୮୪ ବର୍ଷ ସଫଳ ଦାମ୍ପତ୍ୟର ସୁନ୍ଦର କାହାଣୀ

କୋଟ୍ଟାୟମ୍: ଦାମ୍ପତ୍ୟ ଜୀବନରେ କଳହ ହେବା ସ୍ବାଭାବିକ, କିନ୍ତୁ ପରସ୍ପରର ବୁଝାମଣାରେ ପୁନର୍ବାର ଘନିଷ୍ଠତା ବଢ଼ିଥାଏ। ଏହି କଥା କହିଛନ୍ତି ୧୦୨ ବର୍ଷୀୟ କେରଳର କୋଟ୍ଟାୟମ୍ ନିବାସୀ ମାଧବନ୍ ନାୟାର୍। ତାଙ୍କ ପତ୍ନୀ ୧୦୧ ବର୍ଷୀୟା ମୀନାକ୍ଷୀ ଆମ୍ମାଙ୍କ ସହ ସେ ଇତିମଧ୍ୟରେ ୮୪ ବର୍ଷ ସଫଳ ଦାମ୍ପତ୍ୟ ଜୀବନ ଅତିବାହିତ କରିସାରିଲେଣି। ସମଗ୍ର କେରଳରେ ଏଇ ବୟୋଜ୍ୟେଷ୍ଠ ଦମ୍ପତିଙ୍କୁ କିଏ ବା ନଜାଣେ? ବିଦେଶୀ ପର୍ଯ୍ୟଟକ ମଧ୍ୟ ଏମାନଙ୍କୁ ଭେଟିବାକୁ ଆସନ୍ତି। ପାଖାପାଖି ୧୦ ବର୍ଷ ତଳେ ସ୍ବିଡେନ୍‌ରୁ ଆସିଥିବା ଜନୈକ ପର୍ଯ୍ୟଟକ ମାଧବନ୍‌ଙ୍କୁ ପଚାରିଥିଲେ, ଆପଣଙ୍କ ସଫଳ ଦାମ୍ପତ୍ୟ ଜୀବନ ଅତିବାହିତର ମୁଖ୍ୟ ସୂତ୍ର କ’ଣ? ମାଧବନ୍ କହିଥିଲେ, ଗୋଟିଏ ସମୟରେ ସେ ପତ୍ନୀଙ୍କ ସହ କିଛି ଭୁଲ୍ କରିଥିଲେ।

ପରେ କିନ୍ତୁ ସେଇ ଭୁଲ୍‌କୁ ହୃଦୟଙ୍ଗମ କରି ଏହାର ପ୍ରାୟଶ୍ଚିତ କରିବା ନିମନ୍ତେ ସମସ୍ତ ଚେଷ୍ଟା କରିଥିଲେ। ପତ୍ନୀ ମୀନାକ୍ଷୀ ମଧ୍ୟ ସ୍ବାମୀଙ୍କର ସେଇ ଭୁଲ୍‌କୁ ସମୟକ୍ରମେ ଭୁଲିଯାଇଥିଲେ। ଏହା ପରଠାରୁ ସେମାନଙ୍କ ମଧ୍ୟରେ ଆଉ ଯୁକ୍ତିତର୍କ କିମ୍ବା ଅଶାନ୍ତି ଉପୁଜିନଥିଲା। ୫ଜଣ ସନ୍ତାନଙ୍କର ପିତାମାତା ଏଇ ଦମ୍ପତି ୧୯୩୬ରେ ବିବାହ ବନ୍ଧନରେ ବାନ୍ଧି ହୋଇଥିଲେ। ଏହା ମଧ୍ୟରେ ୮୪ ବର୍ଷ ଅତିବାହିତ ହୋଇଗଲାଣି, ମୀନାକ୍ଷୀ କହିଛନ୍ତି ଆଗାମୀ ୧୦୦ ବର୍ଷ ମଧ୍ୟ ସେ ସ୍ବାମୀଙ୍କ ସହ ବିନା କୌଣସି ସର୍ତ୍ତରେ ରହିବାକୁ ଚାହୁଁଛନ୍ତି। ପିଲାଦିନେ ଦୁହେଁ ଗୋଟିଏ ବିଦ୍ୟାଳୟରେ ପାଠ ପଢ଼ୁଥିଲେ, ପରସ୍ପରକୁ ଜାଣିଥିଲେ କିନ୍ତୁ କେହି କାହା ସହ ବାର୍ତ୍ତାଳାପ କରିନଥିଲେ।

ପରବର୍ତ୍ତୀ ସମୟରେ ସେମାନଙ୍କ ପରିବାରଲୋକଙ୍କ ବନ୍ଧୁତା କାରଣରୁ ମାଧବନ୍ ଓ ମୀନାକ୍ଷୀଙ୍କ ବିବାହ ସମ୍ପନ୍ନ ହୋଇଥିଲା। ମାଧବନ୍‌ କହିଛନ୍ତି, ପତ୍ନୀ ପ୍ରତ୍ୟେକ ପରିସ୍ଥିତିରେ ତାଙ୍କୁ ସମର୍ଥନ କରିଛନ୍ତି। ସଫଳ ଓ ସୁଖୀ ଦାମ୍ପତ୍ୟ ଏତେ ସହଜର କଥା ନୁହେଁ, ଦୁଇ ସାଥି ନ ଚାହିଁଲେ ଏହା ସମ୍ଭବପର ନୁହେଁ। ସ୍ବାମୀ-ସ୍ତ୍ରୀ ସମ୍ପର୍କରେ ତୃତୀୟ ବ୍ୟକ୍ତିର ପରାମର୍ଶ ଗ୍ରହଣ କରିବା ପୂର୍ବରୁ ବାରମ୍ବାର ଭାବିବା ଉଚିତ ବୋଲି ଏଇ ବୟୋଜ୍ୟେଷ୍ଠ ଦମ୍ପତି ଯୁବ ଦମ୍ପତିଙ୍କୁ ପରାମର୍ଶ ଦେଇଛନ୍ତି।

Comments
Loading...