ଗିରଫ ପାଟଣାଗଡ ବିଧାୟକ ଡାକ୍ତରଖାନାରେ, ସ୍ୱାସ୍ଥ୍ୟବସ୍ଥା ସ୍ଥିର

ପାଟଣାଗଡ: ଅସୁସ୍ଥ ଅନୁଭବ କରିବା ପରେ ଜେଲରେ ଥିବା ପାଟଣାଗଡ ବିଧାୟକ ସରୋଜ କୁମାର ମେହେରଙ୍କୁ ପାଟଣାଗଡରେ ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ବୁଧବାର ଦ୍ୱିତୀୟ ଦିନ ମଧ୍ୟ ତାଙ୍କୁ ଡାକ୍ତରଖାନାରେ ରଖାଯାଇଥିବା ଜଣାଯାଇଛି। ଜଣେ କାର୍ଯ୍ୟରତ କନିଷ୍ଠ ଯନ୍ତ୍ରୀଙ୍କୁ କାନ ଧରି ଉଠ୍‍-ବସ କରି ଚର୍ଚ୍ଚାରେ ରହିଥିବା ପାଟଣାଗଡ ବିଧାୟକ ସରୋଜ କୁମାର ମେହେରଙ୍କୁ ପୁଲିସ ରବିବାର ବିଳମ୍ବିତ ରାତିରେ ନୂଆପଡାର ଏକ ହୋଟେଲରୁ ଗିରଫ କରି ଆଣିବା ପରେ ମାନ୍ୟବର କୋର୍ଟ ତାଙ୍କୁ ଜେଲ ହାଜତକୁ ପଠାଇ ଦେଇଥିଲେ। ତେବେ ଗତକାଲି ଅପରାହ୍ନ ପ୍ରାୟ ୩ ଘଣ୍ଟା ସମୟରେ ତାଙ୍କର ଛାତିର ବାମ ପଟ ଏବଂ କାନ୍ଧରେ ଯନ୍ତ୍ରଣା ଅନୁଭବ କରିବା ପରେ ତାଙ୍କୁ ପାଟଣାଗଡ ଉପଖଣ୍ଡୀୟ ଚକିତ୍ସାଳୟର ଅଂଶୁଘାତ କକ୍ଷରେ ଭର୍ତ୍ତି କରାଯାଇଥିଲା।

ଡାକ୍ତରଖାନା ପକ୍ଷରୁ ଗତକାଲି ତାଙ୍କୁ ଆବଶ୍ୟକୀୟ ଚିକିତ୍ସା ଯୋଗାଇ ଦିଆଯାଇଥିବା ବେଳେ ଛାତି ଯନ୍ତ୍ରଣାକୁ ଗୁରୁତ୍ୱର ସହ ନିଆଯାଇ ବିଭିନ୍ନ ପରୀକ୍ଷା ନିରୀକ୍ଷା କରାଯାଇଥିଲା। ତେବେ ଆଜି ବିଭିନ୍ନ ପରୀକ୍ଷା ରିପୋର୍ଟ ଆସିବା ପରେ ତାଙ୍କର ସ୍ୱାସ୍ଥ୍ୟାବସ୍ଥା ସ୍ଥିର ରହିଥିବା ଡାକ୍ତରଖାନା ସୂତ୍ରରୁ ପ୍ରକାଶ। ଆସନ୍ତାକାଲି ତାଙ୍କର ଆଉ କିଛି ଆବଶ୍ୟକୀୟ ପରୀକ୍ଷା କରାଯିବ ବୋଲି ଚିକିତ୍ସାଳୟର ଅଧୀକ୍ଷକ ଡାକ୍ତର ଦିଲ୍ଲୀପ କୁମାର ବିଶ୍ୱାଳଙ୍କ ଠାରୁ ପ୍ରକାଶ।

Comments are closed.