ଶ୍ରମିକଙ୍କୁ ମିଳିଲା ହୀରାଠାରୁ ମୂଲ୍ୟବାନ ରତ୍ନ ପଥର; ମାସକରେ ପାଇଲେଣି ୩୮ କୋଟି ଟଙ୍କାର ଦୁର୍ଲଭ ରତ୍ନ

ଡ଼ୋଡ଼ୋମା: କୁହାଯାଏ ଯେତେବେଳେ ଈଶ୍ଵର ଦେବା ପାଇଁ ଇଚ୍ଛା କରନ୍ତି, ସେତେବେଳେ ଛପର ଫାଡ଼ି ଅଜାଡ଼ି ଦିଅନ୍ତି । ତାଞ୍ଜାନିଆରେ ରହୁଥିବା ସୌନିନିଉ ଲୈଜେର ନାମକ ଜଣେ ଶ୍ରମିକଙ୍କ କ୍ଷେତ୍ରରେ ତାହା ଅକ୍ଷରେ ଅକ୍ଷରେ ସତ ସାବ୍ୟସ୍ତ ହୋଇଛି । ସୂଚନା ଅନୁସାରେ ତାଞ୍ଜାନିଆର ଏକ ଖଣିରେ କାମ କରୁଥିବା ସୌନିନିଉ ଖୋଳିବା ବେଳେ ୧୩.୯ ପାଉଣ୍ଡ (୬.୩ କିଲୋ) ଓଜନର ତାଞ୍ଜାନାଇଟ୍ ରତ୍ନ (Tanzanite Gemstones) ତାଙ୍କ ହାତରେ ଲାଗିଥିଲା । ଯାହାକି ବିକ୍ରି କରି ସେ ଭାରତୀୟ ମୁଦ୍ରାରେ ୧୪.୭ କୋଟି ଟଙ୍କା ପାଇଛନ୍ତି । ଏହା ପୂର୍ବରୁ ଜୁନ୍ ୧ ତାରିଖରେ ତାଙ୍କୁ ଆଉ ଏକ ତାଞ୍ଜାନାଇଟ୍ ରତ୍ନ ମିଳିଥିଲା, ଯାହାକୁ ବିକ୍ରି କରି ସେ ୨୩.୫ କୋଟି ଟଙ୍କା ପାଇଥିଲେ ।
ତାଞ୍ଜାନାଇଟ୍ ଜେମଷ୍ଟୋନ କେବଳ ଉତ୍ତର ତାଞ୍ଜାନିଆରେ ମିଳିଥାଏ ଏବଂ ଏହାକୁ ରତ୍ନ ଆଭୂଷଣ ପ୍ରସ୍ତୁତିରେ ବ୍ୟବହାର କରାଯାଇଥାଏ । ଏହା ପୃଥିବୀର ସବୁଠାରୁ ଦୁର୍ଲଭ ରତ୍ନ ମଧ୍ୟରେ ଗୋଟିଏ ଓ ସ୍ଥାନୀୟ ଭୂବିଜ୍ଞାନୀମାନଙ୍କ ଆକଳନ ଅନୁସାରେ ଏହି ପଥର ପ୍ରାୟ ୨୦ ବର୍ଷ ପରେ ପୃଥିବୀରେ ଆଉ ମିଳିବା ସମ୍ଭାବନା ନାହିଁ ।

୫୨ ବର୍ଷ ବୟସ୍କ ସୌନିନିଉ ଲେଜରଙ୍କୁ ତାଞ୍ଜାନିଆ ଅର୍ଥମନ୍ତ୍ରୀ ଫିଲିପ୍ ମ୍ପେ୍ୟାଗୀ ୪.୮ ବିଲିଅନ ତାଞ୍ଜାନିଆ ସିଲିଂ (୨.୧ ନିୟୁତ ଡ଼ଲାର)ର ଏକ ଡ଼ମି ଚେକ୍ ପ୍ରଦାନ କରାଯାଇଛି । ଏହାକୁ ନେି ସୌନିନିଉ ବେଶ ଖୁସି ଅଛନ୍ତି । ମୋତେ ଯେଉଁ ପରିମାଣର ଅର୍ଥ ପ୍ରଦାନ କରାଯାଇଛି ତାହା ସନ୍ତୋଜନକ ଓ ମୋର କିଛି ଅଭିଯୋଗ ନାହିଁ ବୋଲି ସେ କହିଛନ୍ତି ।

ସୌନିନିଉଙ୍କର ପିଲାପିଲି ସଂଖ୍ୟା ୩୨ । ସରକାରଙ୍କଠାରୁ ପାଇଥିବା ଟଙ୍କାରେ ସେ ଗୋଟିଏ ସ୍କୁଲ ଓ ଏକ ସପିଂ ମଲ ନିର୍ମାଣ କରିବା ପାଇଁ ଯୋଜନା କରିଛନ୍ତି । ଏତେ ଟଙ୍କା ପାଇବା ପରେ ମଧ୍ୟ ସେ ଯେଉଁ କାମ କରୁଥିଲେ ସେହି କାମ କରିବେ ଓ ପୋଷିଥିବା ୨୦୦୦ ଗାଇଗୋରୁଙ୍କ ଦେଖାଶୁଣା ପୂର୍ବପରି କରିବେ ବୋଲି ସୌନିନିଉ କହିଛନ୍ତି ।

Comments
Loading...