କରୋନା ଆକ୍ରାନ୍ତ ଚିହ୍ନଟ ପାଇଁ ଆଣ୍ଡିଜେନ ଟେଷ୍ଟର ଶୁଭାରମ୍ଭ ହୋଇଛି। ଡାକ୍ତରଖାନା ଅଧିକ୍ଷକ ଡାକ୍ତର ବିଜୟ କୁମାର ମିଶ୍ର ଏହାକୁ ଉଦ୍‍ଘାଟନ କରିଥିଲେ। ଏବେ ଆଠଗଡ ଅଞ୍ଚଳରେ କରୋନା ଆକ୍ରାନ୍ତଙ୍କୁ ଚିହ୍ନଟ କରିବାରେ ଏହି ଆଣ୍ଡିଜେନ ଟେଷ୍ଟ ପ୍ରକ୍ରିୟା ସହାୟକ ହେବ ବୋଲି ପ୍ରକାଶ କରିଥିଲେ। ଶନିବାର ପ୍ରଥମ ଦିନରେ ୧୨ଜଣଙ୍କର ସ୍ୱାବ୍‍ ସଂଗୃହିତ ହୋଇ ଆଣ୍ଡିଜେନ ଟେଷ୍ଟ ପରୀକ୍ଷା ପାଇଁ ପଠାଯାଇଥିବାବେଳେ ରବିବାର ଏହାର ରିପୋର୍ଟ ମିଳିବ ବୋଲି ଅଧିକ୍ଷକ ଡାକ୍ତର ମିଶ୍ରଙ୍କ ସୁତ୍ରରୁ ପ୍ରକାଶ। ଡାକ୍ତରଖାନା ପରିଚାଳକ ପୂଜାଲିନ ରାଉତ ଓ ଡାକ୍ତର ଦେବଦଳନ ସେଠୀଙ୍କ ପରିଚାଳନାରେ ଆୟୋଜିତ ଏହି କାର୍ୟ୍ୟକ୍ରମରେ ତାଲିମପ୍ରାପ୍ତ ଲାବୋରାଟୋରୀ ଟେକ୍ନିସିଆନ ସୁକାନ୍ତ କୁମାର ସେଠୀ ପିପିଇ କିଟ ପରିଧାନ କରି ସତର୍କତା ଅବଲମ୍ବନ ପୂର୍ବକ ଲୋକଙ୍କର ସ୍ୱାବ୍‍ ଆଣ୍ଟିଜେନ ଟେଷ୍ଟ ପାଇଁ ସଂଗ୍ରହ କରିଥିଲେ। ଆଣ୍ଟିଜେନ ଟେଷ୍ଟ ପାଇଁ ସ୍ୱାବ୍‍ ସଂଗ୍ରହ କରାଯାଉଥିବା କକ୍ଷ ଓ ଉକ୍ତ ପରିସରକୁ ନିୟମିତ ବିଶୋଧନ କରାଯାଇଥିଲା। ସନ୍ତୋଷ କୁମାର ସାହୁ ଓ ଶୁକାନ୍ତ କୁମାର ନାୟକ ପ୍ରମୁଖ ଏଥିରେ ସକ୍ରିୟ ସହଯୋଗ କରିଥିଲେ। ସୂଚନା ଯୋଗ୍ୟ ଯେ ଆଠଗଡ ଡାକ୍ତରଖାନାରେ ବର୍ତ୍ତମାନ ପାଇଁ ପ୍ରତି ସପ୍ତାହର ମଙ୍ଗଳବାର ଓ ଶୁକ୍ରବାର ୨ଦିନ କରୋନା ଲକ୍ଷଣ ଥିବା କିମ୍ବା ବାହାର ରାଜ୍ୟରୁ ଆସିଥିବା ପ୍ରବାସୀଙ୍କର ଆଣ୍ଟିଜେନ ଟେଷ୍ଟ କରାଯିବାଲାଗି ବ୍ୟବସ୍ଥା ହୋଇଛି। ଆବଶ୍ୟକ ପଡିଲେ ଭବିଷ୍ୟତରେ ଏହା ସପ୍ତାହରେ ୨ଦିନ ପରିବର୍ତ୍ତେ ଅଧିକ ଦିନ କରାଯିବ ବୋଲି ଅଧିକ୍ଷକ ଡାକ୍ତର ମିଶ୍ର ପ୍ରକାଶ କରିଛନ୍ତି।

Comments
Loading...