ଭାରତୀୟ ସୀମାରେ ପଶି କୃଷକଙ୍କୁ ପିଟିଲେ ପାକିସ୍ତାନୀ, ଅହପରଣ ଯୋଜନା ପଣ୍ଡ

ପଠାନକୋଟ: ଭାରତୀୟ ସୀମାରେ ପଶି ଜଣେ କୃଷକଙ୍କୁ ମାଡ଼ ମାରି ଅପହରଣ କରିନେବାକୁ କେତେଜଣ ପାକିସ୍ତାନୀ ଉଦ୍ୟମ କରିଛନ୍ତି। ପଞ୍ଜାବର ପଠାନକୋଟ ଅନ୍ତର୍ଗତ କସ୍‌ବା ବମିୟାଲର ଖୁଦାଇପୁର ଗାଁ ନିକଟ ଅନ୍ତର୍ଜାତୀୟ ସୀମା ପାଖରେ ଏହି ଘଟଣା ଘଟିଛି। ଚାଷୀ ଜଣକ ନିଜ କ୍ଷେତରେ କାମ କରୁଥିବା ବେଳେ ଅଭିଯୁକ୍ତ ଭାରତୀୟ ସୀମା ଡେଇଁ ତାଙ୍କୁ ଆକ୍ରମଣ କରିବା ସହ ଘୋଷାଡ଼ି ନେବାକୁ ଉଦ୍ୟମ କରିଥିଲେ।

ସୂଚନା ମୁତାବକ,  ଖୁଦାଇପୁର ଗାଁର ଚାଷୀ ସୁଖବୀର ସିଂହ ଲକ୍ଖା ମଙ୍ଗଳବାର ସକାଳ ସାଢ଼େ ୧୦ଟାରେ ଅନ୍ତର୍ଜାତୀୟ ସୀମାର ୯ନମ୍ବର ଗେଟ୍‌ ପାଖରେ ଥିବା ନିଜ କ୍ଷେତରେ କାମ କରୁଥିଲେ। ଏହି ସମ୍ରରେ ପଛରୁ ଜଣେ ଯୁବକ ଆସି ତାଙ୍କୁ ମାଡ଼ ମାରିଥିଲେ। ପରେ ତାଙ୍କୁ ପାକିସ୍ତାନ ସୀମା ପଟକୁ ଘୋଷାଡ଼ି ନେବାକୁ ଉଦ୍ୟମ କରିଥିଲେ। ତାଙ୍କ ଚିତ୍କାର ଶୁଣି ନିକଟରେ କାମ କରୁଥିବା ଅନ୍ୟ ଚାଷୀମାନେ ପହଞ୍ଚିବାରୁ ସମ୍ପୃକ୍ତ ଯୁବକ ପାକିସ୍ତାନ ସୀମା ପଟକୁ ଦୌଡ଼ି ପଳାଇଥିଲେ। ପାକ୍‌ ସୀମା ନିକଟରେ ଆହୁରି ୩ ଜଣ ଯୁବକ ଅସ୍ତ୍ରଶସ୍ତ୍ର ଧରି ଛିଡ଼ା ହୋଇଥିବା ଚାଷୀମାନେ ଦେଖିବାକୁ ପାଇଥିଲେ। ଏ ସମ୍ପର୍କରେ ସୁଖବୀର ବମିୟାଲ ଥାନାରେ ଅଭିଯୋଗ କରିବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ଘଟଣାର ଯାଞ୍ଚ ପରେ ମାମଲାକୁ ବିଏସଏଫକୁ ହସ୍ତାନ୍ତର କରାଯିବ ବୋଲି ପୁଲିସ କହିଛି। ତେବେ ପାକିସ୍ତାନୀ ରେଞ୍ଜର ଏଭଳି କାର୍ଯ୍ୟ କରିଥିବା ଆଶଙ୍କା କରାଯାଇଛି।

Comments
Loading...