ମାଜିଷ୍ଟ୍ରେଟଙ୍କ ଉପସ୍ଥିତିରେ ମଦ ଦୋକାନ ପୁନଃ ସିଲ୍

ଖୁଣ୍ଟା : ଖୁଣ୍ଟା ଥାନା ଅଧିନ କରକଚିଆ ବଜାର ଛକରେ ଥିବା ବିଦେଶୀ ଠିପି ବନ୍ଦ ମଦ ଦୋକାନର ସିଲ ଟେମ୍ପରିଂ କରାଯାଇଥିବା ଜଣାପଡିବା ପରେ ଗୁରୁବାର ମାଜିଷ୍ଟ୍ରେଟଙ୍କ ଉପସ୍ଥିତିରେ ପୁନଃ ସିଲ କରିଛି ଖୁଣ୍ଟା ଅବକାରୀ ବିଭାଗ। ଦ୍ୱିତୀୟ ପର୍ଯ୍ୟାୟ ଲକଡାଉନ ଆରମ୍ଭରେ ଏହି ଥାନା ଅଧୀନରେ ଥିବା କରକଚିଆ ବିଦେଶୀ ଠିପି ବନ୍ଦ ମଦ ଦୋକାନର ସିଲ ଟେମ୍ପରିଂ କରାଯାଇ ବେଆଇନ ମଦ ଚାଲାଣ କରାଯାଇଥିବା ବାବଦରେ ବୁଧବାର ରାତିରେ ମାଜିଷ୍ଟ୍ରେଟ ତଥା ଖୁଣ୍ଟା ତହସିଲଦାର ସ୍ମରଣ କୁମାର ପୃଷ୍ଟି ଖବର ପାଇଥିଲେ। ଗୁରୁବାର ପୂର୍ବାହ୍ନରେ ଶ୍ରୀଯୁକ୍ତ ପୃଷ୍ଟି ସ୍ଥାନୀୟ ଅବକାରୀ ଉପ ନିରୀକ୍ଷକ ରାଜୀବ କୁମାରଙ୍କ ସହିତ ଘଟଣାସ୍ଥଳକୁ ଗସ୍ତ କରିଥିଲେ। ଲକଡାଉନ ଆରମ୍ଭରେ କରାଯାଇଥିବା ମଦ ଦୋକାନର ସିଲକୁ ଟେମ୍ପରିଂ କରାଯାଇ ତଲାରେ ଚାବି ଲାଗିବା ଭଳି କଣା କରାଯାଇଥିବା ଦେଖିବାକୁ ମିଳିଥିଲା। ଦୋକାନ ଦାୟିତ୍ୱରେ ଥିବା କର୍ମଚାରୀ ଉପସ୍ଥିତିରେ ମାଜିଷ୍ଟ୍ରେଟଙ୍କ ନିର୍ଦେଶରେ ସେହି ସିଲ ଉପରେ ପୁନଃ ସିଲ କରାଯାଇଥିଲା। ତେବେ ଆଶ୍ଚର୍ୟ୍ୟଜନକ ଭାବେ ଦୋକାନର ଗଚ୍ଛିତ ମଦର ପରିମାଣ ଆକଳନ କରାଯାଇନଥିଲା। ଖୁଣ୍ଟା ଥାନା ତଥା ଅବକାରୀ ଅଂଚଳରେ କିଛିଦିନ ହେବ ଲଗାତାର ଭାବେ ବିଭିନ୍ନ ସ୍ଥାନରେ ବିପୁଳ ବିଦେଶୀ ମଦ ଜବତ ହେବା, ବନ୍ଦ ମଦ କାଉଣ୍ଟର ପାର୍ଶ୍ୱ କୋଠରୀରୁ ପେଟିପେଟି ମଦ ଜବତ ହେବା, ସର୍ବପରି ଦୋକାନର ସିଲକୁ କୌଶଳପୂର୍ଣ୍ଣ ଉପାୟରେ କାଟିବା ଘଟଣାରୁ ବିଦେଶୀ ମଦ ବ୍ୟବସାୟ ଲକଡାଉନର କଡା ଆଇନ ଆଢୁଆଳରେ ଆବଧରେ ଚାଲିଛି ବୋଲି କହିହେବ।

Comments are closed.