ଆମେରିକାରେ ପିଆଜ ଖାଇ ୬୫୦ ଅସୁସ୍ଥ
ନ୍ୟୁୟର୍କ: ପିଆଜ ଖାଇ ଆମେରିକାରେ ୬୫୦ ଲୋକ ଅସୁସ୍ଥ ହୋଇପଡିଛନ୍ତି। ଆମେରିକାର ରୋଗ ନିୟନ୍ତ୍ରଣ ଓ ପ୍ରତିଷେଧକ କେନ୍ଦ୍ର (ସିଡିସି)ର କହିବା ଅନୁଯାୟୀ ପିଆଜ ଖାଇବା ଦ୍ବାରା ଖାଦ୍ୟ ବିଷ କ୍ରିୟା ହୋଇ ଲୋକେ ଅସୁସ୍ଥ ହୋଇଛନ୍ତି। ଏହି ଖାଦ୍ୟ ବିଷକ୍ରିୟା ଜନିତ ରୋଗକୁ ‘ସାଲମୋନେଲା’ କୁହାଯାଇଛି। ଦେଶର ୩୭ଟି ପ୍ରଦେଶରେ ୬୫୦ ଲୋକ ଅସୁସ୍ଥ ହୋଇଥିବାବେଳେ ୧୨୯ଜଣ ଡାକ୍ତରଖାନାରେ ଭର୍ତ୍ତି ହୋଇଥିଲେ।
ଗତ ଅଗଷ୍ଟ ଓ ସେପ୍ଟେମ୍ବରରେ ଏହି ରୋଗରେ ଲୋକେ ପୀଡିତ ହୋଇଥିଲେ। ଟେକ୍ସାସ ଓ ଓକଲାହୋମାରେ ବେଶୀ ଲୋକ ଅସୁସ୍ଥ ହୋଇଥିଲେ। ମେକ୍ସିକୋର ଚିହୁଆହୁଆରୁ ଆମଦାନୀ ହୋଇଥିବା ଲାଲ, ଧଳା ଓ ହଳଦିଆ ପିଆଜ ଖାଇବା ଦ୍ବାରା ଏହି ରୋଗ ହେଉଥିବା ଜଣାଯାଇଛି। ଗତ ଅଗଷ୍ଟରେ ମେକ୍ସିକୋରୁ ଆମେରିକା ବିପୁଳ ପିଆଜ ଆମଦାନୀ କରିଥିବାବେଳେ ଏହା ଦେଶବ୍ୟାପୀ ଆବଣ୍ଟନ କରାଯାଇଥିଲା। ରୋଗ ବ୍ୟାପିବା ପରେ ଗ୍ରାହକମାନଙ୍କୁ ଲାଲ, ଧଳା ଓ ହଳଦିଆ ପିଆଜ ଖାଇବାକୁ ବାରଣ କରାଯାଇଛି। ପିଆଜକୁ ଆମଦାନୀ ପରେ ଏହାକୁ ବହୁତ ଦିନ ଗୋଦାମ ଓ ଘରେ ସଂରକ୍ଷଣ କରି ରଖାଯାଉଥିବାରୁ ଏପରି ରୋଗ ହେଉଥିବା କୁହାଯାଇଛି।
Comments are closed.