ଜୟପୁର : ରାଜସ୍ଥାନ ବିଧାନସଭା ନିର୍ବାଚନ ପାଇଁ କଂଗ୍ରେସ ଶୁକ୍ରବାର ୧୫୨ ଜଣିଆ ପ୍ରାର୍ଥିତାଲିକା ପ୍ରକାଶ କରିଛି। ପ୍ରଦେଶ କଂଗ୍ରେସ ମୁଖ୍ୟ ସଚିନ ପାଇଲଟ ଟୋଙ୍କ ବିଧାନସଭା ଆସନରୁ ପାର୍ଥୀ ହୋଇଥିବାବେଳେ ଦଳର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ସର୍ଦାରପୁରା ବିଧାନସଭା ଆସସନରୁ ପ୍ରାର୍ଥୀ ହୋଇଛନ୍ତି। କଂଗ୍ରେସର ଏହି ତାଲିକାରେ ସମସ୍ତ ବରିଷ୍ଠ ନେତାଙ୍କ ନାମ ରହିଛି। ଗୁରୁବାର କଂଗ୍ରେସ କେନ୍ଦ୍ରୀୟ ନିର୍ବାଚନ କମିଟି ବୈଠକରେ ରାଜସ୍ଥାନର ୨୦୦ ବିଧାନସଭା ଆସନ ପାଇଁ ପ୍ରାର୍ଥୀ ଚୟନ କରାଯାଇଥିଲା। ସେହି କ୍ରମରେ ଶୁକ୍ରବାର ପ୍ରାର୍ଥୀ ତାଲିକା ପ୍ରକାଶ ପାଇଛି।
ସୂଚନା ଅନୁସାରେ ଗୁରୁବାର ସୋନିଆ ଗାନ୍ଧୀଙ୍କ ଦିଲ୍ଲୀସ୍ଥିତ ଆବାସରେ କଂଗ୍ରେସ କେନ୍ଦ୍ରୀୟ ନିର୍ବାଚନ କମିଟିର ବୈଠକ ହୋଇଥିଲା। ଏହି ବୈଠକରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ, ଅହମଦ ପଟେଲ, ଅମ୍ବିକା ସୋନି, ଅଶୋକ ଗେହଲଟ୍, ସଚିନ ପାଇଟଲଙ୍କ ସମେତ ରାଜସ୍ଥାନ କଂଗ୍ରେସର ୪ ସାଧାରଣ ସମ୍ପାଦକ ବିବେକ ବଂସଲ, ଯୋଗେନ୍ଦ୍ର ଯାଦବ, ତରୁଣ କୁମାର, କାଜି ନିଜାମୁଦ୍ଦିନ ଉପସ୍ଥିତ ଥିଲେ। ରାଜସ୍ଥାନ ବିଧାନସଭା ନିର୍ବାଚନ ପାଇଁ ନଭେମ୍ବର ୧୯ରୁ ନାମାଙ୍କନ ପତ୍ର ଦାଖଲ ଆରମ୍ଭ ହେବ। ନଭେମ୍ବର ୨୦ ନାମାଙ୍କନପତ୍ର ଯାଞ୍ଚ ଓ ନଭେମ୍ବର ୨୨ ପାର୍ଥିପତ୍ର ପ୍ରତ୍ୟାହାରର ଶେଷ ତାରିଖ ରହିଛି। ଡିସେମ୍ବର ୭ରେ ଭୋଟ ଗ୍ରହଣ ଓ ୧୧ରେ ଭୋଟ ଗଣତି ହେବ।
