ଆରଡି : ବାବା ଆଖଣ୍ଡଳମଣିଙ୍କ ଶିବ ବିବାହ ପାଇଁ ଉତ୍ସବମୁଖର ହୋଇ ଉଠିଛି ସମଗ୍ର ପୀଠ। ଶୁକ୍ରବାର ବୈଦିକ ରୀତିନୀତି ଅନୁଯାଇ ମଙ୍ଗନକୃତ୍ୟ ନୀତି ସମ୍ପନ୍ନ ହୋଇଥିବା ବେଳେ ଆଜି ବିବାହ ବନ୍ଧନରେ ବାନ୍ଧିହେବେ ଦେବଦମ୍ପତି। ଏଥିପାଇଁ ଶୁକ୍ରବାର ଠାରୁ ମଣିବାବାଙ୍କ ମନ୍ଦିରରେ ଅନୁଷ୍ଠିତ ହେଉଛି ସ୍ବତନ୍ତ୍ର ନୀତିକାନ୍ତି। ଆଜି ବିବାହ ନିମନ୍ତେ ଭୋର ୪ଟାରେ ପହୁଡ଼ ଖୋଲିବା ପରେ ମଙ୍ଗଳ ଆଳତୀ ସହ ସମସ୍ତ ନୀତିକାନ୍ତି ସମ୍ପନ୍ନ ହେବା ପରେ ହଳଦୀ ଓ ସୁବାଷିତ ଜଳରେ ମଣିବାବାଙ୍କୁ ଓ ମାତା ପାର୍ବତୀଙ୍କୁ ୭ଜଣ ସେବାକାରୀ ଲୋକାଚାରରେ ମଙ୍ଗୁଳାଇ ଦେଇଥିଲେ ପରେ ନବବସ୍ତ୍ର ସହ ପଣା ଭୋଗ ଲାଗି କରାଯାଇଥିଲା।
ସେହିପରି ବରପିତା ଓ କନ୍ୟାପିତା ବାବାଙ୍କ ଚଳନ୍ତି ପ୍ରତିମା ହର ଓ ମାତାପାର୍ବତୀଙ୍କ ଚଳନ୍ତି ପ୍ରତିମା ଗୌରୀଙ୍କୁ ଏକ ସୁସଜ୍ଜିତ ବିମାନରେ ବିଜେ କରାଇ ନିଜ ନିଜର ଘରେ ଲୋକାଚାରରେ ବିବାହର ମାଙ୍ଗଳିକ ନୀତି ସମ୍ପନ୍ନ କରିବେ। ଏଥିନିମନ୍ତେ ନିମନ୍ତେ ସକାଳ ୧୦ଟାରେ ବରଧରା ଶୋଭାଯାତ୍ରା ଅନୁଷ୍ଠିତ ହେବା ସହ ଅପରାହ୍ଣରେ ମଣିବାବା ଓ ମାତା ପାର୍ବତୀଙ୍କର ରାଜରାଜେଶ୍ଵର ବେଶ ଓ ରାଜରାଜେଶ୍ଵରୀ ବେଶ କରାଯିବ। ତାହା ସହ ବିବାହ ଉତ୍ସବର ମୁଖ୍ୟ ଆକର୍ଷଣ ବରାନୁଗମନ ଶୋଭାଯାତ୍ରା ଅନୁଷ୍ଠିତ ହେବ। ଏଥିପାଇଁ ପୀଠରେ ବ୍ୟାପକ ସୁରକ୍ଷା ବ୍ୟବସ୍ଥା ସହ ଶ୍ରଦ୍ଧାଳୁଙ୍କ ଭିଡ ଜମିବାରେ ଲାଗିଛି। ବିବାହ ଶୋଭାଯାତ୍ରାରେ ରାଜ୍ୟର ବିଭିନ୍ନ ପ୍ରାନ୍ତରରୁ ହଜାରରୁ ଉର୍ଦ୍ଧ କଳାକାର ବାଦ୍ୟ , ଯୋଡିଶଙ୍ଖ, ମାଦଳବାଦ୍ୟ, କଳସନୃତ୍ୟ ସହ କୋଲକାତା ମେଦିନୀପୁରର ଢାକବାଦ୍ୟ ଦଳ ଯୋଗ ଦେବେ।
Comments are closed.