ବୁର୍ଲା ଡାକ୍ତରଖାନାରେ ଚିକିତ୍ସା ଅବହେଳା ଅଭିଯୋଗ, ଦୁର୍ଘଟଣାଗ୍ରସ୍ତ ଯୁବକଙ୍କ ମୃତ୍ୟୁ

ଟିଟିଲାଗଡ଼ : ଟିଟିଲାଗଡ ଥାନା ଅନ୍ତର୍ଗତ ଗୁଂଚିତରା ଗ୍ରାମ ନିକଟରେ ବୋଲେରୋ ଏବଂ ଦୁଇ ବାଇକ ଧକ୍କାରେ ଆହତ ଜଣେ ଯୁବକଙ୍କ ମୃତ୍ୟୁ ଘଟିଥିବା ଜଣାଯାଇଛି। ବୁର୍ଲା ଡାକ୍ତରଖାନାରେ ଚିକିତ୍ସା ଅବହେଲା ନେଇ ଯୁବକଙ୍କ ମୃତ୍ୟୁ ଘଟିଥିବା ଅଭିଯୋଗ ହୋଇଛି। ଏନେଇ ସୂଚନାରୁ ପ୍ରକାଶ ଯେ, ଗତ ସୋମବାର ଗୁଂଚିତରା ଗ୍ରାମ ନିକଟରେ ଏକ ବୋଲେରୋ ଏବଂ ଦୁଇ ବାଇକ ମଧ୍ୟରେ ଧକ୍କା ହୋଇଥିଲା। ଏଥିରେ ୪ ଜଣ ଆହତ ହୋଇଥିବା ଜଣାଯାଇଛି। ଆହତଙ୍କ ମଧ୍ୟରୁ ଦୁଇ ଜଣ ବୁର୍ଲା ଏବଂ ବିଶାଖାପାଟଣାରେ ଭର୍ତ୍ତି ହୋଇଥିବା ଜଣାଯାଇଛି। ଅନ୍ୟ ଜଣେ ଗୁରୁତର ଆହତ ଟିଟିଲାଗଡ ପୌରାଂଚଳ ଅନ୍ତର୍ଗତ ଟିଟିଡୁଙ୍ଗିର ପଡାର ରିଙ୍କୁ ପରିଡା (୩୫)ଙ୍କୁ ଦୁର୍ଘଟଣା ପରେ ପ୍ରଥମେ ଟିଟିଲାଗଡ ଏବଂ ସେଠାରୁ ବଲାଙ୍ଗିର ଭିମ ଭୋଇ ଡାକ୍ତରଖାନାକୁ ନିଆଯାଇଥିଲା। ତେବେ ବଲାଙ୍ଗିରରେ ଭର୍ତ୍ତି କରାଯାଇନଥିବା ବେଳେ ଡ୍ୟୁଟିରେ ଥିବା ଡାକ୍ତର ବୁର୍ଲା ସ୍ଥାନାନ୍ତର କରିଥିଲେ। ମଙ୍ଗଲବାର ରାତ୍ରି ୮ଟାରେ ବୁର୍ଲାରେ ଭର୍ତ୍ତି କରାଯାଇଥିବା ବେଳେ ରାତ୍ରି ୨ଟା ପର୍ଯ୍ୟନ୍ତ କେହି ଡାକ୍ତର ଚିକିତ୍ସା ପାଇଁ ନ ଆସିବାରୁ ନିଜେ ଆହତ ରିଙ୍କୁ ମୋତେ ବଲାଙ୍ଗିର ଫେରାଇନିଅ ବୋଲି କୁଆଡେ କହିଥିଲେ। ଏନେଇ ଫେରିବା ସମୟରେ ବାଟରେ ରିଙ୍କୁଙ୍କ ମୃତ୍ୟୁ ଘଟିଥିବା ବେଳେ ପରିବାର ଲୋକେ ବଲାଙ୍ଗିରରେ ନଅଟକି ସିଧାସଲଖ ଟିଟିଲାଗଡ ଚାଲିଆସି ବୁଧବାର ସକାଳୁ ପହଂଚିଥିଲେ। ଖବର ପାଇ ଟିଟିଲାଗଡ ଥାନା ଏସଆଇ ମନୋଜ ମୁଣ୍ଡା ପହଂଚି ଶବ ଜବତ ସହ ବ୍ୟବଚ୍ଛେଦ ପାଇଁ ପଠାଇଥିଲେ। ମୃତ ରିଙ୍କୁଙ୍କ ପରିବାରରେ ପତ୍ନୀ ତଥା ଦୁଇ ସନ୍ତାନ ଥିବା ବେଳେ ଅକାଳ ପରଲୋକ ବଜ୍ରାଘାତ ସଦୃଶ ହୋଇଛି। ପ୍ରଶାସନ ବୁର୍ଲା ଡାକ୍ତରଖାନାରେ ରିଙ୍କୁଙ୍କ ଚିକିତ୍ସାରେ ଅବହେଲା ସମ୍ବନ୍ଧରେ ତଦନ୍ତ ସହ ପରିବାରଙ୍କୁ ଉପଯୁକ୍ତ ସହାୟତା ପ୍ରଦାନ କରିବାକୁ ଏନେଇ ଟିଟିଲାଗଡ ନଗର ବିଜେପି ସାଧାରଣ ସମ୍ପାଦକ କୁନା ଭାଟି ଦାବି କରିଛନ୍ତି। ଏନେଇ ପୁଲିସ ବୋଲେରୋ ତଥା ବାଇକ ଜବତ ସହ ଅଧିକ ତଦନ୍ତ ଜାରି ରଖିଥିବା ଏସଆଇ ଶ୍ରୀ ମୁଣ୍ଡା କହିଛନ୍ତି।

Comments
Loading...