ଶ୍ରୀନଗର : ଜାମ୍ମୁ-କାଶ୍ମୀରରେ ଶନିବାର ଅନୁଷ୍ଠିତ ପ୍ରଥମ ପର୍ଯ୍ୟାୟ ପଞ୍ଚାୟତ ନିର୍ବାଚନରେ ବିପୁଳ ମତଦାନ ହୋଇଛି। ନିର୍ବାଚନ ବର୍ଜନ ଧମକ ଓ ଦୁଇ ଦିନ ହେଲା ଆତଙ୍କବାଦୀଙ୍କ ଉତ୍ପାତ ସତ୍ତ୍ବେ ଲୋକେ ବହୁ ସଂଖ୍ୟାରେ ମତଦାନ ସାବ୍ୟସ୍ତ କରିଛନ୍ତି। ମୋଟ ୭୪.୧ପ୍ରତିଶତ ମତଦାନ ହୋଇଥିବା ନିର୍ବାଚନ ଅଧିକାରୀଙ୍କ ସୂତ୍ରରୁ ପ୍ରକାଶ। ଏହା ଏକ ରେକର୍ଡ ବୋଲି କୁହାଯାଉଛି। କାଶ୍ମୀର ଅଞ୍ଚଳର ୧୬, ଜାମ୍ମୁ ଅଞ୍ଚଳର ୨୧ ଓ ଲଦାଖ ଅଞ୍ଚଳର ୧୦ଟିକୁ ମିଶାଇ ମୋଟ ୪୭ଟି ବ୍ଲକ ମଧ୍ୟରୁ କାଶ୍ମୀର ଅଞ୍ଚଳରେ ୬୪.୫ ପ୍ରତିଶତ ଓ ଜାମ୍ମୁ ଅଞ୍ଚଳରେ ୭୯.୫ ପ୍ରତିଶତ ମତଦାନ ହୋଇଛି। ମୋଟ ୨ଲକ୍ଷ ୩୫ହଜାର ମତଦାତା ସେମାନଙ୍କ ମତଦାନ ସାବ୍ୟସ୍ତ କରିଛନ୍ତି। ନିର୍ବାଚନ ମୋଟାମୋଟି ଶାନ୍ତିପୂର୍ଣ୍ଣ ଥିବା ଜଣାଯାଇଛି।
