ଶପଥଗ୍ରହଣକୁ ଆସିବ ‘କୁନି ମଫଲରମ୍ୟାନ୍‌’

୨୪ଘଣ୍ଟାରେ ଆପ୍‌ର ସଦସ୍ୟତା ଏକ ନିୟୁତ ବୃଦ୍ଧି

ନୂଆଦିଲ୍ଲୀ : ଦିଲ୍ଲୀ ବିଧାନସଭା ନିର୍ବାଚନରେ ବିପୁଳ ବିଜୟ ପରେ ଆମ୍‌ ଆଦ୍‌ମୀ ପାର୍ଟି (ଆପ୍‌)ର ସଦସ୍ୟ ସଂଖ୍ୟା ବିସ୍ମୟଜନକ ଭାବେ ବୃଦ୍ଧିପାଇଛି। ଗତ ୨୪ଘଣ୍ଟା ମଧ୍ୟରେ ଏକ ନିୟୁତରୁ ଅଧିକ ଜନତା ଆପ୍‌ର ସଦସ୍ୟତା ଗ୍ରହଣ କରିଥିବା ଦଳପକ୍ଷରୁ ଟ୍ବିଟର ମାଧ୍ୟମରେ ଦାବିକରାଯାଇଛି। ନିର୍ବାଚନ ଫଳାଫଳ ପ୍ରକାଶ ସହିତ ଆପ୍‌ ପକ୍ଷରୁ ଦେଶଗଠନ ପାଇଁ ‘ଆପ୍‌ରେ ଯୋଗଦିଅ, ଦେଶ ଗଠନରେ ସହାୟକ ହୁଅ’ ଏବଂ ‘ମେଁ ଭି ଆମ୍‌ ଆଦ୍‌ମୀ’ ଅଭିଯାନକୁ ପୁନଃ ଆରମ୍ଭ କରାଯାଇଥିଲା। ଏଥିପାଇଁ ଏକ ଫୋନ୍‌ ନମ୍ବର ଦିଆଯାଇଥିଲା ଓ ଏଥିରେ ମିସ୍‌ଡ କଲ୍‌ ଦେବାକୁ କୁହାଯାଇଥିଲା। ଏହାକୁ ବିପୁଳ ସମର୍ଥନ ମିଳିଥିବା ପାର୍ଟି ପକ୍ଷରୁ କୁହାଯାଇଛି। ଅପରପକ୍ଷରେ ନିର୍ବାଚନ ଫଳ ପ୍ରକାଶ ପରେ ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ‘ଛୋଟ କେଜରିୱାଲ’ଙ୍କୁ ଆସନ୍ତା ୧୬ତାରିଖ ଶପଥ ଗ୍ରହଣ ଉତ୍ସବକୁ ଆମନ୍ତ୍ରଣ କରାଯିବ ବୋଲି ଦଳ ପକ୍ଷରୁ ନିଷ୍ପତ୍ତି ହୋଇଛି। ଏକ ଶିଶୁକୁ ଆପ୍‌ ଟୋପି ଓ ‘ମଫଲର’ ପିନ୍ଧାଇ ‘କୁନି କେଜରିୱାଲ’ ତଥା ‘କୁନି ମଫଲରମ୍ୟାନ୍‌’ ବୋଲି ଦର୍ଶାଯାଇଥିଲା ଓ ଏହା ସର୍ବାଧିକ ଲୋକପ୍ରିୟତା ଲାଭ କରିଥିଲା। ଏହି ଶିଶୁର ପରିଚୟ ମିଳିଛି ଓ ତାର ନାମ ଅଭ୍ୟାନ୍‌ ତୋମାର ବୋଲି ଜଣାପଡ଼ିଛି। ଅଭ୍ୟାନ୍‌ ହେଉଛି ବ୍ୟବସାୟୀ ରାହୁଲ ଓ ମୀନାକ୍ଷୀ ତୋମାରଙ୍କ ପୁଅ ଏବଂ ତାର ବୟସ ମାତ୍ର ଏକ ବର୍ଷ। ଏହି ଦମ୍ପତି ଆପ୍‌ ସମର୍ଥକ। ଟ୍ବିଟରରେ ପ୍ରଥମେ ଅଭ୍ୟାନ୍‌ର ମଫଲର, ଟୋପିପିନ୍ଧା ଫଟୋ ପ୍ରସାରିତ ହୋଇଥିଲା।

Get real time updates directly on you device, subscribe now.

Comments
Loading...