ଆଲ୍ମାଟି: ଦୁଇ ଭାରତୀୟ ଯୁବା ମଲ୍ଲଯୋଦ୍ଧା ଅଂଶୁ ମଲ୍ଲିକ ଓ ସୋନମ୍ ମଲ୍ଲିକ ଟୋକିଓ ଅଲିମ୍ପିକ୍ସ ଯୋଗ୍ୟତା ହାସଲ କରିଛନ୍ତି। କାଜାଖ୍ସ୍ତାନର ଆଲ୍ମାଟିରେ ଆୟୋଜିତ ଟୋକିଓ ଅଲିମ୍ପିକ୍ସ ଏସୀୟ ଯୋଗ୍ୟତା ପର୍ୟ୍ୟାୟ ମହିଳା କୁସ୍ତି ଇଭେଣ୍ଟରେ ଅଂଶୁ ଓ ସୋନମ୍ ଏହି ସଫଳତା ହାସଲ କରିଛନ୍ତି। ୧୯ ବର୍ଷ ବୟସ୍କା ଅଂଶୁ ୫୭ ଓ ୧୮ ବର୍ଷ ବୟସ୍କା ସୋନମ୍ ୬୨ କେଜି ବର୍ଗରେ ଅଲିମ୍ପିକ୍ସ ଯୋଗ୍ୟତା ହାସଲ କରିଛନ୍ତି। ସୋନମ୍ ଲଢେଇରେ ପ୍ରଥମରୁ ପଛରେ ଥିଲେ ମଧ୍ୟ ପରବର୍ତ୍ତୀ ସମୟରେ ପ୍ରତ୍ୟାବର୍ତ୍ତନ କରି ୬-୦ରେ ବିଜୟୀ ହୋଇଥିଲେ। ଶେଷରେ ଦକ୍ଷିଣ କୋରିଆର ଜିଉନ୍ ଉମ୍ଙ୍କୁ ପରାସ୍ତ କରିଥିଲେ।
ସେହିପରି ସୋନମ ପ୍ରଥମରୁ ପ୍ରାଧାନ୍ୟବିସ୍ତାର କରି ମ୍ୟାଚକୁ ଜିତିବାରେ ସକ୍ଷମ ହୋଇଥିଲେ। ଅଂଶୁ ଫାଇନାଲ ଲଢେଇରେ ଶେଷରେ ଚୀନ୍ର ଜିୟା ଲଙ୍ଗଙ୍କୁ ୫-୨ରେ ପରାସ୍ତ କରିବାରେ ସକ୍ଷମ ହୋଇଥିଲେ। ଫଳରେ ରିଓ ଅଲିମ୍ପିକ୍ସରେ ବ୍ରୋଞ୍ଜ୍ ପଦକ ଜିତିଥିବା ସାକ୍ଷୀ ମଲ୍ଲିକ ଅଲିମ୍ପିକ୍ସ ଯୋଗ୍ୟତାରୁ ବଞ୍ଚିତ ହୋଇଛନ୍ତି। ଏହି ସଫଳତା ଲାଗି ଅଂଶୁ ଓ ସୋନମଙ୍କୁ ସାକ୍ଷୀ ଶୁଭେଚ୍ଛା ଜଣାଇଛନ୍ତି। ଜୁନିୟର ବର୍ଗରେ ସଫଳତା ପରେ ସିନିୟର ବର୍ଗ ପାଇଁ ସୋନମଙ୍କ ନିକଟରେ ଯଥେଷ୍ଟ ଦକ୍ଷତା ରହିଛି ବୋଲି ପ୍ରଶିକ୍ଷକ ଆଜ୍ମେର୍ ମଲ୍ଲିକ କହିଛନ୍ତି। ପୂର୍ବରୁ ବିନେଶ ଫୋଗଟ୍ ଟୋକିଓ ଅଲିମ୍ପିକ୍ସ ଯୋଗ୍ୟତା ହାସଲ କରିଥିଲେ। ଅଲିମ୍ପିକ୍ସ ଲାଗି ଏପର୍ୟ୍ୟନ୍ତ ୭ଜଣ ଭାରତୀୟ ମଲ୍ଲଯୋଦ୍ଧା ଟୋକିଓ ଅଲିମ୍ପିକ୍ସ ଯୋଗ୍ୟତା ହାସଲ କରି ସାରିଲେଣି। ପୁରୁଷ ବିଭାଗରେ ବଜରଙ୍ଗ ପୁନିଆ ୬୫ କିଗ୍ରା, ରବି ଦାହିଆ ୫୭ କିଗ୍ରା,ଦୀପକ ପୁନିଆ ୮୬ କିଗ୍ରାରେ ଯୋଗ୍ୟତା ହାସଲ କରିଛନ୍ତି।
Comments are closed.