ମୁମ୍ବଇ: କଳାକାର ଜଗତରେ ଖେଳିଯାଇଛି କଳା ବାଦଲ। ଜଣକ ପରେ ଜଣେ କଳାକାର ଆତ୍ମହତ୍ୟା କରିବା ଘଟଣା ସିନେପ୍ରେମୀଙ୍କୁ ଚିନ୍ତାରେ ପକାଇଛି। ଅଭିନେତା ସୁଶାନ୍ତ ସିଂହ ରାଜପୁତ, ସମୀର ଶର୍ମାଙ୍କ ଆତ୍ମହତ୍ୟା ଘଟଣା ମନରୁ ଲିଭି ନ ଥିବାବେଳେ ଆଉ ଜଣେ ଅଭିନେତ୍ରୀ ଅନୁପମା ପାଠକ ଆତ୍ମହତ୍ୟା କରିଛନ୍ତି। ଗତ ୨ ତାରିଖରୁ ସେ ଆତ୍ମହତ୍ୟା କରିଥିବାବେଳେ ଶୁକ୍ରବାର ଏହା ଲୋକଲୋଚନକୁ ଆସିଛି। ଅନୁପମା ଭୋଜପୁରୀ ଚଳଚ୍ଚିତ୍ର ଇଣ୍ଡଷ୍ଟ୍ରୀର ଜଣେ ଖ୍ୟାତନାମା ଅଭିନେତ୍ରୀ। ମୁମ୍ବଇର ଦହିଦାର ଅଞ୍ଚଳରେ ଥିବା ତାଙ୍କ ବାସଭବନରୁ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କରିଛି ପୁଲିସ। ସେ ଏ ସୁଇସାଇଡ୍ ନୋଟ୍ ମଧ୍ୟ ଛାଡ଼ିଯାଇଛନ୍ତି। ଠକେଇ ଯୋଗୁ ସେ ଏପରି ଚରମ ପଦକ୍ଷେପ ନେଇଥିବା ସେଥିରେ ଉଲ୍ଲେଖ କରିଛନ୍ତି। ପୁଲିସ ଏହାକୁ ଜବତ କରି ତଦନ୍ତ ଆରମ୍ଭ କରିଛି।
୪୦ ବର୍ଷୀୟା ଅନୁପମାଙ୍କ ଘର ବିହାରର ପାଟନାରେ। ସେ ଭୋଜପୁରୀ ଇଣ୍ଡଷ୍ଟ୍ରୀରେ କାମ କରିବା ଲାଗି ମୁମ୍ବଇ ଆସିଥିଲେ। ଆତ୍ମହତ୍ୟା ପୂର୍ବରୁ ସେ ଫେସବୁକରେ ଏକ ଭିଡିଓ ପୋଷ୍ଟ କରିଥିଲେ। ସେଥିରେ ସେ ଏକ ଠକେଇର ଶିକାର ହୋଇଥିବା ବିଷୟରେ କହିଥିଲେ। ଅନୁପମା ମାଲାଦରେ ଥିବା ୱଜଡମ ପ୍ରଡ୍ୟୁସର ନାମକ ଏକ କମ୍ପାନୀରେ ୧୦ ହଜାର ଟଙ୍କା ନିବେଶ କରିଥିଲେ। ଏହାର ମ୍ୟାଚୁରିଟି ୨୦୧୯ ଡିସେମ୍ବରରେ ଶେଷ ହୋଇଥିଲା। କିନ୍ତୁ କମ୍ପାନୀ ପକ୍ଷରୁ ତାଙ୍କୁ ଟଙ୍କା ଦିଆଯାଇ ନ ଥିଲା। ଲକଡାଉନ ସମୟରେ ରୋଜଗାର ବନ୍ଦ ହୋଇଯାଇଥିବାରୁ ଅନୁପମା ଠକେଇର ଶିକାର ହେବା ପରେ ଏପରି ପଦକ୍ଷେପ ନେଇଥିବା କୁହାଯାଉଛି।
Comments are closed.