ଆସିଲା ମୈାସୁମୀ ; ମୁକୁଳା ପଡିଛି ନଦୀବନ୍ଧ

ଆରଡି : ରାଜ୍ୟକୁ ଛୁଇଁଲା ମୈାସୁମୀ। ଯାହାର ପ୍ରଭାବରେ ଗତ କିଛିଦିନ ହେବ ସାରା ରାଜ୍ୟରେ ଲାଗି ରହିଛି ତୁହାକୁ ତୁହା ବର୍ଷା। ହେଲେ ମୈାସୁମୀ ଆସିବା ପୂର୍ବରୁ ଦୃବଳ ନଦୀବନ୍ଧର ମରାମତି ହୋଇ ନଥିବାରୁ ନଈକୂଳିଆବାସୀ ଏବେ ଆତଙ୍କିତ ଅବସ୍ଥାରେ ଜୀବନ ବିତାଉଛନ୍ତି। ଏପରି ଦୃଶ୍ୟ ଦେଖିବାକୁ ମିଳିଛି ଭଦ୍ରକ ଜିଲା ଚାନ୍ଦବାଲି ବ୍ଲକର ତଳିଆ ଅଞ୍ଚଳରେ। ଏହି ବ୍ଲକର ଆରଡି, ନାନ୍ଦପୁର, ଓଳଗ ଓ ସୁନ୍ଦରପୁର ପଞ୍ଚାୟତ ଦେଇ ପ୍ରବାହିତ ହେଉଥିବା ବୈତରଣୀ ଓ ସାଳନ୍ଦୀ ନଦୀର ବହୁ ସ୍ଥାନରେ ନଦୀବନ୍ଧ ଦୃବଳ ଥିବା ବେଳେ ପ୍ରାୟ ୫/୬ଟି ସ୍ଥାନରେ ନଦୀବନ୍ଧ ଅତି ଦୃବଳ ଅବସ୍ଥାରେ ରହିଛି। ଆଗମୀଦିନରେ ଯଦି ବନ୍ୟା ପରିସ୍ଥିତି ସୃଷ୍ଟି ହୁଏ ତେବେ ଉକ୍ତ ସ୍ଥାନରେ ଘାଇ ହେବାର ଆଶଙ୍କା ରହିଛି ବୋଲି ନଈକୂଳିଆବାସୀ ପ୍ରକାଶ କରିଛନ୍ତି। ସେହିପରି ଶୀତଳପୁର ଓ ପାଲଟପୁ ଠାରେ ସାଳନ୍ଦୀ ନଦୀର ସୁରକ୍ଷାବନ୍ଧ ଗତ କିଛିବର୍ଷ ହେବ ନଦୀରେ ଲିନ୍ନ ହୋଇ ଯାଇଥିଲେ ମଧ୍ୟ ତାହା ଏପର୍ଯ୍ୟନ୍ତ ମରାମତି ହୋଇନଥିବାରୁ ଉକ୍ତ ସ୍ଥାନରେ ବର୍ଷବର୍ଷ ଧରି ନଦୀବନ୍ଧ ମୁକୁଳା ପଡିଛି। ଏପରିକି ଅମାବାସ୍ୟା ଓ ପୂର୍ଣ୍ଣିମାରେ ସମୁଦ୍ରରୁ ସାମନ୍ୟ ଜୁଆର ପାଣି ଆସିଲେ ଗାଁ ଦାଣ୍ଡରେ ଲହଡି ଭାଙ୍ଗୁଛି। ଗତ କିଛିଦିନ ତଳେ ଜିଲା ପ୍ରଶାସନ ପକ୍ଷରୁ ପ୍ରାକୃତିକ ବିପର୍ଯ୍ୟୟର ମୁକାବିଲା ନିମନ୍ତେ ପ୍ରାକ୍ ପ୍ରସ୍ତୁତ କରିବା ସହ ସମସ୍ତ ବାତ୍ୟା ଆଶ୍ରୟସ୍ଥଳି ଗୁଡିକର ମକ୍ଡ଼୍ରିଲ କରାଯାଇଥିଲା। ତାହାସହ ନଈକୁଳିଆ ଅଞ୍ଚଳରେ ଦୃବଳ ନଦୀବନ୍ଧର ତୁରନ୍ତ ମରାମତି ସହିତ ସାମ୍ଭାବ୍ୟ ବନ୍ୟାର ମୁକାବିଲା ନିମନ୍ତେ ଆବଶ୍ୟକତା ଅନୁଯାୟୀ ବାଲି ବସ୍ତା ଓ ବଲା ବ୍ୟବସ୍ଥା କରିବାକୁ ଜଳସେଚନ ବିଭାଗକୁ ପରାମର୍ଶ ଦିଆଯାଇଥିବା ଚାନ୍ଦବାଲି ତହସିଲିଦାର ସତ୍ୟଜିତ ରାଉତ ପ୍ରକାଶ କରିଛନ୍ତି।
ବୈତରଣୀ ନଦୀର ଦୋହରାପାଟଣା, ସୁନ୍ଦରପୁର, ଅମୃତମଣୀ, ଓଳଗ, ଷାଠିବାଙ୍କୁଡା, ବୋଡକ, ମୁଆଁ ଆଦି ଦେଇ ଜଳସେଚନ ବିଭାଗ ପକ୍ଷରୁ କୋଟିକୋଟି ଟଙ୍କା ବ୍ୟୟ ବରାଦ କରାଯାଇ ସୃଦୁଢ ନଦୀବନ୍ଧ ନିର୍ମାଣ କରାଯାଉଛି। ହେଲେ ବିଭାଗ ପକ୍ଷରୁ ଠିକ ଭାବେ କାର୍ଯ୍ୟ ହେଉନଥିବା ବୋଡକ, ଷାଠିବାଙ୍କୁଡା ଓ ଦୋହରାପାଟଣା ଗାଁର ନଈକୂଳିଆ ଲୋକ ଅଭିଯୋଗ ଆଣିଛନ୍ତି। ଫଳରେ ଷାଠିବାଙ୍କୁଡା ଠାରେ ନଦୀବନ୍ଧ ଅତି ଦୃବଳ ରହିଥିବା ବେଳେ ବୋଡକ ନିକଟରେ ଆଖଣ୍ଡଳମଣି-ଯାଜପୁର ମୁଖ୍ୟ ରାସ୍ତା ପାର୍ଶ୍ବ ଦେଇ ପ୍ରବାହିତ ହେଉଥିବା ବୈତରଣୀ ନଦୀବନ୍ଧ ବାରମ୍ବାର ନଦୀ ମଧ୍ୟକୁ ଧସିବାରେ ଲାଗିଛି। ସୂଚନା ଅନୁଯାୟୀ, ଉକ୍ତ ସ୍ଥାନରେ ବିଗତ ୧୦ବର୍ଷ ମଧ୍ୟରେ ନଦୀ ତାର ଗତିପଥ ବଦଳାଇ ଜୁଆର ଓ ବନ୍ୟାପାଣିରେ ସୁରକ୍ଷାବନ୍ଧକୁ ଗ୍ରାସ କରିବା ସହ ଆଖଣ୍ଡଳମଣି-ଯାଜପୁର ଜାତୀୟ ରାଜପଥକୁ ଗ୍ରାସ କରିବା ଫଳରେ ମାସମାସ ଧରି ଯୋଗାଯୋଗ ବିଛିନ୍ନ ହୋଇ ପଡିଥିଲା। ଏହି ନଦୀବନ୍ଧର ବିଭାଗ ପକ୍ଷରୁ ସ୍ଥାୟୀ ମରାମତି ହେଉନଥିବାରୁ ବର୍ଷାଋତୁରେ ସାମ୍ଭାବ୍ୟ ବନ୍ୟା ପରିସ୍ଥିତି ସୃଷ୍ଟି ହେଲେ ଅନେକ ଗାଁ ବାହ୍ୟ ଜଗତରୁ ବିଛିନ୍ନ ହୋଇ ରହିଥାଏ। ସେହିପରି ମୁଆଁ ଠାରେ ନଦୀବନ୍ଧର ମରାମତି ନାଁରେ ଅତି ନିମ୍ନମାନର କାର୍ଯ୍ୟ ହୋଇଥିବାରୁ ସାମାନ୍ୟ ବର୍ଷା ହେଲେ ନାନା ଦୁର୍ଦ୍ଦଶା ଭୋଗୁଛନ୍ତି ନଈକୂଳିଆବାସୀ। ଏ ସର୍ମ୍ପକରେ ଜଳସେଚନ ବିଭାଗର ଏସଡିଓ ଭୁବନାନନ୍ଦ ମହାନ୍ତିଙ୍କୁ ପଚାରିବାରୁ ନଦୀବନ୍ଧର ମରାମତି କାର୍ଯ୍ୟ କରାଯିବା ସହ କ୍ଷେତ୍ର ପରିଦର୍ଶନ କରାଯାଇଛି। ଯଦି କୈାଣସି ସମସ୍ୟା ଦେଖା ଦିଏ ତେବେ ବିଭାଗ ପ୍ରସ୍ତୁତ ରହିଥିବା ଶ୍ରୀ ମହାନ୍ତି ପ୍ରକାଶ କରିଛନ୍ତି।

Comments
Loading...