ଆଇନଜୀବୀଙ୍କ ଆନ୍ଦୋଳନ ଜାରି ; ମୁଖ୍ୟମନ୍ତ୍ରୀଙ୍କ କୁଶ ପୁତ୍ତଳିକା ଦାହ

0

କଟକ/ଭଦ୍ରକ : ଆଇନଜୀବୀଙ୍କ ଆନ୍ଦୋଳନ ଥମିବାର ନାଁ ଧରୁ ନାହିଁ । ବୁଧବାର ମଧ୍ୟ ଆଇନଜୀବୀମାନଙ୍କ କାର୍ଯ୍ୟବନ୍ଦ ଆନ୍ଦୋଳନ ଜାରି ରହିଛି। ଆଇନଜୀବୀମାନେ ଆଜି ହାଇକୋର୍ଟ ବାର୍‍ ଆସୋସିଏସନ୍‍ ପାଖରୁ ଏକ ଶୋଭାଯାତ୍ରାରେ ବାହାରି କଟକ ଜିଲ୍ଲା ଦୌରାଜଜ୍‍ଙ୍କ କୋର୍ଟ ସମ୍ମୁଖକୁ ଯାଇଥିଲେ। ସେଠାରେ ମୁଖ୍ୟମନ୍ତ୍ରୀଙ୍କ କୁଶପୁତ୍ତଳିକା ଦାହ କରିଥିଲେ। ଅପରପକ୍ଷେ ଅଗଷ୍ଟ ୨୮ ତାରିଖରେ ପୁଲିସ୍‍ ମାଡ଼ର ଶିକାର ହୋଇଥିବା ଆଇନଜୀବୀଙ୍କ ମାମଲାର ଶୁଣାଣି ଆସନ୍ତା ୧୨ ତାରିଖକୁ ହାଇକୋର୍ଟ ଘୁଞ୍ଚାଇ ଦେଇଛନ୍ତି। ଆଇନଜୀବୀ ଜଣଙ୍କ ତାଙ୍କ ନାଁରେ ହୋଇଥିବା ବିଭିନ୍ନ ମାମଲାକୁ ରଦ୍ଦ କରିବା ପାଇଁ ହାଇକୋର୍ଟର ଦ୍ୱାରସ୍ଥ ହୋଇଥିଲେ।

ଦୁଇ ଦିନ ତଳେ ଅଣ ଓକିଲଙ୍କ ଜରିଆରେ ବିଜୁ ଆଇନଜୀବୀ ସାମୁଖ୍ୟର କର୍ମକର୍ତ୍ତାମାନେ ହାଇକୋର୍ଟରେ ଆଇନଜୀବୀଙ୍କ ଆନ୍ଦୋଳନକୁ ଭଣ୍ଡୁର କରିବା ପାଉଁ ଉଦ୍ୟମ କରିଥିଲେ ବୋଲି ଅଭିଯୋଗ ହୋଇଥିଲା । ଏହାସହ ଗଣ୍ଡଗୋଳକୁ ନେଇ ସାରା ରାଜ୍ୟର ବିଭିନ୍ନ ସ୍ଥାନରେ ଆଇନଜୀବୀମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ରାଜ୍ୟର ବିଜେଡି ସରକାର ଓ ମୁଖ୍ୟମନ୍ତ୍ରୀ ଆଇନଜୀବୀଙ୍କ ଶାନ୍ତିପୂର୍ଣ୍ଣ ଆନ୍ଦୋଳନକୁ ଭଣ୍ଡୁର କରିବା ପାଇଁ ଉସକାଇଥିବା ଅଭିଯୋଗ କରାଯାଇଛି । ଏନେଇ ସାରା ରାଜ୍ୟର ବିଭିନ୍ନ ସ୍ଥାନରେ ଆଇନଜୀବୀମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କୁଶ ପୁତ୍ତଳିକା ଦାହ କରିଛନ୍ତି।
ଏହାସହ ଭଦ୍ରକ କୋର୍ଟ ପରିସରରେ ମଧ୍ୟ ମୁଖ୍ୟମନ୍ତ୍ରୀଙ୍କ କୁଶ ପୁତ୍ତଳିକା ଦାହ କରାଯାଇଛି।

Comments
Loading...