ୟୁଏଇ ଏବଂ ସିଙ୍ଗାପୁର ଭଳି ଭାରତରେ ନିର୍ମାଣ ହେବ ୭୦ ମହଲା ବିଶିଷ୍ଟ ଅଟ୍ଟାଳିକା, ଏହି ରାଜ୍ୟକୁ ମିଳିଛି ଅନୁମତି

ନୂଆଦିଲ୍ଲୀ : ୟୁଏଇ ଏବଂ ସିଙ୍ଗାପୁର ସହରର ବଡ ବଡ ଅଟ୍ଟାଳିକା ଉପରେ ସମସ୍ତଙ୍କ ଆଖି କିଛି ସମୟ ପାଇଁ ଅଟକିଯାଏ। ଲୋକମାନେ ଏହିପରି ଅଟ୍ଟାଳିକା ଦେଖିବାକୁ ବିଦେଶ ଯିବାକୁ ଇଚ୍ଛା କରନ୍ତି। କିନ୍ତୁ ଏବେ ସେଭଳି ଅଟ୍ଟାଳିକା ଦେଖିବା ଲାଗି ଆଉ ବିଦେଶ ଯିବା ଆବଶ୍ୟକ ପଡିବ ନାହିଁ। କାରଣ ଭାରତରେ ମଧ୍ୟ ୭୦ ମହଲା ବିଶିଷ୍ଟ ଅଟ୍ଟାଳିକା ନିର୍ମାଣ ହେବାକୁ ଯାଉଛି।

ମିଳିଥିବା ସୂଚନା ଅନୁଯାୟୀ, ଗୁଜୁରାଟ ସରକାର ରାଜ୍ୟର ପାଞ୍ଚଟି ସହରରେ ସେଭଳି ୭୦ ମହଲା ବିଶିଷ୍ଟ ଅଟ୍ଟାଳିକା ନିର୍ମାଣକୁ ଯୋଜନା କରିଛନ୍ତି। ମୁଖ୍ୟମନ୍ତ୍ରୀ ବିଜୟ ରୂପାନି ଏହି ପ୍ରକଳ୍ପକୁ ମଞ୍ଜୁର କରିଛନ୍ତି। ଏହି ସହରଗୁଡ଼ିକ ମଧ୍ୟରେ ଅହମ୍ମଦାବାଦ, ସୁରଟ, ଭଦୋଦରା, ରାଜକୋଟ ଏବଂ ଗାନ୍ଧିନଗର ରହିଛି। ବର୍ତ୍ତମାନ ସୁଦ୍ଧା ଦେଶରେ ୫୦ରୁ ୬୦ ମହଲା ବିଶିଷ୍ଟ ଅଟ୍ଟାଳିକା ଖୁବ୍ କମ୍ ଦେଖିବାକୁ ମିଳୁଛି। ତାହା ପୁଣି କେବଳ ଦିଲ୍ଲୀ, କୋଲକାତା ଏବଂ ମୁମ୍ବାଇରେ ଦୃଶ୍ୟମାନ ହେଉଛି।

ଏହା ବିଷୟରେ ମୁଖ୍ୟମନ୍ତ୍ରୀ ବିଜୟ ରୂପାନି କହିଛନ୍ତି ଯେ, ରାଜ୍ୟକୁ ବିଶ୍ୱ ମାନଚିତ୍ରରେ ଅନ୍ତର୍ଭୁକ୍ତ କରିବା ପାଇଁ ଏହି ଯୋଜନା ହାତକୁ ନିଆଯାଇଛି। ଏହା ସହ ଗୁଜରାଟର ଭିତ୍ତିଭୂମିର ବିଶ୍ୱବ୍ୟାପୀ ପ୍ରଦର୍ଶନ ହୋଇପାରିବ। ଏଥିସହ ରାଜ୍ୟରେ ବୃଦ୍ଧି ପାଉଥିବା ଜନସଂଖ୍ୟାକୁ ଦୃଷ୍ଟିରେ ରଖି ସର୍ବାଧିକ ନିଯୁକ୍ତି ସୁଯୋଗ ସୃଷ୍ଟି କରାଯାଇପାରିବ ବୋଲି ସେ କହିଛନ୍ତି।

ସୂଚନାଯୋଗ୍ୟ, ଯଦି ଦେଶର ସର୍ବୋଚ୍ଚ ଅଟ୍ଟାଳିକା ବିଷୟରେ କଥା ହେବା ତାହା ହେଉଛି କୋଲକାତାର ଡି-୪୨। ଏହା ୬୫ ମହଲା ବିଶିଷ୍ଟ ଏବଂ ଏହାର ଲମ୍ବ ୨୬୮ ମିଟର। ଏହା ପୂର୍ବରୁ ମୁମ୍ବାଇର ଇମ୍ପେରିଆଲ୍ ବିଲ୍ଡିଂକୁ ଉଚ୍ଚତମ ଅଟ୍ଟାଳିକା ଭାବେ ଜଣାଯାଉଥିଲା। ଏହା ବ୍ୟତୀତ କୋଲକାତାରେ ୧୩ଟି ହଟ୍ଟାଳିକା ରହିଛି, ଯାହାର ଲମ୍ବ ୧୦୦ ମିଟରରୁ ଅଧିକ। ଅନ୍ୟପକ୍ଷରେ ଯଦି ଦେଶର ଉଚ୍ଚତମ ଅଟ୍ଟାଳିକାର ତାଲିକା ବାହାର କରାଯାଏ, ତେବେ ୧୦ଟି ଉଚ୍ଚତମ ଅଟ୍ଟାଳିକାର ମଧ୍ୟରୁ ମୁମ୍ବାଇରେ ୯ଟି ରହିଛି। ଉଚ୍ଚତମ ଅଟ୍ଟାଳିକା ନିର୍ମାଣରେ ଚୀନ୍ ୧୦ ବର୍ଷ ଧରି ବିଶ୍ୱର ଏକ ନମ୍ବରରେ ରହିଛି।

Comments
Loading...