କମ୍ ସୁଧରେ ଫେସବୁକ୍ ଦେଉଛି ୫୦ ଲକ୍ଷ ଲୋନ୍
ନୂଆଦିଲ୍ଲୀ: ଏଣିକି ଫେସବୁକ୍ ଦେବ ଲୋନ୍ । ଆପଣ ଫେସବୁକରୁ ଲୋନ ନେଇ କିଛି ବ୍ୟବସାୟ କରିପାରିବେ । କାରଣ ଫେସବୁକ୍ ପରି ଏକ ବଡ଼ ସୋସିଆଲ ମିଡିଆ ପ୍ଲାଟଫର୍ମ ତାର ଗ୍ରାହକ ମାନଙ୍କ ପାଇଁ ଏକ ସ୍ମଲ ବିଜନେସ ପ୍ଲାନ ଆରମ୍ଭ କରୁଛି । ଯାହାଦ୍ୱରା ଆପଣ ଗୋଟିଏ ନୂଆକରି ବ୍ୟବସାୟ ଆରମ୍ଭ କରିବା ସହ ପୁରୁଣା ବ୍ୟବସାୟକୁ ବଢ଼େଇ ପାରିବେ । ଆଉ ଆପଣଙ୍କୁ ଫେସବୁକ୍ ଲୋନ ଆକାରରେ ଦେବ ୫୦ ଲକ୍ଷ ଟଙ୍କା ।
ଯଦି ଆପଣ କୌଣସି ଏକ ସ୍ମଲ୍ ବିଜନେସ୍ ଆରମ୍ଭ କରୁଛନ୍ତି, ତାହେଲେ ଆପଣ ଫେସବୁକ୍ ମାଧ୍ୟମରେ ଆପଣଙ୍କ ବ୍ୟବସାୟକୁ ବଢ଼ାଇପାରିବେ । କେବଳ ଆପଣ ବିଜ୍ଞାପନ ଜରିଆରେ ନୁହେଁ ବରଂ ଏବେ ଫେସବୁକ୍ ଆପଣଙ୍କୁ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଲୋନ୍ ଦେବ । ସବୁଠାରୁ ବଡ଼କଥା ହେଉଛି ଫେସବୁକ୍ ଏହି ଲୋନ ଦେବା ସମୟରେ ଆପଣଙ୍କ ଠାରୁ କୌଣସି ଜିନିଷର ବନ୍ଧକ ରଖିବ ନାହିଁ । ଆଉ ମହିଳା ବ୍ୟବସାୟୀଙ୍କ ପାଇଁ ୦.୨% କମ୍ ସୁଧରେ ଲୋନ ଦେବ ।
ଏହି ଲୋନ୍ ବ୍ୟବସ୍ଥାକୁ ଦେଶରେ ୩୦୦ରୁ ଅଧିକ ସହରରେ ଉପଲବ୍ଧ କରାଯାଉଛି । ପ୍ରଥମ ପର୍ୟ୍ୟାୟରେ ୨ଶହ ସହରରେ ଏହି ସେବା ଉପଲବ୍ଧ କରାଯାଇଥିଲା । ପରେ ଏହାକୁ ୩୨୯ଟି ସହରରେ ପ୍ରଦାନ କରୁଛି । ଫେସବୁକର ଏହି ସୁବିଧା ଭାରତର ବହୁ ଛୋଟଛୋଟ ବ୍ୟବସାୟୀ ନେଉଛନ୍ତି । ଦିନକୁ ଦିନ ଫେସବୁକର ଲୋକପ୍ରିୟତା ବଢ଼ୁଥିବାରୁ ଲୋକଙ୍କ କାମକୁ ସହଜ କରିବା ପାଇଁ ଫେସବୁକ୍ ଏପରି ପ୍ରୟାସ କରୁଛି । ଏହି ଋଣ ପାଇଁ ଫେସବୁକ ଦୁଇଟି ସରଳ ସର୍ତ୍ତ ରଖିଛି । ପ୍ରଥମଟି ହେଉଛି ଏଥି ପାଇଁ ଆବେଦନ କରୁଥିବା ବ୍ୟକ୍ତି ଭାରତୀୟ ହୋଇଥିବା ଆବଶ୍ୟକ । ଏବଂ ତାଙ୍କ ବ୍ୟବସାୟ ଭାରତୀୟ ସହରରେ ହେବା ଉଚିତ୍ । ଦ୍ୱିତୀୟ ସର୍ତ୍ତ ହେଉଛି ଗତ ୬ ମାସ ଆପଣ ମେଟା କିମ୍ବା ଫେସବୁକ୍ ସହିତ ଜଡିତ ରହିଥିବା ଦରକାର । ତାହା ସହ ବ୍ୟବସାୟ ପାଇଁ ବିଜ୍ଞାପନ ଦେଉଥିବା ନିହାତି ଆବଶ୍ୟକ । ଏହି ଦୁଇଟି ସର୍ତ୍ତ ଆପଣ ପୂରଣ କରିପାରିଲେ ଆପଣ ଫେସବୁକରୁ ଲୋନ ନେଇପାରିବେ । ତେବେ ଆସନ୍ତୁ ଜାଣିବା କିପରି ଆବେଦନ କରିବେ ।
ଫେସବୁକ୍ ଲୋନ୍ ଦେବା ପୂର୍ବରୁ ଏଥିପାଇଁ ଆପଣଙ୍କୁ ଏକ ଫର୍ମ ପୂରଣ କରିବାକୁ ପଡିବ । ଫେସବୁକ୍ ସ୍ମଲ୍ ବିଜନେସ୍ ଲୋନ୍ସ ଇନିସିଏଟିଭର ପେଜକୁ ଯାଇ ଆପଣ ଅନଲାଇନରେ ଫର୍ମ ପୂରଣ କରିବେ । ଯଦି ଆପଣଙ୍କ ଲୋନ୍ ମଞ୍ଜୁର ହେଉଛି ତାହେଲେ ତିନି ଦିନ ଭିତରେ ଟଙ୍କା ଆପଣଙ୍କୁ ମିଳିଯିବ । ମଧ୍ୟ, ଏହି ଋଣ ପାଇଁ ସୁଧ ହାର ପୂର୍ବରୁ ସ୍ଥିର ହୋଇସାରିଛି, ଯାହାକି ବାର୍ଷିକ ୧୭ ରୁ ୨୦ ପ୍ରତିଶତ ମଧ୍ୟରେ ରହିବ ।
Comments are closed.