ନୂଆଦିଲ୍ଲୀ : ପାକିସ୍ତାନର ଆଉ ଏକ ବଦମାସି ଯୋଗୁଁ ରୁଷ୍ ଦ୍ବାରା ଆୟୋଜିତ ସାଙ୍ଘାଇ ସହଯୋଗ ସଂଗଠନ(ଏସସିଓ) ସଦସ୍ୟ ରାଷ୍ଟ୍ରଙ୍କ ଜାତୀୟ ସୁରକ୍ଷା ପରାମର୍ଶଦାତା ବୈଠକର ଅଧାରୁ ଉଠିଆସିଲା ଭାରତ। ପାକିସ୍ତାନ ଏସସିଓ ବୈଠକର ନୀତି ଓ ନିୟମକୁ ଗୁରୁତର ଉଲ୍ଲଙ୍ଘନ କରିଥିବା ଭାରତ ଅଭିଯୋଗ ଦର୍ଶାଇଛି। ରୁଷ୍ର ନିମନ୍ତ୍ରଣ କ୍ରମେ ଭାରତ ଏହି ଭର୍ଚୁଆଲ ବୈଠକରେ ଯୋଗ ଦେଇଥିଲା। ଜାତୀୟ ସୁରକ୍ଷା ପରାମର୍ଶଦାତା ଅଜିତ୍ ଡୋଭାଲ ଭାରତର ପ୍ରତିନିଧିତ୍ବ କରୁଥିଲେ। ତେବେ ବୈଠକ ଆରମ୍ଭ ହେବା କ୍ଷଣି ପାକିସ୍ତାନ ପ୍ରତିପକ୍ଷ ବସିଥିବା ଆସନ ପଛପଟେ ଲଗାଯାଇଥିବା ଏକ ବ୍ୟାନର୍ରେ ପାକିସ୍ତାନ ତ୍ରୁଟିପୂର୍ଣ୍ଣ ମାନଚିତ୍ର ଲଗାଇଥିଲା। ଏଥିରେ ଭାରତର ଭୂଖଣ୍ଡ କାଶ୍ମୀରକୁ ପାକିସ୍ତାନ ନିଜର ଅଞ୍ଚଳ ଦର୍ଶାଇ ଏହି ମାନଚିତ୍ରରେ ସ୍ଥାନ ଦେଇଥିବାରୁ ଶ୍ରୀ ଡୋଭାଲ ଏହାର ତୀବ୍ର ବିରୋଧ କରିଥିଲେ। ବ୍ୟାକ୍ଡ୍ରପ୍(ପରଦା ପଛ)ରୁ ଏହି ତ୍ରୁଟିପୂର୍ଣ୍ଣ ମାନଚିତ୍ରକୁ ତୁରନ୍ତ ଅପସାରଣ କରିବା ଲାଗି ସେ ଦୃଢ ଦାବି କରିଥିଲେ। ରୁଷ୍ ପକ୍ଷରୁ ମଧ୍ୟ ବାରମ୍ବାର ଏନେଇ ପାକିସ୍ତାନ ପ୍ରତିପକ୍ଷଙ୍କୁ କୁହାଯାଇଥିଲା; ମାତ୍ର ପାକିସ୍ତାନ ଏହାକୁ ନଶୁଣିବା ଭଳି ମନୋଭାବ ପ୍ରଦର୍ଶନ କରିବାରୁ ଭାରତ ଉକ୍ତ ବୈଠକ ଅଧାରୁ ଉଠିଆସିଥିବା ଭାରତୀୟ ବିଦେଶ ବ୍ୟାପାର ମୁଖପାତ୍ର ଅନୁରାଗ ଶ୍ରୀବାସ୍ତବ ସୂଚନା ଦେଇଛନ୍ତି। ଏସିସିଓ ବୈଠକରେ ଏଭଳି ତ୍ରୁଟିପୂର୍ଣ୍ଣ ମାନଚିତ୍ର ଲଗାଇ ପାକିସ୍ତାନ ବୈଠକର ନିୟମାବଳୀକୁ ଉଲ୍ଲଙ୍ଘନ କରିଥିବା ଭାରତ ପକ୍ଷରୁ ବୈଠକର ଆୟୋଜକ ତଥା ଅଧ୍ୟକ୍ଷ ରୁଷ୍ ପ୍ରତିପକ୍ଷଙ୍କ ଆଗରେ କଠୋର ଆପତ୍ତି କରିଛି।
ସୂଚନାଯୋଗ୍ୟ, କାଶ୍ମୀର ଭାରତର ଅବିଚ୍ଛେଦ୍ୟ ଅଙ୍ଗ ହୋଇଥିବାବେଳେ ଏସିସିଓ ଚାର୍ଟର ଅନୁଯାୟୀ, ପ୍ରତ୍ୟେକ ସଦସ୍ୟ ରାଷ୍ଟ୍ର ପରସ୍ପରର ସାର୍ବଭୌମତ୍ବକୁ ସମ୍ମାନ ଦେବା ନିୟମ ରହିଛି। ମାତ୍ର ପାକିସ୍ତାନ ଏହାର ବିରୋଧାଚରଣ କରିଥିବାରୁ ରୁଷ୍ ପ୍ରତିପକ୍ଷ ନିକୋଲାଇ ପାଟ୍ରୁସେଭ୍ ମଧ୍ୟ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ପାକିସ୍ତାନର ଏଭଳି ଉତ୍ତେଜନା ସୃଷ୍ଟିକାରୀ କାର୍ଯ୍ୟକୁ ସେ କଠୋର ନିନ୍ଦା କରିଛନ୍ତି।
Comments are closed.