ଅଜଣା ଗାଡି ଧକ୍କାରେ ଜଣେ ମୃତ, ଶଙ୍କରପୁର ନିକଟରେ ରାସ୍ତା ଅବରୋଧ

ଆଠଗଡ: ଆଠଗଡ ମଧ୍ୟଦେଇ ଯାଇଥିବା ପୁରୁଣା କଟକ-ସମ୍ବଲପୁର ରାସ୍ତାର ଶଙ୍କରପୁର ଛକ ନିକଟରେ ଶନିବାର ସନ୍ଧ୍ୟାରେ ଏକ ଚିପସ୍‍ ବୋଝେଇ ଟ୍ରକ ଏକ ସ୍କୁଟି ଉପରେ ମାଡିଯିବାରୁ ସ୍କୁଟିଚାଳକ ଘଟଣାସ୍ଥଳରେ ମୃତ୍ୟୁବରଣ କରିଛନ୍ତି। ଆଠଗଡ ଥାନା ଅନ୍ତର୍ଗତ ଇଚ୍ଛାପୁରର ପଞ୍ଚାୟତର ଗୁଡୁପଡା ଗ୍ରାମର ଶତୃଘନ ରାଉତ ନିଜ ସ୍କୁଟିରେ ଆଠଗଡ ଆସୁଥିବାବେଳେ ଅନୁଗୁଳ ଆଡୁ ଆସୁଥିବା ଚିପସ୍‍ ବୋଝେଇ ଟ୍ରକଟି ପଛପଟୁ ତାଙ୍କ ଉପରେ ଚଢିଯାଇଥିଲା। ସମ୍ବାଦଟି ଲେଖାହେବା ବେଳକୁ ଘଟଣାସ୍ଥଳରେ ତାଙ୍କ ମୃତ ଦେହ ପଡି ରହିଥିବା ବେଳେ ଉତ୍ୟକ୍ତ ଲୋକେ ସେହି ଗୁରୁତ୍ୱପୂର୍ଣ୍ଣ ରାସ୍ତା ଉପରେ ଟାୟାର ଜାଳି ଅବରୋଧ କରିଥିବାରୁ ରାସ୍ତାର ଉଭୟ ପାର୍ଶ୍ବରେ ଶତାଧିକ ଯାନବାହାନ ଅଟକି ରହିଛି। ଘଟଣା ଘଟିଥିବା ଶଙ୍କରପୁର ଢେଙ୍କାନାଳ ସଦର ଥାନା ଓ ଭାପୁର ଫାଣ୍ଡି ଅଧିନରେ ରହିଥିବାରୁ ଉଭୟ ଥାନା ଓ ଫାଣ୍ଡିର ପୁଲିସ ଅଧିକାରୀ ସେଠାରେ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାସୁଝା କରି ରାସ୍ତା ଅବରୋଧ ହଟାଇବା ପାଇଁ ଉଦ୍ୟମ ଚଳାଇଛନ୍ତି।

Comments are closed.