ଆଖଣ୍ଡଳମଣିଙ୍କ ମନ୍ଦିରରେ ୨୧ଦିନ ବ୍ୟାପୀ ଚନ୍ଦନଯାତ୍ରା ଆରମ୍ଭ, କୋଭିଡ କଟକଣା ସହ ଭିତରବେଢାରେ ଚାପନୀତି ସମ୍ପନ୍ନ

ଆରଡି: ଶନିବାର ପବିତ୍ର ଅକ୍ଷୟତୃତୀୟା ଠାରୁ ଉତ୍କଳଭଉଁରୀ ଯାଏଁ ୨୧ଦିନ ଧରି ଚାଲିବ ବାବା ଆଖଣ୍ଡଳମଣିଙ୍କ ଚନ୍ଦନଯାତ୍ରା। ଏଥିପାଇଁ ମଣିବାବାଙ୍କ ମନ୍ଦିରରେ ଅନୁଷ୍ଠିତ ହୋଇଥିଲା ସ୍ବତନ୍ତ୍ର ନୀତିକାନ୍ତୀ। ଭୋର ୪ଟାରେ ଦ୍ବାରଫିଟା ଯିବା ପରେ ମଙ୍ଗଳ ଆଳତୀ, ମହାସ୍ନାନ, ଘର୍ଷଣଲାଗି, ଜଳାଭିଷେକ ନୀତି ସରିବା ପରେ ନବବସ୍ତ୍ର, ଫୁଲ, ଚନ୍ଦନ ଲାଗି କରାଯାଇ ଦିଗମ୍ବରବେଶରେ ବାଲ୍ୟଭୋଗ ଅର୍ପଣ କରାଯାଇଥିଲା ମଣିବାବାଙ୍କୁ। ଏହାପରେ ଚନ୍ଦନ ନୀତିକାନ୍ତି ନିମନ୍ତେ ମଣିବାବାଙ୍କ ଚଳନ୍ତିପ୍ରତିମା ଚନ୍ଦ୍ରଶେଖରଙ୍କୁ ଏକ ସୁସଜ୍ଜିତ ବିମାନରେ ବିଜେ କରାଯାଇ ମନ୍ଦିର ବେଢା ପରିକ୍ରମା କରାଯିବା ସହ ମୁକ୍ତିମଣ୍ଡପକୁ ବିଜେ କରାଯାଇଥିଲା। ସେଠାରେ ସେବାୟତମାନେ କୋଭିଡ କଟକଣା ଅନୁଯାୟୀ ସମସ୍ତ ନୀତିକାନ୍ତି ଆରମ୍ଭ କରିଥିଲେ।

 

ପ୍ରଥମଦିନରେ ରୀତିନୀତି ଅନୁଯାୟୀ ଚାପନୀତି ନିମନ୍ତେ ଘଟସ୍ଥାପନ, ଦ୍ବାରପାଳପୂଜା, ମହାସ୍ନାନ, ଚନ୍ଦନଲାଗି କରାଯିବା ସହ ଷୋଡଶ ଉପଚାର ନୀତିରେ ସମସ୍ତ ପୂଜାର୍ଚ୍ଚନା କରାଯାଇଥିଲା। ଚଳିତବର୍ଷ ମହାମାରୀ କରୋନାର ସଂକ୍ରମଣକୁ ଦୃଷ୍ଟିରେ ରଖି ସମସ୍ତ ଚନ୍ଦନନୀତି ମନ୍ଦିର ଭିତରବେଢାରେ ସମ୍ପନ୍ନ କରାଯିବ ବୋଲି ଭଦ୍ରକ ଉପଜିଲାପାଳ ପିତାମ୍ବର ସାମଲ ପ୍ରକିଶ କରିଛନ୍ତି। ଏପଟେ ଚାପଖେଳ ଶିବଗଙ୍ଗା ପୁଷ୍କରିଣୀରେ ବନ୍ଦ ରଖାଯିବା ସହ ପୀଠରେ ୧୪୪ଧାରା ଜାରୀ କରାଯାଇଥିବା ମନ୍ଦିର ପରିଚାଳକ ବିଦ୍ୟାଧର ପଲାଇ କହିଛନ୍ତି।

Comments
Loading...