ହାଇଦରାବାଦ,୧୫ା୯: ବିଜେପି ସଭାପତି ଅମିତ ଶାହା ଶନିବାର ତେଲଙ୍ଗାନାରେ ଅଘୋଷିତ ନିର୍ବାଚନ ପ୍ରଚାର ଆରମ୍ଭ କରିଛନ୍ତି। ଏହି ଅବସରରେ କେ. ଚନ୍ଦ୍ରଶେଖର ରାଓ(କେସିଆର)ଙ୍କ ତେଲଙ୍ଗାନା ରାଷ୍ଟ୍ର ସମିତି(ଟିଆରଏସ୍) ସହିତ ଦଳର ମେଣ୍ଟ ହେବା ନେଇ ଯେଉଁ ଆଲୋଚନା ଚାଲିଛି ତାହାକୁ ଶାହା ଖଣ୍ଡନ କରିଛନ୍ତି। ତେଲଙ୍ଗାନାରେ ବିଜେପି ଏକାକୀ ନିର୍ବାଚନ ଲଢ଼ିବ ବୋଲି ସେ ସ୍ପଷ୍ଟ କରିଛନ୍ତି। ଶାହା ମହାବୁବନଗରଠାରେ ଏକ ସଭାକୁ ସମ୍ବୋଧିତ କରି କେସିଆରଙ୍କୁ ଅବଧି ଶେଷ ପୂର୍ବରୁ ବିଧାନସଭା ଭାଙ୍ଗିବା ନେଇ ତୀବ୍ର ସମାଲୋଚନା କରିଛନ୍ତି। ଏହାଛଡ଼ା କେସିଆର ପ୍ରଥମେ ଲୋକସଭା ସହିତ ବିଧାନସଭା ନିର୍ବାଚନ କରାଇବା ସପକ୍ଷରେ ମତ ଦେଉଥିଲେ ମଧ୍ୟ ନିଜେ ଏଥିରୁ ଓହରିଯିବା ନେଇ ମଧ୍ୟ ଶାହା ତାଙ୍କୁ ସମାଲୋଚନା କରିଛନ୍ତି। ତେଲଙ୍ଗାନାରେ ବିଜେପି ଉନ୍ନତ ପ୍ରଦର୍ଶନ କରିବ ବୋଲି ସେ ଏହି ଅବସରରେ ଦୃଢ଼ୋକ୍ତି ପ୍ରକାଶ କରିଛନ୍ତି। କଂଗ୍ରେସ ଉପରେ ମଧ୍ୟ ସେ ଏହି ସଭାରେ ଜୋରଦାର ଆକ୍ରମଣ କରିଛନ୍ତି।
