ଦୁର୍ବଳ ହେଉଛି ଶ୍ରମ ଆଇନ – ରାଷ୍ଟ୍ରପତିଙ୍କୁ ଅଭିଯୋଗ କଲେ ୭ ରାଜନୈତିକ ଦଳ

ସମାଜ ପୋର୍ଟାଲ ଡେସ୍କ: ଦେଶର ସାତଟି ପ୍ରମୁଖ ରାଜନୈତିକ ଦଳ ଶୁକ୍ରବାର ଦିନ ରାଷ୍ଟ୍ରପତି ରାମ ନାଥ କୋବିନ୍ଦଙ୍କୁ ଏକ ପତ୍ର ମାଧ୍ୟମରେ ସରକାର ଶ୍ରମ ଆଇନକୁ ଦୁର୍ବଳ କରିଥିବା ଅଭିଯୋଗ କରିଛନ୍ତି। ସେହି ଦଳଗୁଡିକ ପକ୍ଷରୁ ମଧ୍ୟ ଏହି ପ୍ରସଙ୍ଗରେ ବିରୋଧ ପ୍ରଦର୍ଶନ କରାଯାଇଛି।ସିପିଆଇ (ଏମ୍) ସାଧାରଣ ସଚିବ ସୀତାରାମ ୟେଚୁରୀ, ସିପିଆଇ ସାଧାରଣ ସମ୍ପାଦକ ଡି ରାଜା, ସିପିଆଇ-ଏମଏଲ୍ (ସିପିଆଇ-ଏମଏଲ୍) ସାଧାରଣ ସମ୍ପାଦକ ଦୀପଙ୍କର ଦୀପକାର୍ ଭଟ୍ଟାଚାର୍ଯ୍ୟ, ଅଲ ଇଣ୍ଡିଆ ଫରୱାର୍ଡ ବ୍ଲକ୍ ସେକ୍ରେଟେରୀ ଜେନେରାଲ ଦେବବ୍ରତ ବିଶ୍ୱାସ, ଆରଏସପି ସାଧାରଣ ସମ୍ପାଦକ ମନୋଜ ଭଟ୍ଟାଚାର୍ଯ୍ୟ, ଆରଜେଡି ସାଂସଦ ମନୋଜ ଝା ଏବଂ ତାମିଲନାଡୁ ବିଶିକେ ଦଳର ଅଧ୍ୟକ୍ଷ ଥୋଲ ଥିରୁମବଲବନ ପ୍ରମୁଖ ସେହି ଚିଠିରେ ଦସ୍ତଖତ କରିଛନ୍ତି।

ବିରୋଧୀ ଦଳମାନେ ଶ୍ରମ ଆଇନକୁ ଦୁର୍ବଳ କରିଦେବା ସମ୍ବିଧାନର ଉଲ୍ଲଂଘନ ବୋଲି କହିଛନ୍ତି। କାରଖାନା ଅଧିନିୟମରେ ସଂଶୋଧନ ନକରି ଗୁଜୁରାଟ, ମଧ୍ୟପ୍ରଦେଶ, ହରିୟାଣା, ହିମାଚଳ ପ୍ରଦେଶ, ରାଜସ୍ଥାନ ଏବଂ ପଞ୍ଜାବରେ ଦିନକୁ କାମ କରିବା ସମୟ ଆଠ ଘଣ୍ଟାରୁ ୧୨ ଘଣ୍ଟାକୁ ବୃଦ୍ଧି କରିଛନ୍ତି। ତେଣୁ ଏହି ରାଜନୈତିକ ଦଳମାନେ ଆଶଙ୍କା ବ୍ୟକ୍ତ କରିଛନ୍ତି ଯେ ଅନ୍ୟ ରାଜ୍ୟ ମଧ୍ୟ ଏଭଳି ପଦକ୍ଷେପ ନେଇପାରନ୍ତି। ସେମାନେ ରାଷ୍ଟ୍ରପତିଙ୍କ ନିକଟରେ ଅଭିଯୋଗ କରିଛନ୍ତି ଯେ ଯେଉଁମାନେ ନିଜର ଜୀବିକା ହରାଇଛନ୍ତି, ସରକାର ସେମାନଙ୍କୁ ସାହାଯ୍ୟ କରିବା ପାଇଁ ଅଳ୍ପ ଉଦ୍ୟମ କରିଛନ୍ତି ଓ ଲକ ଡାଉନ ହେବା ପରଠାରୁ ୧୪ କୋଟି ଲୋକ ଚାକିରି ହରାଇଛନ୍ତି।

Comments
Loading...