ଆଣ୍ଡି ଫ୍ଲାୱାର କିଙ୍ଗ୍ସ ଏକାଦଶ ପଞ୍ଜାବ ଦଳର ସହକାରୀ ପ୍ରଶିକ୍ଷକ
ମୋହାଲି : ବିସିସିଆଇ ଆନୁକୂଲ୍ୟରେ ଆୟୋଜିତ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ଅନ୍ୟତମ ଦଳ କିଙ୍ଗ୍ସ ଏକାଦଶ ପଞ୍ଜାବର ସହକାରୀ ପ୍ରଶିକ୍ଷକ ଭାବେ ନିଯୁକ୍ତି ପାଇଛନ୍ତି ଜିମ୍ବାୱେର ପୂର୍ବତନ କ୍ରିକେଟର୍ ଆଣ୍ଡି ଫ୍ଲାୱାର୍। ସୂଚନାଥାଉକି କିଙ୍ଗ୍ସ ଏକାଦଶ ପଞ୍ଜାବ ଦଳର ସହକାରୀ ପ୍ରଶିକ୍ଷକ ଭାେବ ସୁନୀଲ ଜୋଷୀ କାର୍ଯ୍ୟ କରୁଥିଲେ। ତେବେ ଜୋଷୀ ଇତିମଧ୍ୟରେ ଭାରତୀୟ ସିନିୟର କ୍ରିକେଟ୍ ଦଳର ମୁଖ୍ୟ ମନୋନୟନକାରୀ ଭାବେ ନିଯୁକ୍ତି ପାଇଥିବାରୁ କିଙ୍ଗ୍ସ ଏକାଦଶର ସହକାରୀ ପ୍ରଶିକ୍ଷକ ପଦ ଛାଡିଥିଲେ। ତାଙ୍କ ସ୍ଥାନରେ ଆଣ୍ଡି ଫ୍ଲାୱାରଙ୍କୁ ନିଯୁକ୍ତ କରାଯାଇଛି।
କିଙ୍ଗ୍ସ ଏକାଦଶର ସହକାରୀ ପ୍ରଶିକ୍ଷକ ଭାବେ ନିଯୁକ୍ତି ପାଇଥିବାରୁ ସେ ବେଶ୍ ଖୁସି ଥିବା ଫ୍ଲାୱାର କହିବା ସହ ମୁଖ୍ୟ ପ୍ରଶିକ୍ଷକ ଅନୀଲ କୁମ୍ବଲେଙ୍କ ସହ କାମ କରିବାର ସୁଯୋଗ ମିଳିଥିବାରୁ ନିଜକୁ ସୌଭାଗ୍ୟବାନ୍ ମନେ କରୁଥିବା ଦର୍ଶାଇଛନ୍ତି। କିଙ୍ଗ୍ସ ଏକାଦଶ ଦଳ ବେଶ୍ ଶକ୍ତିଶାଳୀ। ଏହି ଦଳରେ ଥିବା ସପୋର୍ଟ ଷ୍ଟାଫ୍ମାେନ ମଧ୍ୟ ବେଶ୍ ଅଭିଜ୍ଞ ଥିବାରୁ ଦଳ ଚଳିତ ଆଇପିଏଲ୍ରେ ଭଲ ପ୍ରଦର୍ଶନ କରିବ ବୋଲି ଆଶାବ୍ୟକ୍ତ କରିଛନ୍ତି। ସେହିପରି ଆଡ୍ରିଆନ୍ ଲି ରୋକ୍ସଙ୍କୁ ଦଳର ଟ୍ରେନ୍ର ଭାବେ ନିଯୁକ୍ତ କରାଯାଇଥିବା ବେଳେ ଆଣ୍ଡ୍ର୍ୟୁ ଲିପ୍ସ ଫିଜିଓ ଭାବେ ଦାୟିତ୍ବ ତୁଲାଇବେ। ଗତବର୍ଷ କିଙ୍ଗ୍ସ ଏକାଦଶ ଦଳର ମୁଖ୍ୟ ପ୍ରଶିକ୍ଷକ ଭାବେ ଅନୀଲ କୁମ୍ବଲେଙ୍କୁ ନିଯୁକ୍ତ କରାଯାଇଥିଲା। ଦଳର ଅଧିନାୟକ ଭାବେ କେଏଲ୍ ରାହୁଲ ଦାୟିତ୍ବ ନିର୍ବାହ କରିବେ। ଚଳିତ ଆଇପିଏଲ୍ରେ କିଙ୍ଗ୍ସ ଏକାଦଶ ଦଳ ନିଜର ପ୍ରଥମ ମ୍ୟାଚ୍ ଆସନ୍ତା ୩୦ରେ ଦିଲ୍ଲୀ କ୍ୟାପିଟାଲ୍ ସହ ହେବ। ଶନିବାର କ୍ରିକେଟ୍ରୁ ସନ୍ନ୍ୟାସ ନେଇଥିବା ୱାସିମ୍ ଜାଫର୍ଙ୍କୁ କିଙ୍ଗ୍ସ ଏକାଦଶ ଦଳର ବ୍ୟାଟିଂ ପ୍ରଶିକ୍ଷକ ଭାବେ ନିଯୁକ୍ତ କରାଯିବ ବୋଲି ବିଶ୍ବସ୍ତ ସୂତ୍ରରୁ ଜଣାପଡ଼ିଛି।
Comments are closed.