‘କରୋନା’ରେ ଗଲାଣି ୫୬୩ ଜୀବନ, ସେନାର ସହାୟତା ଲୋଡ଼ିଲେ ଜିନ୍‌ପିଙ୍ଗ

ବେଜିଂ: ଚୀନରେ ଭୟଙ୍କର ‘କରୋନା’ ଭାଇରସ ମହାମାରୀ ରୂପ ନେଇଛି। କରୋନା ଯୋଗୁ ଗୋଟିକ ପରେ ଗୋଟିଏ ୫୬୩ ଜୀବନ ଚାଲିଗଲାଣି। ଆକ୍ରାନ୍ତଙ୍କ ସଂଖ୍ୟା ୨୮ ହଜାର ୧୮ରେ ପହଞ୍ଚିଲାଣି।ଏହାକୁ ରୋକିବା ଚୀନ ସରକାରଙ୍କ ପକ୍ଷେ ମୁସ୍କିଲ ହୋଇପଡ଼ିଛି। ଦେଶରେ କରୋନାକୁ ନେଇ ଉପୁଜିଥିବା ପରିସ୍ଥିତି ଅତ୍ୟନ୍ତ ଗମ୍ଭୀର ବୋଲି ଚୀନ ରାଷ୍ଟ୍ରପତି ଜି ଜିନ୍‌ପିଙ୍ଗ କହିଛନ୍ତି।

ଚୀନ ଜାତୀୟ ସ୍ବାସ୍ଥ୍ୟ ଆୟୋଗ ସୂଚନା ଅନୁସାରେ, ବୁଧବାର ୭୩ ଜଣଙ୍କ ମୃତ୍ୟୁ ଘଟିଛି। ସେମାନଙ୍କ ମଧ୍ୟରୁ କେବଳ ୭୦ ଜଣ ହୁବେଇ ପ୍ରଦେଶର ରାଜଧାନୀ ଉହାନ ସହରର। ବର୍ତ୍ତମାନର ପରିସ୍ଥିତିକୁ ନେଇ ରାଷ୍ଟ୍ରପତି ଜିନ୍‌ପିଙ୍ଗ ଏକପ୍ରକାର ଅସହାୟ ହୋଇପଡ଼ିଛନ୍ତି। ସେ କହିଛନ୍ତି, କରୋନାରୁ ଲୋକଙ୍କୁ ରକ୍ଷା କରିବା ଏବଂ ଏହାକୁ ନିୟନ୍ତ୍ରଣ କରିବାର ସ୍ଥିତି ସଙ୍କଟପୂର୍ଣ୍ଣ ରହିଛି। ଭୂତାଣୁକୁ ରୋକିବା ଏବଂ ଏହାକୁ ନିୟନ୍ତ୍ରଣାଧୀନ କରିବା ଲାଗି ଆଇନଗତ, ବୈଜ୍ଞାନିକ ଏବଂ ସାମୁହିକ ପ୍ରୟାସର ଆବଶ୍ୟକତା ରହିଛି। କମ୍ୟୁନିଷ୍ଟ ପାର୍ଟିର ସେଣ୍ଟ୍ରାଲ କମିଟି ବୈଠକରେ ଜିନପିଙ୍ଗ ଏହା କହିଛନ୍ତି।

ସେନାକୁ ଦାୟିତ୍ଵ ଦେଲେ ରାଷ୍ଟ୍ରପତି

କରୋନ ଭୂତାଣୁକୁ ନେଇ ଉପୁଜିଥିବା ପରିସ୍ଥିତିର ମୁକାବିଲା ପାଇଁ ଚୀନ ସରକାର ସେନାର ସହାୟତା ଲୋଡ଼ିଛନ୍ତି। ରାଷ୍ଟ୍ରପତି ଜିନପିଙ୍ଗ ଚୀନ ସେନା, ପିପୁଲ୍ସ ଲିବରେଶନ ଆର୍ମି(ପିଏଲଏ)କୁ ଏହି ମହାମାରୀକୁ ରୋକିବା ଲାଗି ଦାୟିତ୍ଵ ପ୍ରଦାନ କରିଛନ୍ତି। ଜିନପିଙ୍ଗ କହିଛନ୍ତି, ସେନାକୁ ବୁଝିବାକୁ ପଡ଼ିବ ଯେ ପରିସ୍ଥିତି ବହୁତ କଠିନ ଏବଂ ଚ୍ୟାଲେଞ୍ଜପୂର୍ଣ୍ଣ ରହିଛି। ପିଏଲଏକୁ ନିଜର ଉଦ୍ଦେଶ୍ୟକୁ ଧ୍ୟାନରେ ରଖି ଆଦେଶକୁ ପାଳନ କରିବାକୁ ପଡ଼ିବ।

Comments are closed.