ବାଗଦାଦ ଦୂତାବାସ ଆକ୍ରମଣ ଘଟଣା – ଅଧିକ ୭୫୦ ସେନା ମୁତୟନ କରିବ ଆମେରିକା

ବାଗଦାଦ: ଇରାକ ସ୍ଥିତ ଆମେରିକା ଦୂତାବାସ ଉପରେ ଇରାନ ସମର୍ଥକଙ୍କ ଆକ୍ରମଣ ଘଟଣାରେ ଆମେରିକା ସେଠାକୁ ଅଧିକ ସେନା ପଠାଇବାକୁ ନିଷ୍ପତ୍ତି ନେଇଛି। ଇରାନ ସମର୍ଥକମାନେ ଦୂତାବାସରେ ବଳ ପୂର୍ବକ ପ୍ରବେଶ କରିବାକୁ ଉଦ୍ୟମ କରିବା ସହ ନିଆଁ ଲଗାଇ ଦେଇଥିଲେ ଓ ‘ଆମେରିକାକୁ ହତ୍ୟା କର’ ବୋଲି ସ୍ଲୋଗାନ ଦେଇଥିଲେ। ହିଜବୁଲ୍ଲା ବ୍ରିଗେଡ ଉପରେ ଆମେରିକାର ଆକାଶମାର୍ଗରୁ ଆକ୍ରମଣ ଘଟଣାର ପ୍ରତିଶୋଧ ନେବାକୁ ପ୍ରଦର୍ଶନକାରୀମାନେ ଦୂତାବାସ ଉପରେ ଆକ୍ରମଣ କରିଥିବା ସ୍ପଷ୍ଟ ହୋଇଛି। ଆମେରିକାର ଆକାଶମାର୍ଗରୁ ଆକ୍ରମଣରେ ୨୫ ଜଣଙ୍କ ମୃତ୍ୟୁ ହୋଇଥିବା ବେଳେ ଶତାଧିକ ଆହତ ହୋଇଛନ୍ତି। ହିଜବୁଲ୍ଲା ବ୍ରିଗେଡ ସେନା ଆମେରିକାର ଜଣେ ଠିକାଦାରଙ୍କୁ ହତ୍ୟା କରିଥିବା ଅଭିଯୋଗ ହୋଇଛି।

ଆମେରିକା ବିଦେଶ ମନ୍ତ୍ରୀ ମାଇକ ପମ୍ପିଓ ଦୂତାବାସ ଉପରେ ଆକ୍ରମଣ ଘଟଣାକୁ ନିନ୍ଦା କରିବା ସହ ସେମାନଙ୍କୁ ଆତଙ୍କବାଦୀ ଅଭିହିତ କରିଛନ୍ତି। ପ୍ରଦର୍ଶନକାରୀମାନଙ୍କ ମଧ୍ୟରୁ ଜଣକୁ ଅବୁ ମହଦୀ ଅଲ ମୁହାଁଦିଶ ବୋଲି ଚିହ୍ନଟ କରାଯାଇଛି। ମୁହାଁଦିଶ ତେହେରାନ ସମର୍ଥିତ ହସଦ ଅଲ ଶାବି ଆତଙ୍କୀ ଗୋଷ୍ଠୀର ଅନତମ ପ୍ରମୁଖ ଅଟେ। ଆମେରିକା ମଧ୍ୟ ମୁହାଁଦିଶକୁ ଆକାଶ ମାର୍ଗରୁ ଆକ୍ରମଣରେ ଟାର୍ଗେଟ କରିଥିବା କୁହାଯାଇଛି।

ତେବେ ଆମେରିକୀୟ ପ୍ରତିଷ୍ଠାନଗୁଡିକ ଉପରେ ବୃଦ୍ଧି ପାଉଥିବା ଆକ୍ରମଣ ଦୃଷ୍ଟିରୁ କିଛି ଦିନ ମଧ୍ୟରେ ୭୫୦ ଜଣ ସେନାକୁ ଇରାକ ପଠାଯିବ ବୋଲି ଆମେରିକା ପ୍ରତିରକ୍ଷା ମନ୍ତ୍ରୀ ମାର୍କ ଏସ୍ପର କହିଛନ୍ତି।

Comments
Loading...