ଅମୃତସର ରେଳ ଦୁର୍ଘଟଣା ପୀଡିତଙ୍କ ପରିବାରକୁ ପୋଷ୍ୟ ପରିବାର ଭାବେ ଗ୍ରହଣ କରିବେ ସିଧୁ

0

ଚଣ୍ଡିଗଡ : ପଞ୍ଜାବ ଅମୃତସର ରେଳ ଦୁର୍ଘଟଣାରେ ପ୍ରାଣ ହରାଇଥିବା ପୀଡିତଙ୍କ ପରିବାରକୁ ପୋଷ୍ୟ ପରିବାର ଭାବେ ଗ୍ରହଣ କରିବାକୁ ମନ୍ତ୍ରୀ ନବଜୋତ ସିଂହ ସିଧୁ ଘୋଷଣା କରିଛନ୍ତି। ସୋମବାର ସିଧୁ ଏକ ସାମ୍ବାଦିକ ସମ୍ମିଳନୀରେ ଘୋଷଣା କରିଛନ୍ତି ଯେ ସେ ତାଙ୍କ ଜୀବନର ଅବଶିଷ୍ଟ ସମୟ ପୀଡିତଙ୍କ ପରିବାରକୁ ଭରଣପୋଷଣ କରିବେ। ଏହି ରେଳ ଦୁର୍ଘଟଣାକୁ ନେଇ ସିଧୁ ସମାଲୋଚନାର ଶରବ୍ୟ ହୋଇଆସୁଛନ୍ତି। ଦଶହରା ସନ୍ଧ୍ୟାରେ ଆୟୋଜିତ ରାବଣ ପୋଡି ଉତ୍ସବରେ ସିଧୁଙ୍କ ପତ୍ନୀ ନବଜୋତ କୌର ଯୋଗ ଦେଇଥିଲେ। ଲୋକମାନେ ରେଳ ଧାରଣାରେ ଠିଆ ହୋଇ ରାବଣ ପୋଡି ଉତ୍ସବ ଦେଖୁଥିବାବେଳେ ସେମାନଙ୍କ ଉପରେ ଟ୍ରେନ ମାଡି ଯାଇଥିଲା। ଏଥିରେ ୬୧ଜଣଙ୍କର ମୃତ୍ୟୁ ହେବା ସହ ଶତାଧିକ ଆହତ ହୋଇଥିଲେ। ଏହି ଘଟଣାରେ କେନ୍ଦ୍ର ସରକାରଙ୍କ ଆଭିମୁଖ୍ୟ ଉପରେ ସିଧୁ ପ୍ରଶ୍ନ ଉଠାଇଛନ୍ତି। କାରଣ ରେଳବାଇ ଏହି ଘଟଣାରେ ଟ୍ରେନ ଚାଳକଙ୍କୁ ସମ୍ପୂର୍ଣ୍ଣ ରୂପେ ଦୋଷମୁକ୍ତ କରିଛି।
ଅନ୍ୟପଟେ ଏହି ରେଳ ଦୁର୍ଘଟଣା ପାଇଁ ଉତ୍ସବ ଆୟୋଜକଙ୍କୁ ଦାୟୀ କରାଯାଇଛି। ତେବେ ଆୟୋଜକ ମୁଖ୍ୟ କହିଛନ୍ତି ଯେ ରେଳ ଧାରଣା ଉପରେ ଠିଆ ନ ହେବା ଲାଗି ୭ରୁ ୧୦ ଥର ଘୋଷଣା କରାଯାଇଥିଲା। ଉତ୍ସବ ଆୟୋଜନ ପାଇଁ ସମସ୍ତ ପ୍ରକାର ଅନୁମତି ନିଆଯାଇଥିଲା ଓ ପ୍ରତିଷେଧକ ବ୍ୟବସ୍ଥା କରାଯାଇଥିଲା। ଘଟଣା ସ୍ଥଳରେ ୧୦୦ ପୁଲିସ କର୍ମଚାରୀ ମୁତୟନ ହୋଇଥିଲେ ଓ ପାଣିଟାଙ୍କି ସହିତ ଅଗ୍ନିଶମ ବିଭାଗ ଉପସ୍ଥିତ ରହିଥିଲେ।

Comments
Loading...