ମେଡିକାଲ ଅଫିସର ପରୀକ୍ଷା ଘୁଞ୍ଚାଇବା ଦାବିରେ ବିକ୍ଷୋଭ

ଭୁବନେଶ୍ଵର: ଓଡ଼ିଶା ଲୋକସେବା ଆୟୋଗ (ଓପିଏସସି) ଦ୍ବାରା ପରିଚାଳିତ ମେଡିକାଲ ଅଫିସର ପରୀକ୍ଷା ପାଇଁ କେନ୍ଦ୍ର ସଂଖ୍ୟା ବୃଦ୍ଧି କରାଯିବା, ନଚେତ ପରୀକ୍ଷା ଘୁଞ୍ଚାଇବାକୁ ଦାବି କରିଛି ଏବିଭିପି ମେଡିକାଲ ଛାତ୍ର ଫୋରମ ମେଡିଭିଜନ। ଏ ନେଇ ଫୋରମ ପକ୍ଷରୁ ସୋମବାର ଭୁବନେଶ୍ଵରରେ ବିକ୍ଷୋଭ ପ୍ରଦର୍ଶନ କରାଯାଇଛି।

ଏବିଭିପି ମେଡିକାଲ ଛାତ୍ର ଫୋରମ ମେଡିଭିଜନର ରାଜ୍ୟ ସଂଯୋଜକ ଡା. ଦେବକୀନନ୍ଦନ ସେନାପତି କହିଛନ୍ତି, ଆସନ୍ତା ୨୮ ତାରିଖରେ ଓପିଏସସି ପକ୍ଷରୁ ମେଡିକାଲ ଅଫିସର ପରୀକ୍ଷା ଅନୁଷ୍ଠିତ ହେବାର ରହିଛି। କିନ୍ତୁ କରୋନାର ୨ୟ ଲହର ଦ୍ରୁତଗତିରେ ବ୍ୟାପିଚାଲିଥିବାରୁ ଭୁବନେଶ୍ଵର ଏବଂ କଟକ ଭଳି ରାଜ୍ୟର ଦୁଇଟି ଜନବହୁଳ ସହରକୁ ରାଜ୍ୟ ଏବଂ ରାଜ୍ୟ ବାହାରର ଡାକ୍ତରଙ୍କୁ ଡକାଇ ପରୀକ୍ଷା କରାଇବାର ପରିଣାମ ଭୟଙ୍କର ହୋଇପାରେ। ତେଣୁ ଓପିଏସସି ଏହି ପରୀକ୍ଷାକୁ ଘୁଞ୍ଚାଇ ଦେଉ, ନଚେତ ପଶ୍ଚିମ, ଦକ୍ଷିଣ ଓ ପୂର୍ବ ଓଡ଼ିଶରେ ଅଧିକ ସଂଖ୍ୟକ ପରୀକ୍ଷା କେନ୍ଦ୍ର କରାଯାଉ ବୋଲି ସେ ଦାବି କରିଛନ୍ତି।

ବିକ୍ଷୋଭରେ ଏବିଭିପିର ରାଷ୍ଟ୍ରୀୟ କାର୍ଯ୍ୟକାରିଣୀ ସଦସ୍ୟା ସୁଶ୍ରୀ କବିତା କହଁର, ମେଡିଭିଜନର ପ୍ରତିନିଧି ଡା. ସ୍ବାଗତ ନାରାୟଣ ଦାଶ, ଡା. ସମୀର ଜେନା, ଡା. ଦୋଳଗୋବିନ୍ଦ ଆଚାର୍ଯ୍ୟ ପ୍ରମୁଖ ବିକ୍ଷୋଭରେ ସାମିଲ ଥିଲେ। ଦାବି ପୂରଣ ଲାଗି ଏକ ଚିଠିକୁ ମୁଖ୍ୟମନ୍ତ୍ରୀ, ସ୍ବାସ୍ଥ୍ୟମନ୍ତ୍ରୀ ଏବଂ ସ୍ବାସ୍ଥ୍ୟ ସଚିବଙ୍କୁ ମେଲ୍‌ ଜରିଆରେ ପଠାଯାଇଥିବା କୁହାଯାଇଛି।

Comments
Loading...