ଆସାମ ଓ ପଶ୍ଚିମବଙ୍ଗ ପ୍ରଥମ ପର୍ଯ୍ୟାୟ ବିଧାନସଭା ନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲ ଶେଷ

ଆସାମର ପ୍ରଥମ ପର୍ଯ୍ୟାୟ ବିଧାନସଭା ନିର୍ବାଚନ ପାଇଁ ଆଜି ପ୍ରାର୍ଥୀପତ୍ର ଦାଖଲର ଶେଷଦିନ ଥିଲା। ଏହି ପର୍ଯ୍ୟାୟରେ ଆସନ୍ତା ୨୭ ତାରିଖ ଦିନ ୪୭ଟି ନିର୍ବାଚନ ମଣ୍ଡଳୀରେ ମତଦାନ ହେବ। ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୱାଲ୍‍ ମାଜୁଲୀରୁ ତାଙ୍କର ପ୍ରାର୍ଥୀପତ୍ର ଦାଖଲ କରିଛନ୍ତି। ବିଜେପି ନେତୃତ୍ୱର ମେଣ୍ଟ ପୁନର୍ବାର କ୍ଷମତାକୁ ଫେରିବ ବୋଲି ଶ୍ରୀ ସୋନୱାଲ୍‍ କହିଛନ୍ତି। ବରିଷ୍ଠ କଂଗ୍ରେସ ନେତା ତଥା ପୂର୍ବତନ ମନ୍ତ୍ରୀ ରକିବୁଲ୍‍ ହୁସେନ୍‍ ମଧ୍ୟ ନାଗାଓଁ ଜିଲ୍ଲାର ସାମଗୁଡ଼ି ଆସନରୁ ପ୍ରାର୍ଥୀପତ୍ର ଦାଖଲ କରିଛନ୍ତି। ଉପସ୍ଥିତ କଂଗ୍ରେସ ବିଧାୟକ ନୁରୁଲ୍‍ ହୁଡ୍ଡା ଓ ଆସାମ  ଗଣପରିଷଦ ବିଧାୟକ ରେଣୁପମା ରାଜଖୱା ମଧ୍ୟ ଆଜି ସେମାନଙ୍କର ପ୍ରାର୍ଥୀପତ୍ର ଦାଖଲ କରିଛନ୍ତି

ପଶ୍ଚିମବଙ୍ଗର ପ୍ରଥମ ପର୍ଯ୍ୟାୟ ବିଧାନସଭା ନିର୍ବାଚନ ପାଇଁ ଆଜି ମଧ୍ୟ ପ୍ରାର୍ଥୀପତ୍ର ଦାଖଲର ଶେଷଦିନ ଥିଲା। ଏହି ପର୍ଯ୍ୟାୟରେ ୫ଟି ଜିଲ୍ଲାର ୩୦ଟି ନିର୍ବାଚନ ମଣ୍ଡଳୀରେ ୨୭ ତାରିଖରେ ଭୋଟ୍‍ ନିଆଯିବ। ସେଗୁଡ଼ିକ ମଧ୍ୟରେ ବଙ୍କୁଡ଼ାର ୪ଟି ଆସନ, ପୁରୁଲିଆର ୯ଟି ଆସନ, ପଶ୍ଚିମ ମେଦିନୀପୁରର ୬ଟି ଆସନ, ପୂର୍ବ ମେଦିନୀପୁରର ୭ଟି ଆସନ ଓ ଝରଗ୍ରାମର ୪ଟି ଆସନ ରହିଛି। ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ଏପର୍ଯ୍ୟନ୍ତ ୧୧୧ଟି ପ୍ରାର୍ଥୀପତ୍ର ଦାଖଲ ହୋଇଛି। ଆସନ୍ତାକାଲି ପ୍ରାର୍ଥୀପତ୍ରଗୁଡ଼ିକୁ ଯାଞ୍ଚ କରାଯିବ। ପ୍ରାର୍ଥୀପତ୍ର ପ୍ରତ୍ୟାହାରର ଶେଷଦିନ ୧୨ ତାରିଖ ରହିଛି।