ଟ୍ରକ-ପିକଅପ ଭ୍ୟାନ ଧକ୍କାରେ ମୃତ୍ୟୁ ସଂଖ୍ୟା ୪ ; ୬ ଗୁରୁତର

ସୁୁବର୍ଣ୍ଣପୁର : ସୁବର୍ଣ୍ଣପୁର ଜିଲା ଉଲୁଣ୍ଡା ଥାନା ଅନ୍ତର୍ଗତ ମେଟାକାନୀ ନିକଟରେ ଶୁକ୍ରବାର ବିଳମ୍ବିତ ରାତିରେ ଟ୍ରକ-ପିକଅପ ଭ୍ୟାନ ଧକ୍କାରେ ହୋଇଥିବା ଦୁର୍ଘଟଣାରେ ମୃତ୍ୟୁ ସଂଖ୍ୟା ୪କୁ ବୃଦ୍ଧି ପାଇଛି। ବୁର୍ଲାରେ ଚିକିତ୍ସାଧୀନ ପିକଅପ ଭ୍ୟାନ ଚାଳକ ସମେତ ବ୍ୟାଣ୍ଡପାର୍ଟିର ୨ ଜଣ ଓ ଅନ୍ୟଙ୍କର ମୃତ୍ୟୁ ହୋଇଛି। ଭ୍ୟାନରେ ଥିବା ବ୍ୟାଣ୍ଡପାର୍ଟିର ଅନ୍ୟ ୬ ଜଣ ଗୁରୁତର ଏବେ ମଧ୍ୟ ଚିକିତ୍ସାଧୀନ ଅବସ୍ଥାରେ ରହିଛନ୍ତି।। ସୂଚନା ଅନୁଯାୟୀ, ସୋନପୁର-ସମ୍ବଲପୁର ରାସ୍ତାର ମେଟାକାନିରେ ହୋଇଥିବା ଏହି ଦୁର୍ଘଟଣାରେ ପ୍ରଥମେ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ୭  ଜଣ ଚିକିତ୍ସାଧୀନ ଅବସ୍ଥାରେ ଥିଲେ। ଉଲୁଣ୍ଡାରୁ ସମ୍ବଲପୁର ଅଭିମୁଖେ ଯାଉଥିବା ଉକ୍ତ ପିକଅପ ଭ୍ୟାନଟିର ବିପରୀତ ଦିଗରୁ ଆସୁଥିବା ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା। ଖବର ପାଇ ପୁଲିସ ଓ ଦମକଳ କର୍ମଚାରୀ ଘଟଣାସ୍ଥଳରେ ପହଞ୍ଚି ସଭିଁଙ୍କୁ ଉଦ୍ଧାର କରିଥିଲେ। ପୁଲିସ ଦୁର୍ଘଟଣାଗ୍ରସ୍ତ ଟ୍ରକ ଓ ଭ୍ୟାନକୁ ଜବତ କରିଛି। ଟ୍ରକର ଚାଳକ ଫେରାର ଥିବା ବେଳେ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି।