ସୁଦୂର ମହାରାଷ୍ଟ୍ରରୁ ଦୀର୍ଘ ୮ ଦିନ ଧରି ସାଇକେଲ ଚଳାଇ ଯାଜପୁରରେ ପହଂଚିଲେ ଯୁବକ

ଯାଜପୁର : କୁହାଯାଏ ଇଚ୍ଛା ଥିଲେ ଉପାୟ ଆପେ ଆପେ ଆସେ। ଏହି ଉକ୍ତିକୁ ପ୍ରମାଣ କରି ଦେଖାଇଛନ୍ତି ଯାଜପୁର ବରୀ ନିର୍ବାଚନମଣ୍ଡଳୀ ଅନ୍ତର୍ଗତ ଭଅଁରା ଗ୍ରାମର ମହେଶ ଜେନା। କୋରୋନା ପାଇଁ ସାରା ଭାରତବର୍ଷରେ ଏବେ ଲକ ଡାଉନ ଚାଲିଥିବା ବେଳେ ସୁଦୁର ମହାରାଷ୍ଟ୍ରରୁ ଦୀର୍ଘ ୮ ଦିନ ସାଇକେଲ ଚଳାଇ ଯାଜପୁରରେ ପହଂଚିଛନ୍ତି। ସେଠାରେ ସେ ଏକ ଘରୋଇ କଂପାନିରେ କାମ କରୁଥିଲେ। କୋରୋନା ପାଇଁ ହଠାତ୍ ସାରା ଦେଶରେ ଲକ ଡାଉନ ହେବା ପରେ ବାରମ୍ବାର ଘରକୁ ଯୋଗାଯୋଗ କରିବା ପାଇଁ ଚେଷ୍ଟା କରି ସେ ବିଫଳ ହୋଇଥିଲେ। ପରେ ଯେମିତି ହେଉ ପଛେ ସେ ଘରକୁ ଯିବେ ବୋଲି ସଂକଳ୍ପ ନେଇଥିଲେ। ଏକ ପୁରୁଣା ସାଇକେଲ ଯୋଗାଡ କରି ନିଜେ ବାହାରି ପଡିଲେ ଯାଜପୁର ଅଭିମୁଖେ। ସେ ବିଭିନ୍ନ ସ୍ଥାନରେ ରହି ଦୀର୍ଘ ୮ ଦିନ ପରେ ଯାଜପୁରରେ ପହଂଚିଥିଲେ। ଯାଜପୁରରେ ସ୍ଥାନୀୟ ବିଡିଓ ସୌରଭ ଚକ୍ରବର୍ତ୍ତୀ ତାଙ୍କୁ ଅବଦଲପୁର କ୍ୱାରେନଟାଇନ ହୋମରେ ଭର୍ତ୍ତି କରିଛନ୍ତି। ତାଙ୍କର ଏପରି ଦୁଃଶାହସିକ ପଦକ୍ଷେପ ପାଇଁ ସେ ଏବେ ସାରା ଜିଲାରେ ଚର୍ଚ୍ଚାର ବିଷୟ ପାଲଟିଛନ୍ତି।

Comments are closed.